Read Abun Sukdu Subot Yerasul 27 Bible Online

Sukdu Subot Yerasul 27 - Abun bible

Sukdu Subot Yerasul 27

¹Yé nai sukjimnut do, Paulus mu mo bur Italia, sane men meret kwem yo wa men simo. Men ku kwem wa men simo sa, ye syo Paulus si yetu ge bok yo mo penjara ne mo ye Roma bi yesukmise bi yesu ge dik yo syim. Yesukmise ne gum do Yulius, an sok mo yeko gato ye kendo do, “Kaisar dakai bi Pasukan.”

²Men it mo kwem, gato ma kadit kota Adramitium. Ye fro kwem ne wa bere mubot sem de mo bur Asia. Men simo kwem ne mu kadit kota Kaisarea. Ye Makedonia ge dik yo gato gum do Aristarkhus, an ma kadit kota Tesalonika, an si men mo kwem ne.

³Bi ik, ete men mu kom mo kota Sidon. Men is mone. Yulius ben sukndo su Paulus, an misyar Paulus mu ku Paulus bi yesyim mone, subere yesyim ne ós Paulus mo suk gato Paulus ye mó.

⁴Orge me mu kadit Sidon, men it mo kwem ne o. Men muket ef Siprus sem de, we nobu kas nggi mo men gwem.

⁵Orge men mu ti o, men wai kadit bur Kilikia si bur Pamfilia, or men mu kom mo kota Mira mo bur Likia.

⁶Mo kota ne, yesukmise bi yesu ne ku kwem dik yo o gato ma kadit kota Aleksandria. Kwem ne mu mo bur Italia. Sane yesukmise syogat men simo kwem ne.

⁷Kam bok yo, kwem ne mu pare, men yo mu ndo nde sane sor, kom mo rut men karowa kota Knidus. Nobu kas nggi teker, sane men yo is mone nde, wo men mu mo ef Kreta. Men muket ef bot sem de, karowa bogwem Salmone.

⁸Men muket ef bot sem de, men yo mu sisu ndo nde. Men mu sor, men mu kom mo ré dik yo gato gum do Ré Ndo. Ré ne karowa kota Lasea.

⁹Men bi win pare bot sem ne sor kom mone. Sane ye Yahudi bi Kam Sye gato ye kendo do, “Men kem ndo su yu,” yé konwa or ré. Sane nobu kas nggi wai o ré. Men bi win sisu ndo o nde, we aina gato nobu ne kas it. Sane Paulus ki suknapa nai án sino do,

¹⁰“Ji bi nji, re yo, men bi win sisu ndo o nde. Men werwa men mu o yo, bere men ku sukye wai o ré. Bere suk mwa mo kwem ges or ré, bere kwem re ibit ré, bere men dakai kwop dom bayok.”

¹¹Sarewo yesukmise bi yesu ne yo jammo Paulus bi sukdu-i nde, wo an jammo ye gato gwat kwem si ye gato bi kwem ne.

¹²Ye me do, ré mone yo ndo wa nor kwem ne nde, sane yé bok ne kibot, or ye nai sukjimnut do, “Men bi win o mu kom mo kota Feniks et. Kom mone yo, men nor kwem wade aina gato nobu kas nggi ne or wé et.” Kota Feniks ne mo ef Kreta, ré mo kota Feniks ne ndo, we kwem sok kadit nim si ket sisu ndo sino.

¹³Nobu kas wokgan ma nden sa, yé nut do tep it anane, men mu sor. Sane yé tik jangkar, yé bi win mu sa u nim ket ef Kreta bot sem de.

¹⁴Yo nam nde ge, nobu nyot gato kas nggi wai o ré, gwat kwem ne. Ye kendo nobu ne gum do, ‘Nobu Nyot’ gato kas kadit nden ma ti.

¹⁵Nobu ne gwat kwem, yé mo kwem ne yo nggiwa gwat kwem bot sem de o nde. Sane án misyar nobu dakai gwat kwem sor.

¹⁶Men wai kadit ef wokgan gato gum do Kauda sa, nobu yo kas teker mone nde. Sane yé bes kwem wokgan gato an tik ne mo kwem sye mit. Yé bes kwem ne, sarewo nobu kas nggi anato sukye wa án bes kwem ne.

¹⁷Yé bes kwem wokgan mo kwem sye mit, orete yé far jamtu bot kwem subere kwem yo fot nde. Yé nyuwa sawe bere kwem yé mo yen karowa ef Sirtis, sane yé tik win ne wé, ete yé misyar nobu gwat kwem ne sor.

¹⁸Nobu krat gato kas nggi ne ben sem bak sye gwa men sor, bi ik, ete yé bare suk mwa mo kwem ne wé.

¹⁹Kam we rek, orete yé bare kwem bi suk-i yo mo sem dom, pa gato ben suk mo kwem ne dakai bare kwem bi suk-i mwa ne wé.

