Read Abun Sukdu Subot Yerasul 21 Bible Online

Sukdu Subot Yerasul 21 - Abun bible

Sukdu Subot Yerasul 21

¹Men ki ndo mo yekwesu bok ne, orge men mu it mo kwem kadit án, ete men mu mo ef Kos. Bi ik, ete men mu mo ef Rodos. Kadit ne, men mu mo ef Patara.

²Mone men ku kwem dik yo o gato mu mo bur Fenisia. Sane men it mo kwem ne. Men bi win, wade

³men me ef Siprus tak men de syim ge, men wai kadit. Men bi win sor mu kom mo bur Siria. Men is mo kota Tirus mo bur ne, we mone ye ndau suk kadit kwem ne.

⁴Mo kota Tirus men ku yé gato onyar kem mo Yefun Yesus sa, men si án kem mone kom mo kam mufit rek. Yefun Allah Gen kadum sukjimnut nai án, anato án duno Paulus subere Paulus mu mo Yerusalem nde

⁵Sarewo kom mo kam gato men fro ne, men mu kadit án ré. Yé gato onyar kem mo Yefun Yesus si bi nggon si bi pa sino top men mo kota de nden kom mo sem de. Mo sem de men tu men umsu, men ki suk su Yefun.

⁶Men wat yu mone, orge men it mo kwem, ete án satu mo án bi nu-i.

⁷Men simo kwem ne men mu kadit kota Tirus, men mu men is mo kota Ptolemais. Mone men ku yé gato onyar kem mo Yefun Yesus. Men si án nuk sukdu kom mo kam dik rek.

⁸Bi ik, ete men it mo kwem ne o, men mu men is mo kota Kaisarea. Mone men ku yetu ge dik yo gato mu ki sukdu subot Yesus Kristus nai nje. An gum do Filipus. Men si an kem mo an bi nu. An anato yetu ge dik yo kadit yetu ge mufit gato yé bes mo Yerusalem wa mu ki sukdu subot Yesus Kristus.

⁹Filipus bi pa donggon ge at gato kra nde tó. Pa donggon ne yenabi gato gwat Yefun Allah bi suktaru ma ki nai men yetu jam.

¹⁰Men kem mone kam bok yo, orete yenabi ge dik yo gato gum do Agabus ma kadit bur Yudea.

¹¹Agabus ma ku men, orete yenggras ne nai san det gato Paulus kin mo Paulus onke. Agabus nai san det ne, an rai an syim su, an rai an gwes su, orete an ki do, “Yefun Allah Gen ki do, ‘Sare, bere ye Yahudi rai ye gato bi san det re, ete syo ye ne mo yewis yi syim-i.’ ”

¹²Men jam sukdu ne sa, men si ye gato mone, men wergat Paulus, subere an yo mu mo Yerusalem nde.

¹³Sarewo Paulus ki do, “Nin wo, nin wergat ji, nin ben ji kwabom kro sare nde. Ji ben ji bi Yekwesu Yefun Yesus bi suk-i, sane ji fro wa ji ku sukye mone sor nde, wo ji fro wa ji kwop wa Yefun Yesus mo Yerusalem dom.”

¹⁴Men wergat Paulus sane ware, men me do, an nai sukjimnut krat mone it, sane men wergat an o nde, men misyar ré, ete men ki do, “Sa ndo sa, suk gato Yefun Allah imo bere bor sor.”

¹⁵Men kem mone kam bok yo, orge men fro men bi suk, ete men mu mo Yerusalem.

¹⁶Ye gato onyar kem mo Yefun Yesus ge bok yo gato kem mo kota Kaisarea si men mu mo Yerusalem sino. Yé bok ne top men mo Manason bi nu mo Yerusalem. Men kem mo nu ne. (Manason, an ye ef Siprus. An onyar kem mo Yefun Yesus nam it.)

¹⁷Men mu kom mo Yerusalem sa, ye gato onyar kem mo Yefun Yesus mone kak án mit wa men.

¹⁸Bi ik, ete Paulus si men sino mu ku Yakobus. Yekwesu mo nu ari mwa ne sino sum su men mone dom.

¹⁹Paulus ki ndo mo yé ne, orge Paulus ki subot tomgato an mu ben Yefun Allah bi suk-i mo yewis yu bi bur-i, an ki subot suk mwa gato Yefun Allah ben su yewis yio neya mone. Paulus ki subot suk mwa ne kom mo mit ré.

²⁰Yakobus si yekwesu mwa ne jam sukdu ne sa, án un Yefun Allah. Orge án ki nai Paulus do, “Men bi nji, nan jam do ye Yahudi ribu bok yo onyar kem mo Yefun Yesus it. Án sino werwa benbot Musa bi sukduno ne petok sor.

²¹Ye deyo ki nai yé ne jam do, nan anato duno ye Yahudi gato kem mo yewis yi miten, subere án misyar Musa bi sukduno-i. Yé ki do, nan duno ye Yahudi gane, subere án yo bisunat án bi pa nde. Yé ki do, nan duno án subere án misyar ye Yahudi bi sukduno-i ré.

²²Sane ye Yahudi gato onyar kem mo Yefun Yesus mo kota Yerusalem jam nan ma more yo, bere án maskwa nan mo suk gato nan duno nje su ne. Sane men ben suma ne?

