Read Abun Sukdu Subot Yerasul 26 Bible Online

Sukdu Subot Yerasul 26 - Abun bible

Sukdu Subot Yerasul 26

¹Orge yenggras Agripa ki nai Paulus do, “Re yo, nan ki sukdu gwawa nan dakai et.” Sane Paulus bes an syim, subere ye jam an ki suk it anane. An ki do,

²“Yenggras yeraja Agripa, kam re ne, ji mit iwa ji ti mo nan gwem gwawa ji dakai mo sukibit gato ye Yahudi ndak ji su ne.

³Ji mit iwa wai o ré, we nan jam men ye Yahudi bi sukduno-i si suk gato men ye Yahudi duwer yu mó. Sane yo, ji ndekwa nan syaretwa ji bi sukdu-i ne sino, nan misyar kwa wokgan yo dom nde.

⁴Ye Yahudi bok ne sino jam ji kadit ji ka yemsok sane sor kom mo ji ka yenggras re. Yé jam suk gato ji ben mo ji bi bur-i sor nde, wo yé jam suk mwa gato ji ben mo kota Yerusalem dom.

⁵Nam it, án jam ji. Nan ndobot án, án imo yo, bere án ki rer do, ji anato sok mo ye Farisi. Men ye Farisi anato ye Yahudi bi yetu ge bu dik yo gato simo Musa bi sukduno sisu men mit dik si men onyar dik, men brek kadit wokgan yo dom nde. Men jom sukduno ne krat wai kadit yé bu yi neya.

⁶Ji sok mo ye Farisi anato ji kwabom kam mo Yefun Allah do, bere An sun men kadit sukkwop tepsu An tom su men bi amui. Sane kadit ji kwabom kam mo Yefun Allah anato, su re, nin ndobot ji more.

⁷Suk gato Yefun Allah tom ne, men ye Yahudi yewis musyu dik sop we ne sino onyar kem mó, sane men werwa men ben Yefun Allah bi suk-i noru nombrak sor. Yenggras, ji kwabom kam mo suk gato Yefun Allah tom ne, sane anato ye Yahudi ki ji gum ibit mone.

⁸Suma ben anato yé nut do Yefun Allah yo nggiwa sun yetu kadit sukkwop nde ne?

⁹Ji dom, su ketke ji nut mo ji syidem do, ‘Ji ben sukye nai ye gato onyar kem mo Yefun Yesus, ye Nazaret ne. Ji werwa ji ben sukye nai án petok sor.’

¹⁰Ji ben sukye nai án mo Yerusalem. Ji ku surat kadit yekwesú mo Yefun Allah bi nu, subere ji ku suktinggi wa ji but ete sok yé gato onyar kem mo Yefun Yesus mo penjara. Yé gu ye gato onyar kem mo Yefun Yesus ge dik yo kwop wé sa, ji imo.

¹¹Wam bok yo ji mubot ye Yahudi bi nu ari wa ji ben sukye nai ye gato onyar kem mo Yefun Yesus. Ji wergat án subere án misyar Yefun Yesus, ete kiket Yefun Yesus gum ibit. Ji on sa ket án sane, wade ji mubot kota Yerusalem sor nde, wo ji mu om kota yi mo bur yi subere ji ben sukye nai án mone dom.”

¹²“Kam dik yo ji mu mo Damsyik. Yekwesú mo Yefun Allah bi nu krom surat gato ji gwat wa ji ku suktinggi wa ji ben sukye nai yé gato onyar kem mo Yefun Yesus gato kem mone.

¹³Kam yo mit, ji mubot os saresa, ji me sukru sye gato rer-rik kadit gu, sukru ne rer-rik ne rek nggi wai kadit kam. Sukru rer-rik ne rek wairi wa ji si yé gato si ji mubot os ne.

¹⁴Men sino ges gwa mo bur, ete ji jam yetu ge dik yo ki suk su a Ibrani, an ki do, ‘Saulus, Saulus, nan ben sukye nai Ji wa suma ne? Nan ben sukye nai Ji anato ri ma nan dakai ku sukye mo koirut sor.’

¹⁵Orge ji ki nai an do, ‘Yenggras, nan gum sa u ne?’ Yefun Yesus ki do, ‘Ji gum do Yesus. Nan ben sukye nai Ji.

¹⁶Re ne nan sun et. Ji kadum Ji nggwa nai nan wa Ji bes nan tepsu Ji bi pakwerut, Ji bes nan wa nan mu ki sukdu subot Ji nai nje jam. Nan ki sukdu gato nan me su nan gro si suk gato bere Ji kadum nai nan dom.

