Read Abun Sukdu Subot Yerasul 23 Bible Online

Sukdu Subot Yerasul 23 - Abun bible

Sukdu Subot Yerasul 23

¹Paulus sokwa yepasye bok ne, an ki do, “Ji bi nji, kadit ketke sor kom mo kam re, ji ben Yefun Allah bi suk-i sisu ji mit dik, ji mit kem pe mo Yefun Allah, ji yo brek kadit An wokgan yo dom nde.”

²Sane yekwesu gato gum kok wai mo Yefun Allah bi nu ne syogat ye gato ti karowa Paulus gwa Paulus mo an syokwet.

³Orge Paulus ki nai yekwesu ne do, “Bere Yefun Allah gwa nan ré. Nan ben nan nggwa tepsu ye gato ben Yefun Allah bi suk-i, sarewo nan mit-i tara ré. Nan kem mone, nan ndobot ji, sawe ji ben suk yo siri kadit Musa bi sukduno-i, sarewo nan syogat ye gwa ji, sane nan dakai ben suk siri kadit Musa bi sukduno-i ne it.”

⁴Ye gato ti karowa Paulus ki do, “Nan kabor yekwesu gato gum kok wai mo Yefun Allah bi nu sane nde.”

⁵Sane Paulus ki do, “Ji bi nji, ji jam nde yekwesu gato gum kok wai mo Yefun Allah bi nu anare. Ji ki sa gado ne siri ré, we Musa bi sukduno duwe do, ‘Men ki sukibit ket men bi yekwesu nde.’ ”

⁶Paulus jam do yepasye mone deyo ye Farisi, deyo ye Saduki, sane an ki nai yepasye bok ne sino do, “Ji bi nji, ji anato sok mo ye Farisi. Ji bi ai ye Farisi dom. Ye gwat ji ma more wa ndobot ji mo sukduno dik yo gato ji kwabom kam mo, sare do, ye gato kwop, bere Yefun Allah sun kadit sukkwop ré.”

⁷Paulus ki sane, orge ye Farisi si ye Saduki duwer yu mo sukduno ne it anane. Yepasye mone wat i-we, yé duwer yu mo sukduno ne.

⁸(Ye Saduki duno nje do, Yefun Allah yo sun nje kadit sukkwop nde. Ye Saduki duno nje o do, malaikat yo mo nde. Ye Saduki duno nje o do, suk sato aboksye e, yerom e ne yo mo nde. Sarewo ye Farisi duno nje do, Yefun Allah sa, sun nje kadit sukkwop Ye Farisi duno nje o do, malaikat e, suk sato aboksye e, yerom e ne mó.)

⁹Yepasye bok ne saiye ket yu, ete yeguru agama ge bok yo gato sok mo ye Farisi. Án ti án duwer ye Saduki mone nggi sare do, “Men nut do ye gare yo ben sukibit yo mo nde. Malaikat e, aboksye e ne do ki suk su an yo, sukibit anane nde.”

¹⁰Ye duwer yu nggi, nggi, nggi wade, yesukmise bi padosye nyuwa, sawe bere ye gwa Paulus kete mone or ré. Sane padosye ne syogat yesukmise mu nai Paulus wé kadit yepasye ne, ete gwat an mu mo yesukmise bi nu-i.

¹¹Ik bi noru, Yefun Yesus ma ti karowa Paulus, an ki do, “Nan nyu nde! Sukdu gato nan ki subot Ji nai nje mo Yerusalem jam, bere nan waii ki nai nje mo kota Roma ne jam dom.”

¹²Bi ik nyotkwo ye Yahudi ge bok yo sum tepsu yeko wa gu Paulus wé. Yeko ne tom su Yefun Allah do, “Men git sugit nde, men da syur dom nde sor, men gu Paulus kwop wé or et.”

¹³Yeko ne anato tepsu yetu ge musyu at wai ré.

¹⁴Yeko mu ki nai yekwesú mo Yefun Allah bi nu si ye Yahudi bi yepasye do, “Men tom su Yefun Allah do, men yo git sugit nde sor, men gu Paulus kwop wé or et.

¹⁵Sane yo, nin si yepasye si yekwesu gato sum wa kibot sukdu ne mu ndek mo yesukmise bi padosye ne do, padosye ne top Paulus ma wa nin ndobot an o et. Nin ben sato nin iwa jam subot suk gato Paulus ki ne rer kom mo mit o et. Sane men eswa an mo os mit sor, an yo kom more nde tó, men gu an kwop wé ré.”

