Read Abun Sukdu Subot Yerasul 18 Bible Online

Sukdu Subot Yerasul 18 - Abun bible

Sukdu Subot Yerasul 18

¹Orge Paulus mu kadit kota Atena, an mu mo kota Korintus.

²Mone an ku ye Yahudi ge dik yo gato gum do Akwila. Akwila bi nat-i mo bur Pontus. Gabere an ma mo kota Korintus kadit bur Italia. An si an bi nggon gato gum do Priskila, an we ma kadit bur Italia, we yepasye gato jowa nje mo bur ne, gato gum do Kaisar Kladius, an syaugat ye Yahudi mwa ne sino mu kadit kota Roma mo bur ne. Sane an we ma kem mo Korintus. Paulus mu ku an we mone,

³we Paulus si an we jam bit wan wa nu ra, sane Paulus si an we kem sino. Paulus si an we bit kemah ne sino.

⁴Kam Sabat, ye Yahudi bi kam sye, ete Paulus sok mo ye Yahudi bi nu ari mone. Paulus ki sukdu subot Yefun Yesus mone subere kak ye Yahudi si yewis yi bi sukjimnut, subere án onyar brek kadit os nyim ne, ete jammo Yefun Yesus.

⁵Silas si Timotius ma kadit bur Makedonia sa, Paulus ki sukdu subot Yefun Yesus kamdik-kamdik petok sor, an yo ben suk yi nde. An ki rer nai ye Yahudi do, “Yefun Yesus anato Yekwesu gato Yefun Allah tom su men bi amui do, bere An syogat Yekwesu dik yo ma mo bur re wa nai men kadit sukye ete jowa men. Yekwesu ne anato Kristus.”

⁶Sarewo ye Yahudi ge bok yo duwer Paulus mo sukdu ne. Yé bok ne maskwa ket Paulus, yé bok ne kabor Paulus sane wade kom mo rut sa, Paulus tet sukkwik kadit an bi san tepsu suknapa wa ye Yahudi mo sukibit gato ye Yahudi ben ket an. Tomgane Paulus ki do, “Nin misyar sukdu gato ji ki re, sane bere Yefun Allah ben sukye nai nin mone sor. Yefun Allah ben sukye nai nin yo, nin maskwa ji nde. Ji anato ki rer wa nin jam ware, nin bariwa ré. Sane, re ne, ji mu ki sukdu subot Yefun Yesus nai yewis yi jam sor.”

⁷Sane Paulus mu kadit ye Yahudi bi nu ari, an yo ki sukdu mone o nde, wo an mu mo Titius Yustus bi nu gato karowa nu ari ne, Paulus ki sukdu subot Yefun Yesus mone sor. Titius gato bi nu ne, an ye Yahudi nde, wo an ye gato jammo Yefun Allah petok.

⁸Krispus, yekwesu mo ye Yahudi bi nu ari ne, an si an bi rus-i sino nai sukjimnut do, án brek kadit os nyim, ete án jammo Yefun Yesus tepsu an bi Yekwesu sor, án onyar kem mo Yefun Yesus it. Sane dom, yé mwa gato kem mo kota Korintus jam Paulus nuk sukdu subot Yefun Yesus anato án onyar brek kadit os nyim, ete án jammo Yefun Yesus tepsu án bi Yekwesu. Yé mwa ne nai sukjimnut sane, orete ye ras án mo syur.

⁹Noru dik yo Paulus me suk tepsu an semda, wo an yo sem nde. Sugane Yefun Yesus ki nai an do, “Nan nyu nde. Nan ki sukdu ne gat sor. Nan not nde.

¹⁰Ji anato sisu nan, bere Ji mewa nan kadit nje gu nan mo kota re. Nan ki gat sor, we yé mwa mo kota re anato tepsu Ji bi nje-i.”

¹¹Sane Paulus kem mone tahun dik nap. An duno nje mone su Yefun Allah bi sukdu subot Yefun Yesus.

¹²Tomgato ye bes ye Roma ge dik yo gato gum do Galio tepsu Gubernur mo bur Akhaya, ye Yahudi sum tepsu dik futma wa but Paulus, ete gwat an mu mo Galio wa Galio ndobot an.

¹³Ye Yahudi gwat Paulus mu kom mo Galio sa, yé ndak Paulus, yé ki do, “Ye gare, an wergat yé mwa more subere yé som Yefun Allah tara kadit men bi amui duno men, sukdu gato an ki ne siri kadit men ye Yahudi bi sukduno-i.”

¹⁴Paulus iwa ki sukdu sa, Galio tot an bi sukdu-i, ete Galio ki nai ye Yahudi mone do, “Nin, ye Yahudi, nin gwat ye gato ben suk gato siri kadit pemerintah ye Roma bi sukduno-i, kapre suk gato ye re ben ne siri sye, bado siri wok, sane sa, bere ji jam nin bi sukdu, bere ji ndobot ye re.

