Read Abun Sukdu Subot Yerasul 20 Bible Online

Sukdu Subot Yerasul 20 - Abun bible

Sukdu Subot Yerasul 20

¹Yé mwa mo kota Efesus kem not satu, orete Paulus kendo ye gato onyar kem mo Yefun Yesus ne ma sum sino. Paulus duno án subere án onyar kem mo Yefun Yesus nggi wai o, orete Paulus ki ndo mo án, ete Paulus mu kadit ré. Paulus mu mo bur Makedonia.

²Paulus mubot bur Makedonia sa, an duno nje gato onyar kem mo Yefun Yesus su sukduno mwa, an duno nje mo bur ne subere nje mone onyar kem mo Yefun Yesus nggi wai o. Orge, an mu sor, an mu kom mo bur Yunani.

³Paulus kem mone kom mo aina gri. An fro nggwa wa it mo kwem mu mo bur Siria saresa, an jam do, ye Yahudi meret os wa gu an kwop wé, sane Paulus nut mo an syidem do, “Ji yo it mo kwem mu mo bur Siria nde, wo ji muket gwes bot bur Makedonia satu o kadit ye gu ji kwop wé.”

⁴Tomgato Paulus mubot bur Makedonia ne, yetu ge mufit simo an. Ye gato simo an gum do, Sopater gato Pirus bi gan ne, an ye Berea; Aristarkhus si Sekundus, ye we ne ye Tesalonika; Gayus, an ye Derbe; Timotius si Tikhikus si Trofimus, an ka gri ye bur Asia.

⁵Paulus si ye ka mufit ne mu nyim mo men gwem mu mo kota Troas. Án kem kret men mone.

⁶Sarewo men simo ye Yahudi bi Kam Sye Waiket ne, bi kam futmo, kam gato yé git roti gato yo it nde. Men simo nje konwa kam sye ne, orete men it mo kwem mu kadit kota Filipi. Kam mumek rek, orge men ma kom mo kota Troas, men ku ye gato mu nyim ne. Men kem mo kota Troas kom mo kam mufit rek.

⁷Kam Saptu bi noru, men si ye gato onyar kem mo Yefun Yesus mone sum sino. Men git sugit sino, men git roti wa men napawa Yefun Yesus. Bi ik, ete Paulus mu kadit kota Troas ne, sane Paulus nuk sukdu sor kom mo noru miten.

⁸Men sum mo gumwak mo nim mo nu gwes kok. Mone ye dum sukru mwa.

⁹Pa yemsok ge dik yo gato gum do Eutikhus kem mo nusyo kot de. Paulus nuk sukdu sane sane sor, pa ne sem mit kwop ré. Pa ne sem mit saresa, pa ne ges kadit nu gwes kok ne ka dogri gwa mo bur. Ye gato mu nai pa ne me do, pa ne kwop ré, pa ne mas bok ré.

¹⁰Sane Paulus is mo bur. Paulus bi an nggwa bot pa kaim ne, an but pa ne, orge an ki do, “Nin nyu nde. Pa mbau ré.”

¹¹Orete án sino it mo nim o, án git sino, án git roti wa napawa Yefun Yesus. Paulus nuk sukdu yo o sane sor, nombrak ré. Nombrak, ete an mu ré.

¹²Ye top pa ne satu mo bi nu. Án sino mit at wa wai o ré.

¹³Paulus muket gwes mu mo kota Asos. An tom su men do, “Nin it mo kwem, nin mu nyim mo kota Asos kem kret ji mone. Mone bere ji si nin mu sino mo kwem ne.”

¹⁴Men ku an mo kota Asos, orete an si men it mo kwem mu mo kota Metilene.

¹⁵Bi ik, ete men mu kom mo nat karowa ef Khios, orge bi kam we, men mu kom mo ef Samos. Kam dik yo o, men mu kom mo kota Miletus.

¹⁶Kam Sye Pentakosta nde tó, men ku os mó yo, Paulus iwa men mu kom mo kota Yerusalem nyim wé ré. Sane an werwa men mu kekro, men yo kamo kem bot os nde. Sane men wai kadit kota Efesus subere men yo kamo kem mo bur Asia nam nde.

¹⁷Tomgato Paulus kem mo Miletus, an syogat ye mu kar yekwesu mo nu ari ge bok yo gato mewa ye gato onyar kem mo Yefun Yesus gato kem mo Efesus ma ku an.

¹⁸Yekwesu bok ne ma sa, Paulus ki nai án ki do, “Kadit kam ketke gato ji ma kem si nin mo bur Asia, nin jam suk mwa ne sino gato ji ben ne.

¹⁹Nin jam do, ji ben ji bi Yekwesu bi suk-i sor, ji yo bes ji nggwa kok nde, ji wo wa nin sor. Ye Yahudi ben sukye wa ji ndo nde, ye Yahudi mone da meret os wa gu ji kwop wé wam bok yo, sarewo ji ben suk gato ji bi Yekwesu ki ne sor.

²⁰Nin jam do, ji duno nin su sukduno gato ós nin mo suk mwa neya, ji yo gurik sukduno wokgan yo dom nde. Ji yo misyar wa nde, wo ji duno nin mo yé mwa gwem, ji mubot nu ji duno nin dom.