²⁰Kam bok yo, nobu krat ne gwa men gat sor, men yo ku kam, men yo ku bi dom nde. Men yo nggi o nde it. Men nut do men kwop sor, men yo mbau o nde, men eswa men kwop sor.

²¹Nam it, men sino mo kwem ne yo git sugit mo nde, orete Paulus ti mo men sino gwem, an ki do, “Ji bi nji, nin napa suk gato ji ki nai nin mo ef Kreta do, men mu kadit ef ne nde, sane sa, men yo ku sukye sare nde, men bi suk mwa yo ges nde.

²²Sarewo re yo, ji kiwa nin nyu o nde, we men sino bere mbau tó, wo kwem re sor, ete bere ibit.

²³Noru gado, Yefun Allah gato jom ji ne, Yefun Allah gato ji gum kwerut wa ne, An bi malaikat ge dik yo ma ti mo ji de.

²⁴Malaikat ne ki nai ji do, ‘Paulus, nan nyu nde. Bere, nan mu wa Kaisar ndobot nan mone tó. Yefun Allah dakai jimnotku nan, sane bere An nai nan si yé bok ne sino kadit sukye re. Bere yé mwa ne sino mbau ré.’

²⁵Sane, ji bi nji, nin nyu nde, we ji onyar kem mo Yefun Allah. Suk gato An ki ne bere bor ré.

²⁶Sarewo bere kwem re ibit mo ef dik yo mo sem de.”

²⁷Nobu gwat men subot Sem Adria ne sor kom mo kam musyu dik sop at rek. Or noru miten, ye gato gwat kwem ne nut do nobu gwat men mu karowa yen mo sem de it anane.

²⁸Sane án far jok su jamtu, án sa mo sem, subere án jam sem kru kom mo meter ot ne. Sem kru mone meter musyu at. Yo nam nde ge, án ben sane o. Sem kru mone meter musyu gri.

²⁹Án nyu sawe sem am kwem mo jok sa, sane án bare jangkar at kadit kwem mori, ete án ki suk su Yefun subere nombrak kekro.

³⁰Ye gato gwat kwem ne, án werwa án titi kadit kwem ne. Án is kwem wokgan, án kidar, án ki do, án mu bare jangkar deyo o kadit kwem su et.

³¹Orge Paulus ki nai ye Roma bi yesukmise bi yesu si bi pa yemsok ne do, “Yé bok gare yo si men mo kwem nde yo, men yo mbau o nde, bere men kwop sino.”

³²Sane ye gato gwat kwem yo mu nde tó, yesukmise ge bok yo sap jamtu gato ye far kwem wokgan su ne wé, san kwem wokgan ne ges mo sem kadit ré.

³³Karowa nombrak, Paulus syogat yé mwa ne sino mo kwem ne git sugit et. An ki do, “Kam musyu dik sop at rek nin kwabom kro, nin yo git sugit nde, wo

³⁴re yo, nin git subere nin kaim nggi, we bere men mbau sino, men kaim ibit wokgan yo dom nde.”

³⁵Paulus ki sane, orge an nai roti, an ki ndo mo Yefun Allah wa roti ne mo yé bok ne sino gwem. An syat roti ne wa an git.

³⁶Yé bok ne sino me Paulus ben sane anato án mit it, án sino waii git sugit dom.

³⁷Mo kwem ne men yetu ge wotin we musyu mufit sop mumat si mó.

³⁸Án git sugit, án sino on ge sa, án bare gandum napta ne sino mo sem, subere kwem ne ho.

³⁹Nyotkwo, ete ye gato gwat kwem ne me ef dik yo. Án jam nde ef ne, wo án me ré tu gato not si yen mone. An nai sukjimnut do, án gwat kwem ne mu mo ré ne, subere án werwa gwat kwem yé mo yen mone.

⁴⁰Án sap jamtu mo jangkar bok ne, jangkar ne dakai mbon mo sem. Án deyo sombok jamtu kadit suk gato ós án gwat kwem su ne wé. Án deyo tik win dik yo mo kwem su. Án mu nden.

⁴¹Sarewo kwem yo kom mo sem de nde tó, kwem ne yé mo yen mo sem de karowa nden. Kwem su yé mone, yo ram o nde. Kwem nyo sem nap gwa wade ibit or ré.

⁴²Yesukmise bok gato mo kwem ne nut mo án syidem do, án gu yé gato án gwat kadit penjara ne wé, án nokwa sawe yé ne de sem kom mo ef, ete titi.

⁴³Sarewo ye Roma bi yesukmise bi yesu iwa nai Paulus kadit bi yesukmise gu kwop nde, sane yesu ne duyawa yesukmise bok ne subere án yo gu ye gato án gwat kadit penjara ne kwop wé nde. Yesukmise bi yesu ne syogat yé gato jam de sem, subere án yak mo sem, ete de mu nden.

⁴⁴Yé gato jam nde de sem, yesu ne syogat nai kwemuk dik yo kadit kwem, ete de su mu nden. Sane yé bok ne sino mu kom mo sem de sisu ndo.