Read Abun Sukdu Subot Yerasul 2 Bible Online

Sukdu Subot Yerasul 2 - Abun bible

Sukdu Subot Yerasul 2

¹Su kam sye gato ye kendo do Pentakosta, yé mwa gato onyar kem mo Yefun Yesus sum sino mo pe dik.

²Án sino gensu suk gato uk mo gu tepsu nobu gato kas nggi. Suk ne uk mo nu mit ne sino, mo nat gato an kem mo.

³Án me suk sato bot ru mwa tepsu yetu brip. Bot ru ne syo yu bot nje gato kem mone sino, bot ru dik tom kem bot án kadik-kadik.

⁴Sane Yefun Allah Gen bok nggwa mo yé mwa ne, orge yé mwa ki suk su ye yi neya bi a-i, gato án jam nde, we Yefun Allah Gen anato ben yé mwa ne ki suk su ye yi bi a-i ne.

⁵Tomgane ye Yahudi mwa gato jammo Yefun Allah kadit bur re iwedewe ma kem mo Yerusalem.

⁶Ye Yahudi ne jam yé ki suk su ye yi bi a-i sa, ye Yahudi ne ma sum wairi wa nden wa nje mone or, án ki do, “Mban! Suma gei re ne?” Án ki sane, we án jam yé ki suk su án kadik-kadik bi a-i.

⁷Ye Yahudi mwa ne yeket ndo nde, án ki do, “Yé mwa gato ki suk su men kadik-kadik bi a-i re, án sino ye Galilea fe!

⁸Suma ben to yé re jam ki suk su men kadik-kadik bi a-i ne? Mban! Yé re ki suk su men bi a-i,

⁹men yé gato ma kadit bur Partia, Media, Elam, Mesopotamia, Yudea, Kapodokia, Pontus, Asia,

¹⁰Frigia, Pamfilia, Mesir, bur karowa Libia, karowa Kirire, men deyo ma kadit Roma.

¹¹Men deyo ma kadit bur Kreta sisu bur Arab. Men yé gato ma kadit pe mwa re sino. Men sino sok mo ye Yahudi bi agama. Men deyo ye Yahudi kadit men bi im pe men, wo men deyo o yewis yi gato sok mo ye Yahudi bi agama. Men ma kadit pe mwa ne sino, sarewo men jam yé re ki suk su men kadik-kadik dakai bi a-i. Yé re ki subot suk gato ndo wai o ré, yé re ki sukdu subot suk gato Yefun Allah ben wade men nutbot ndo nde.”

¹²Ye Yahudi ne yeket suk gato án jam ne, án nutbot, án nutbot ware, án ndobot yu, án ki do, “Men kibot suk re sa u ne? Men jam nde, yé re jam men kadik-kadik bi a-i sa u ne?”

¹³Ye Yahudi deyo sa ye gato ki suk su a yi ne, án ki do, “Bei! Yé mwa re da nau mwa teker, sane án ki suk su a daret sor.”

¹⁴Sane Petrus, an si yerasul ge musyu dik sop dik ne ti, Petrus ki sye nai ye Yahudi mwa gato mone, an ki do, “Ji bi nji, ji bi nyanggon, ye Yahudi ne, si nin yé gato kem mo Yerusalem ne sino, nin jamwa suk gato ji ki re et. Ji ki subot suk gato nin me re, subere nin jam et.

¹⁵Nin deyo nut do, men gare yenau. Sane nde! Re ne jam musi nyotkwo sor ré. Sane men yenau nde,

¹⁶wo suk gato nin me re, yenabi gato gum do Yoel krombot mó ré. An krom do,

¹⁷Yefun Allah ki do, ‘Karowa bur re kru yo, Bere Ji syo Ji Gen bok nggwa mo yé mwa ne sino. Sane suktaru gato Ji ki nai nin bi pa yebris si nin bi pa donggon bere án waii ki nai ye yi jam. Bere yemsok me suk kadit Ji tepsu án semda. Bere yenggras semda, ete jam sukdu kadit Ji.

¹⁸Bere Ji syo Ji Gen bok nggwa mo Ji bi pákwerut, yebris si nggon ne sino. Su kam gato karowa bur kru ne yo, bere Ji syo Ji Gen bok nggwa mo Ji bi pákwerut, sane suktaru gato Ji ki nai Ji bi pákwerut ne, bere án waii ki nai ye yi jam.