²¹Ji duno nin ye Yahudi si nin yewis yi ne sino, subere nin kwet kadit os ibit, ete nin jammo Yefun Yesus. Ji duno nin, subere nin brek kadit os nyim, ete nin simo os be gato men bi Yekwesu Yesus Kristus kak ne, subere nin onyar kem mo Yefun Yesus it.

²²Re yo, Yefun Allah Gen syaugat ji mu mo kota Yerusalem. Sane ji mu, ji jam nde sukye gato bere yé ben nai ji mone nde.

²³Suk gato ji jam anato sukdu gato Yefun Allah Gen ki nai ji sare do, bere ji ku sukye, ete ye sok ji mo penjara mo kota mwa ne sino.

²⁴Sarewo ji yo bi sukjimnut subot ji dakai teker eta nde, wo ji nut mo suk gato Yefun Yesus syogat ji ben anato sye. Ji werwa ji ben suk gato men bi Yekwesu Yesus Kristus syogat ji ben ne, ji werwa ji ben wa pe sane sor, dakai or su. Yesus Kristus syogat ji mu ki sukdu subot os ndo gato Yesus Kristus kak wa men yetu nai nje jam. Kapre men yetu yo ben suk yo nyim wa An nde, Yefun Allah dakai bi sukjimnut sye kas subot men anato An fro os ndo wa men yi sor.

²⁵Suga nyim ne, ji mu ku nin sino, ji duno nin subot os ndo gato Yefun Allah fro wa men sok mo An bi rus-i nai nin jam it. Sarewo su re yo, ji jam do, bere ji yo ku nin o nde.

²⁶Sane, su kam re, ji ki rer wa nin jam do, nin ge dik yo do ges mo bot gesyos it yo, suk ne kadit ji nde, nin ki ji gum ibit mone nde,

²⁷we, ji anato kibot Yefun Allah bi sukdu-i ne or sino nai nin jam ré, ji yo misyar wa nde, ji yo gurik sukdu ne wokgan yo dom nde.

²⁸Nin mewa nin nggwa subere nin jom sukdu ne petok sor. Nin mewa ye gato onyar kem mo Yefun Yesus. Nin mewa yé gato Yefun Allah Gen bes nin gum yekwesu wa ne sor. Nin mewa yé gato gum sok mo Yefun Allah bi rus-i ne sisu ri-roi tepsu ye gato mewa suksi ne mewa bi suksi sisu ri-roi ne sor. Ye gato gum sok mo Yefun Allah bi rus-i, Yefun Yesus bi nggwa kwop wa, Yefun Yesus dé sye wa anato ye ne gum sok mo Yefun Allah bi nje-i, sane nin mewa sisu ndo sor.

²⁹Ji jam do, ji mu kadit nin yo, bere ye gato ben sukibit ma ben ye gato gum sok mo Yefun Allah bi rus-i ne ibit, tepsu ndar krok gu domba kwop, sane nin mewa sisu ndo sor.

³⁰Sane sor nde, wo kadit nin miten, bere yé bok yo bes án nggwa kok, ete ki Yefun Allah bi sukdu brek kadit sukdu gato sangge, subere án ben kidar ye gato onyar kem mo Yefun Yesus, subere ye ne misyar Yefun Yesus ete simo án.

³¹Sane nin mewa nin nggwa kadit sukye gato bere ma ne. Nin napawa suk mwa gato ji duno nin su ne. Ji wo, ji duno nin noru nombrak petok sor kom mo tahun gri it. Sane nin jom sukdu ne petok, nin mewa ye gato onyar kem mo Yefun Yesus sor.

³²Sane, ji syo nin mo Yefun Allah syim-i, bere An mewa nin tepsu sukdu gato An ki ne. Nin jammo An bi sukdu ne sa, bere sukdu ne ós nin onyar kem mo Yefun Yesus nggi wai o, ete bere An syo sukndo nai nin si yé mwa ne sino gato sok mo An bi rus-i ne.

³³Nin jam ji ré, ji gro sye wa ji nai ye yi bi sugum e, bi san e ne yo mo nde.

³⁴Wo nin dakai jam, ji dakai ben suk, ji ku sugum mó, ete ji so suk gato ji si ye gato simo ji ye mó.

³⁵Mo suk mwa gato ji ben ne, nin me ji sa, ji samok. Sane nin samok dom, subere men ós ye gato yo nggiwa ben suk nde. Sane men napawa suk gato men bi Yekwesu Yefun Yesus dakai ki ne sare do, ‘Men syo suk nai ye yi anato ben men mit at wa wai kadit men ku suk kadit ye yi.’ ”

³⁶Paulus ki sukdu ne or sa, Paulus si yekwesu bok ne tu umsu, án ki suk su Yefun sino.

³⁷Yekwesu bok ne but Paulus e, án baput mo Paulus, án wo.

³⁸Sukdu gato ben án jimnotbot Paulus ndo nde, anato Paulus bi sukdu do, án yo ku Paulus gro o nde. Orete yekwesu bok ne top Paulus mu kwem.