¹⁷Bere Ji nai nan kadit sukye gato nan dakai bi yewis-i si yewis yi neya ben nai nan. Ji syogat nan mu mo án sino,

¹⁸subere nan ki sukdu subot Ji kak án bi sukjimnut, subere án kwet kadit ndendu bi os-i ete brek ma simo os gato ndo ne sor. Ji syogat nan mu mo án, subere án misyar yerom e, aboksye e ne bi suktinggi-i ete brek ma jammo Yefun Allah bi suktinggi-i. Án onyar kem mo Ji, sane bere Yefun Allah ki do, sukibit gato án ben ne or kadit án, Yefun Allah yo nutbot o nde. Sane dom, án gum sok mo Yefun Allah bi rus-i.’ ”

¹⁹“Yefun Yesus ki sukdu ne nai ji kadit gu, sane yenggras yeraja Agripa, ji werwa ji benbot suk gato Yefun Yesus ki ne.

²⁰Sane ji mu ki sukdu subot Yefun Yesus. Su ketke ji ki sukdu ne mo ye Yahudi mo kota Damsyik, or ji mu ki sukdu ne mo kota Yerusalem o, orete ji mubot bur Yudea ne sino. Ji ki sukdu subot Yefun Yesus nai yewis yi dom. Ji ki sukdu sare do, ‘Nin kwet kadit sukibit gato nin ben ne. Nin brek kadit os ibit, ete nin simo Yefun Allah bi os-i gato ndo. Nin ki su nin syokwet sor nde, wo nin ben sukndo tepsu ye gato kwet, subere yé jam do, nin kwet it.’

²¹Ji kibot Yefun Yesus sane anato ye Yahudi but ji mo Yefun Allah bi nu de mo ros de mit ne, án werwa án gu ji kwop,

²²sarewo Yefun Allah ós ji kadit ketke sor kom mo kam re. Sane ji ti more, ji ki sukdu subot Yefun Yesus nai yepasye si pa wokgan ne sino jam. Sukdu gato ji ki re siri kadit yenabi bok ne si Musa bi sukdu-i nde, wo suk gato ji ki re anato tepsu suk gato yenabi si Musa ki do, bere bor ré. Ji ki ji bi sukdu-i sare do,

²³Kristus gato Yefun Allah tom su men bi amui do, An syogat ma mo bur re wa nai men yetu kadit sukye ete jowa men, Yefun Allah bi ma ré, ete yé ben sukye nai Kristus, yé gu An kwop wé. Orge Yefun Allah sun An kadit sukkwop ré. An anato ye gato sun su futmo ne. An kwop or, An sun o subere An kak os ndo wa An dakai bi yewis-i si yewis yi neya sino dom.”

²⁴Paulus ki bi sukdu-i saresa, Festus saiye do, “Paulus, semda ben nan it anare. Nan farkor mwa teker anato semda ben nan ko re go!”

²⁵Sarewo Paulus ki do, “Sane nde ré. Yenggras Festus, semda yo ben ji nde, wo suk gato ji ki re, sangge. Ji bi sukjimnut kas sisu ndo sor.

²⁶Yeraja Agripa sa, an jam subot suk gato ji ki re, sane ji ki ji bi sukdu-i ne rer, ji yo gurik kwa yo dom nde. Suk mwa gato yé ben nai Yefun Yesus, yeraja jam sino it, ji jamwa ré, we suk gato yé ben nai Yefun Yesus, yé ben mo bobor, yé mwa jam sino ré.”

²⁷Orge Paulus ki nai yeraja Agripa do, “Yenggras Agripa, nan onyar kem mo suk gato yenabi bok ne ki ne, bado? Ji jam do, nan sa, jammo yé bok ne bi sukdu-i ré.”

²⁸Orge Agripa ki nai Paulus do, “Nan nut do, nan werwa ki nan bi sukdu-i nai ji, bergan sor ete ji nai sukjimnut wa ji jammo Yefun Yesus tepsu ye Kristen it, bado?”

²⁹Paulus ki do, “Bergan yo o, ndo yo, nam o, ndo yo, wo ji ki suk su Yefun subere nan sor nde, wo yé bok ne sino gato jam suk gato ji ki su kam re nai sukjimnut wa án jammo Yefun Yesus tepsu ye Kristen. Ji iwa yé bok ne sino ye Kristen tepsu ji, wo ji bari yé rai án sino su rantai sato yé rai ji su ne.”

³⁰Kom mo rut, yenggras Agripa e, yenggras Gubernur Festus si Bernike si yé gato kem mone sino ti,

³¹or án sino mu kadit nu ne. Án sino mu saresa, án ki nai yu do, “Ye gare yo ben suk tepsu men syogat ye gu an kwop nde. An yo ben suk tepsu men sok an mo penjara dom nde.”

³²Orge Agripa ki nai Festus do, “Ye gare kiwa Kaisar kibot an bi sukdu-i ne, ondesor sa, nan sombok an wé sor.”