¹⁹Bere Ji ben suk mo gu nim ne gato ben yetu wade yé nutbot ndo nde. Bere Ji ben suk mo bur re gato kadum Ji bi suktinggi bor wa yetu me. Bere yé me yetu dé sye, yé me bot, yé me bot bu ne mwa.

²⁰Bur yo kru nde tó, kam mo gu ne, su rup ré, aina su er tepsu yetu dé ne. Suk ne bor yo, Yefun bi kam sye ma it, Yefun ndobot men yetu mone it.

²¹Sugane yé mwa ne sino gato ndekwa Yefun nai án wé kadit sukye it yo, bere án kem ndo to kapyo mato kapyo ré.’ ”

²²Orge Petrus ki o do, “Ji bi nji, ji bi nyanggon, ye Israel, nin jammo suk gato ji ki re et. Yefun Yesus, ye Nazaret ne, men jam do Yefun Allah bes An, we Yefun Allah bi suktinggi bor mo An ré. An ben suk mwa gato men yetu yeket {sato: ye gato kwop, An sun mbau satu, ye gato gro ndu, An ben gro ndo satu, ye gato gwes út ne, An ben mu o ré.} Yé mwa nutbot suk gato An ben ne ndo nde. An kadum Yefun Allah bi suktinggi bor wa men me ré. Nin dakai jam ré.

²³Yefun Yesus gare, nin si yé bok yo gato ben sukibit ne gu An kwop wé. Nin si yé bok ne mban Yefun Yesus mo kwesukwin. Yefun Allah fro suk gato bor ne su ketke, Yefun Allah jam nyim wé ré. Yefun jam do, bere ye syo An mo nin syim-i, orete nin gu An kwop, Yefun Allah jam nyim wé ré. Nin da gu An kwop,

²⁴sarewo Yefun Allah sun An kadit sukkwop o ré. Yefun Allah sombok Yefun Yesus wé kadit sukye gato Yefun Yesus ku mo sukkwop ne, tepsu ye sombok bus wé kadit ye gato ye rai su bus ne. Yefun Allah sombok Yefun Yesus wé, we sukkwop yo nggiwa jom Yefun Yesus pe nde, An sun kadit sukkwop o ré.

²⁵Suga nyim tuya, Daud krom sukdu subot Yefun Yesus sare do, ‘Ji me Yefun Allah, Nan mo ji gwem petok sor. Nan sisu ji sor, sane ji yo ku sukye mo nde.

²⁶Sane ji mit iwa Nan, ji bes Nan gum kok, Ji kwabom kam mo Nan do, bere Nan sun ji mukri mbau satu mone tó,

²⁷we ji gato tepsu Nan bi pakwerut gato ben Nan bi suk-i, bere Nan yo misyar ji mukri mo makwe nde. Sane dom, ji gato Nan dakai bes wa ben Nan bi suk-i, bere Nan yo misyar ji mukri mbras nde.

²⁸Nan kadum os ndo wa ji muket subere ji kom mo pe gato ji kem ndo mó, Nan kadum os ne mó ré. Ji sisu Nan mone anato ji mit iwa wai o ré.’ ”

²⁹Petrus ki o do, “Ji bi nji, ji bi nyanggon, ji ki rer wa nin jam do, men bi amui gato Daud ne kwop, orge ye bi an mo makwe. Pe gato ye bi an more mó tó.

³⁰Sane Daud gwat sukamno subot an dakai nde, wo Daud anato yenabi dik yo gato gwat sukamno subot yetu ge dik yo o ré. An jam suk gato Yefun Allah tom su an ne do, kapyo tak Yefun Allah bes Daud bi pa-i ge dik yo tepsu Yekwesu wa jowa ye Yahudi.

³¹Suga nyim tuya, Daud me suk rer, an ki do, bere Yefun Allah sun Ye gato Yefun Allah syogat ma ne kadit sukkwop. Yefun Allah syogat Ye ne ma mo bur re wa nai men yetu kadit sukye ete jowa men. Ye ne tepsu men bi Yekwesu gato Yefun Allah bes gum Kristus. Daud ki sukdu subot Kristus sare do, Yefun Allah yo misyar An mukri mo makwe nde, An mukri yo mbras dom nde.

³²Yefun Yesus gare anato Yefun Allah sun kadit sukkwop it. Men sino dakai me su men gro ré.