¹⁵Sarewo nin ndak ye re mo nin ye Yahudi dakai bi sukduno-i mo kwayo-kwayo, sane ji bariwa ji kibot nin bi sukdu-i ne. Nin dakai mu nin kibot mo nin dakai sor.”

¹⁶Sane Galio syun ye Yahudi ne kadit nu gato án sum mone wa kibot sukdu ne.

¹⁷Án ge bok ne yo mu mo nden nde tó, yé but Sostenes gato yekwesu mo ye Yahudi bi nu ari, orge yé gwa an kete mo Galio gwem. Sarewo Galio misyar ré.

¹⁸Paulus kem mo kota Korintus nam, orete an mu kadit ye gato onyar kem mo Yefun Yesus mone. An si yé bok yo gato onyar kem mo Yefun Yesus e, Priskila e, Akwila e ne sino it mo kwem mu mo bur Siria. Paulus yo mu nde tó, an syogat ye tot an sugo wé mo kota Kengkrea. Paulus tom suk yo su Yefun Allah do, Yefun ós an mo sukye gato an ku ne sa, bere an tot an sugo ne wé, anato an syogat ye tot an sugo ne sino or wé ré.

¹⁹Án sino mu kom mo kota Efesus sa, Paulus si Priskila sisu Akwila wat yu. Paulus dakai sok mo ye Yahudi bi nu ari. Mone an ki subot Yefun Yesus subere kak ye Yahudi mone bi sukjimnut, subere án brek kadit os nyim ete simo os be gato Yefun Yesus kak ne.

²⁰Ye mo ye Yahudi bi nu ari ne ndekwa Paulus si án kem mone nam gan yo o ware, Paulus bari ré.

²¹Sarewo Paulus mu kadit án sa, Paulus tom su do, “Yefun Allah imo, yo, bere ji satu ma ku nin more o.” Orge Paulus it mo kwem mu kadit kota Efesus mu mo bur Siria.

²²An mu kom mo kota Kaisarea, orge an mu mo kota Yerusalem wa an ku ye gato onyar kem mo Yefun Yesus mone, an si yé nuk sukdu, orete an mu mo kota Antiokhia.

²³Paulus kem mo Antiokhia nam gan, orge an mubot pe mwa mo bur Galatia si bur Frigia. An mubot pe mwa ne wa ós ye gato onyar kem mo Yefun Yesus subere yé mwa ne onyar kem mo Yefun nggi wai kadit nyim ne o ré.

²⁴Ye Yahudi ge dik yo gato gum do Apolos, an ye Aleksandria, an ma kom mo Efesus. Apolos ki bi sukdu-i ne rer. An sa, jam Yefun Allah bi sukdu ne kom mo mit.

²⁵Apolos jam ye ki sukdu subot Yefun Yesus mó ré. Sane an mu kom mo kota Efesus sa, an ki sukdu subot Yefun Yesus, an ki sukdu ne su an mit iwa wai o ré. An duno nje subot Yefun Yesus ne sisu sangge, sarewo sukdu subot ye ras nje mo syur, an jam sukdu gato Yohanes duno nje su ne sor ré.

²⁶Apolos mu mo ye Yahudi bi nu ari, an yo nyu nde, an ki subot Yefun Yesus sor. Priskila si Akwila jam Apolos nuk sukdu mone sa, an we kendo Apolos ma mo an we bi nu. Mone an we nuk sukdu subot os gato Yefun Allah fro wa ye sok mo An bi rus-i ne rer wa Apolos jam. An we ki rer wa Apolos jam do, Yefun Allah anato syogat Yesus Kristus ma wa kak os ne.

²⁷Orete Apolos nai sukjimnut do, an mu kadit Efesus, ete an mu mo kota Korintus mo bur Akhaya. Sane ye gato onyar kem mo Yefun Yesus mo Efesus ós Apolos. Yé krom surat wa ye gato onyar kem mo Yefun Yesus mo bur Akhaya, subere Apolos kom mone sa, án kak án mit wa Apolos, ete án mewa Apolos. Sane Apolos mu kom motu sa, Apolos ós án subere án onyar kem mo Yefun nggi wai kadit nyim ne o ré. Yefun Allah ben sukndo su nje mone anato án onyar kem mo Yefun Yesus it.

²⁸Apolos ós nje mone, we Apolos ki bi sukdu-i ne nggi. An duwer ye Yahudi mo bi sukdu-i ne nggi mo yé mwa gwem. An nai sukdu mo Yefun Allah bi sukdu, ete an ki subot sukdu ne subere yé jam rer kom mo mit do, Yefun Yesus anato Yekwesu gato Yefun Allah syogat ma mo bur re wa nai men yetu kadit sukye ete jowa men.