²³Men ki sare do, sa ndo sa, nan si yetu ge at more gato tom suk yo su Yefun Allah ré.

²⁴Nan si ye ka at re mu simo ye Yahudi bi sukduno-i subere nin yo fowa sok mo Yefun Allah bi nu o nde. Nan bi sugum wa ye kwok ye ka at re sugo ne wé. Nan ben sane, subere ye Yahudi more jam do nan dakai benbot Musa bi sukduno-i ne tó. Sane bere yé jam do, sukdu subot nan gato yé ki do, nan duno ye Yahudi misyar Musa bi sukduno-i ne, yé kidar kaii.

²⁵Yewis yi gato onyar kem mo Yefun Yesus men kibot or ré. Men krom surat wa án sare do, sugit gato ye som sukdaret bok neya su ne, án git nde; án git suge dé nde; án git suge ku gato i-dé mó tó ne nde; án sino, yebris si nggon ben siri su yu daret nde.”

²⁶Sane bi ik, ete Paulus si ye ka at ne sino mu simo ye Yahudi bi sukduno-i subere án sino yo fowa sok mo Yefun Allah bi nu o nde. Orge Paulus mu mo Yefun Allah bi nu, subere an ki nai yekwesu mone bi kam gato bere an si ye ka at ne bi upacara ne or su. An ka at bi upacara ne orete yo, bere Paulus gwat suksom ma, ete syo wa an si ye ka at ne som Yefun Allah su.

²⁷Kam mufit rek gato Paulus tom su yekwesu ne karowa or, ete ye Yahudi ge bok yo kadit bur Asia ku Paulus mo Yefun Allah bi nu. Ye Yahudi bok ne krokgat yé mwa mone subere yé mwa ne on sa ket Paulus, ete yé but an.

²⁸Yé but an sa, yé saiye do, “Nin ye Yahudi, nin sino ós men syun ye re et. Ye re anato duno yetu mo bur re sino, subere nje misyar men su men bi sukduno-i, an duno nje subere nje misyar nu gato Yefun Allah bes wa men re. Sane dom an gwat yewis yi ma sok mo Yefun Allah bi nu-i, an ben nu gato Yefun bes wa men re ibit su yewis yi gato an gwat ma ne.”

²⁹(Ye ki sukdu sane, we gabere ye me Paulus si Trofimus, yewis yi ge dik yo kadit kota Efesus. An we mubot kota sino, ete ye gendo, Paulus si ye ne sok mo Yefun Allah bi nu-i, sarewo ye ne yo si Paulus mone nde.)

³⁰Yé mwa mone saiye daret, anato yé kas ma kadit pe mwa ne sino, yé mwa ma si nje saiye daret mone. Yé but Paulus. Yé tik an bot bur kadit Yefun Allah bi nu mu nden, orete yé syimwa nusyo wari.

³¹Yé werwa gu Paulus kwop saresa, ye yi yo mu ki napyo nai ye Roma bi yesukmise bi padosye jam. Ye ki nai yesukmise ne do, yé mwa mo kota ne saiye daret, ete yé maskwa yu daret.

³²Sugane it, padosye ne kendo yesukmise ge bok yo si bi yekwesu ge bok yo si an kas mu mo pe gato yé mwa sum mone. Yé mwa ne do me yesukmise si bi padosye ne ma sa, yé yo gu Paulus o nde.

³³Yesukmise bi padosye ne ma but Paulus. An syaugat ye rai Paulus su rantai koi we. Orge an ndobot nje mone do, “Ye gare gum sa u ne? Ye gare ben suk sato suma anato nin gu an ne?”

³⁴Ye deyo saiye suk yo, ye deyo o saiye suk yo o ware, padosye jam nde sukdu gato sangge. Sane, an syaugat yesukmise ge bok yo gwat Paulus mu mo yesukmise bi nu-i.

³⁵Paulus mu kom mo yesukmise bi nu bi jip sa, yé mwa ne werwa gu Paulus nggi teker sane wade, yesukmise bes Paulus sam an kadit yé mwa ne.

³⁶Yé mwa gato boribot Paulus saiye gat do, “Nin gu an kwop wé se!”

³⁷Yesukmise yo gwat Paulus sok mo nu mit nde tó, Paulus ki nai padosye su a Yunani do, “Yenggras, ji ndekwa ji ki sukdu wokgan su nan et.” Padosye ne ki do, “Suma ben anato nan jam nan ki suk su a Yunani ne?

³⁸Sane nan anato ye Mesir gato suga nyim tepsu yekwesu wa yetu ka ribu at gato futma wa gu ye Roma gato jom bur re, ete mu kem mo pe gato kwe yo kom mo nde ne, bado?”

³⁹Paulus ki do, “Ji nde. Ji anato ye Yahudi, ji bi nat-i mo kota Tarsus, kota gato gum kok mo bur Kilikia. Yenggras, ji kiwa nan bi os wa ji ki suk su yé mwa re et.”

⁴⁰Padosye ne bi os wa Paulus ki suk su yé mwa ne, orete Paulus ti mo jip, an bes an syim subere yé mwa ne not. Yé mwa ne not, orete an ki nai yé mwa ne su ye Yahudi bi a, gato ye kendo do a Ibrani sare do,