³³Yefun Allah bes Yefun Yesus kem tak Yefun Allah de syim ge. Yefun Yesus si Yefun Allah jom suk mwa neya tepsu Yekwesu sino mone. Yefun Allah syo An Gen bok nggwa mo Yefun Yesus tepsu Yefun Allah tom ne. Sane, Yefun Yesus waii syo Yefun Allah Gen bok nggwa mo men, anato men ki suk su a mwa neya re, nin dakai jam ete nin me su nin gro ré. Yefun Yesus sa, An it su An kaim mu mo gu tepsu Yekwesu,

³⁴wo Daud yo it su kaim mu mo gu nde. Daud ki subot Yefun Yesus sare do, ‘Yefun Allah gato gesyos ki nai Ji bi Yekwesu do,

³⁵Nan kem tak Ji de syim ge. Nan si Ji tepsu Yekwesu sino mone sane sor Ji syo yeko gato iwa gu Nan mo Nan syim, subere án jammo Nan et.’ ”

³⁶Petrus ki o do, “Sa ndo sa, nin ye Israel ne sino jam do, Yefun Yesus gato nin gu kwop mo kwesukwin ne, Yefun Allah bes tepsu men bi Yekwesu. Yefun Allah anato bes Yefun Yesus gum Kristus, Ye gato Yefun Allah syogat ma mo bur re wa nai men yetu kadit sukye ete jowa men ne.”

³⁷Yé mwa jam Petrus bi sukdu-i ne or sa, án kwabom kro, án ki nai Petrus si yerasul yi neya do, “Sane men bi nji, men ben suma ne?”

³⁸Petrus ki do, “Nin kadik-kadik nai sukjimnut do, nin kwet kadit sukibit gato nin ben ne, ete nin jammo Yefun et. Orete nin ma, nin bi nggwa wa men ras nin kadik-kadik mo syur sisu Yesus Kristus gum, tepsu nin gum sok mo Yesus Kristus bi nje-i mone it. Sane bere Yefun Allah yo maskwa nin mo sukibit mwa gato nin ben ne o nde, wo An tot sukibit ne wé kadit nin ré. Orete Yefun Allah syo An Gen bok nggwa mo nin.

³⁹Bere Yefun Allah syo An Gen bok nggwa mo nin, we Yefun Allah tom do, An syo An Gen bok nggwa mo nin e, nin bi pá e, sisu nje mo bur yi neya gato Yefun Allah kendo ma wa sok mo An bi rus-i ne ré.”

⁴⁰Petrus ki sane sor nde, wo an dunogat, an wergat nje gato sum mone, an ki do, “Nin ben nin bi suk-i ibit tepsu yetu mo bur re o nde, bere yé mwa ne ku sukye mone. Sane nin brek kadit yé mwa ne bi os-i, nin sok mo Yefun Allah bi rus-i kadit, subere nin ku sukye si yé mwa ne nde.”

⁴¹Ye gato onyar kem mo sukdu gato Petrus ki ne, ye ras án mo syur ré. Sane su kam gane, karowa yetu ge ribu gri sok mo Yesus Kristus bi nje-i tó ye gato nyim ne.

⁴²Sane ye gato onyar kem mo Yefun Yesus ne werwa án jam yerasul bi sukduno-i su án mit dik án onyar dik, subere án sino jamwa pe. Kamdik-kamdik án mit iwa án sum sino petok sor, án git sino, án git roti wa napawa Yefun Yesus, án ki suk su Yefun sino.

⁴³Yé mwa ne yeket suk mwa gato yerasul ben ne. Yerasul kadum Yefun Allah bi suktinggi bor sato re, ye gato kwop ne, sun e; ye gato gro ndu, gro ndo satu e; ye gato gwes út ne, mu e ne. Suk mwa gato yerasul ben ne yetu mwa ne nutbot ware, án yo jam kom mo koirut nde.

⁴⁴Yé mwa gato onyar kem mo Yefun Yesus, án sum, án kem sino mo pe dik sor. Án sum án bi suk mone, án ós yu su.

⁴⁵Án so án bi suk, án syo nai ye gato yewa suk.

⁴⁶Kamdik-kamdik án sum sino mo Yefun Allah bi nu de mo ros de mit ne. Án mubot nu, án git sugit sino, án git roti wa napawa Yefun Yesus, án mit iwa, án mit dik wa.

⁴⁷Án un Yefun Allah. Yé mwa ne sino mo Yerusalem nut mo án do, án sino ben sukndo. Yé mo Yerusalem ne mit iwa án. Kamdik-kamdik Yefun Allah ben ye deyo o wade yé bok ne brek kadit os ibit, ete yé bok ne waii sok mo Yesus Kristus bi nje-i tó án, dobe sok gat o ré.