¹⁶Sarewo Paulus bi nyanggon bi payebris jam os gato yeko fro ne sa, an mu mo yesukmise bi nu, an ki napyo nai Paulus jam.

¹⁷Orge Paulus kendo ye Roma bi yesukmise bi yesu ge dik yo ma, ete an ki nai yesukmise ne do, “Pa re bi sukdu wa ye Roma bi yesukmise bi padosye jam, sane nan top pa mu mo padosye ne et.”

¹⁸Sane yesu ne gwat pa ne mu mo yesukmise bi padosye. Yesu ne ki nai padosye ne do, “Paulus gato men but ne, an kendo ji, ete an ndekwa ji top pa re ma mo nan, we pa bi sukdu gato pa iwa ki nai nan jam.”

¹⁹Yesukmise bi padosye jom pa ne syim, an si pa mu mo pe gato ko kadit yé bok gato mone, or an ki nai pa ne do, “Nan ki nan bi sukdu-i nai ji jam et.”

²⁰Pa ne ki do, “Ye Yahudi tom yu wa án ma ndek nan do, ik, ete nan top Paulus mu mo ye Yahudi bi yepasye si yekwesu gato sum sino wa kibot sukdu, subere án ndobot Paulus satu o, subere án jam subot sukdu gato Paulus ki ne rer kom mo mit o et. Ye kidar ko ne.

²¹Sane nan top Paulus nde, we án tepsu yeko ge musyu at eswa Paulus mo os mit wa án gu kwop wé. Yeko ne tom su Yefun Allah do, án git nde, án da syur nde sor, án gu Paulus kwop wé or et. Yeko ne fro os ne or ré. Án kem kret sukdu kadit nan sor.”

²²Padosye ki suknapa wa pa ne do, “Nan frot sukdu gato nan ki nai ji re nai ye yi nde.” Orge padosye syogat pa ne mu.

²³Orge padosye ne kendo ye Roma bi yesukmise bi yesu ge we yo ma. An ki nai ye we ne do, “Nin ka we fro yesukmise ge wotin we, si yesukmise ge musyu mufit gato it mo kuda, si yesukmise ge wotin we gato gwat yor, subere noru, jam musi, nin yé bok ne sino mu mo Kaisarea.

²⁴Nin ka we fro kuda dik yo wa Paulus it mo, subere nin sino top an mu mo yenggras Gubernur Feliks sisu ndo.”

²⁵Orete padosye ne krom surat wa Gubernur Feliks sare do,

²⁶“Surat re ji krom wa nan yenggras yepasye Gubernur Feliks. Ndo mo nan, kadit Klaudias Lisias.

²⁷Ye gato ji top mo nan re, ye Yahudi but, ete bergan gu an kwop wé, sarewo ji si ji bi yesukmise ge bok yo mu nai an kadit, we ji jam do an gum sok mo ye Roma bi nje-i.

²⁸Ji iwa ji jam suk gato ye ndak an su, sane ji top an mu mo ye Yahudi bi yepasye si yekwesu gato sum wa kibot sukdu.

²⁹Ji me mone do, ye ndak an mo Musa bi sukduno-i, sarewo ye yo ndak an mo sukibit tepsu men ye Roma bi sukduno-i yo mo nde. An yo ben suk yo siri kadit men bi sukduno-i tepsu men gu an kwop mo nde, an ben suk yo siri tepsu men rai an mo penjara dom nde.

³⁰Ji jam yé sum yeko wa gu an wé sa, ji syogat yé top an mu ku nan it anane. Sane dom, ji syogat ye gato ndak an waii mu ki an bi sukdu-i nai nan jam et.”

³¹Sane yesukmise bi yesu ge we ne ben suk gato padosye ki ne. An we gwat Paulus su noru ne mu kom mo kota Antipatris.

³²Bi ik, ete yesukmise gato it mo kuda gwat Paulus mu kom mo Kaisarea, wo yesukmise yi ne satu mo bi nu.

³³Yesukmise mo kuda ne mu kom motu sa, án top Paulus, án syo surat ne nai yenggras Gubernur Feliks.

³⁴Yenggras Gubernur baca surat ne, or yenggras ndo do, “Ye re ma kadit bur u ne?” Ye ki do, “An ma kadit bur Kilikia.”

³⁵Orge yenggras Gubernur ki do, “Ye gato ndak nan ma kom more it yo, bere men kibot nan bi sukdu.” Orge yenggras syogat yesukmise mewa Paulus mo Herodes bi nu sye.