Read Abun Sukdu Subot Yerasul 3 Bible Online

Sukdu Subot Yerasul 3 - Abun bible

Sukdu Subot Yerasul 3

¹Kam dik yo, kam dek, jam gri, ete Petrus si Yohanes, an we mu mo Yefun Allah bi nu tepsu jam gato ye ki suk su Yefun mone.

²Yetu ge dik yo, ye ne gwes út kadit kam gato an bi im kem su an ne, yé sam ye gwes út ne ma. Ye grem an mo Yefun Allah bi nusyo dik yo gato ye kendo do, “Nusyo gato ndo.” Kamdik-kamdik yé grem ye gato gwes út mone, subere an ndek sugum mo yé gato sok mo nu mit ket nusyo ne.

³Petrus si Yohanes sok mo Yefun Allah bi nu, an we ket nusyo ne saresa, ye ne me an we, ye ne ndek sugum mo an we.

⁴Orge Petrus si Yohanes sokwa ye ne. Petrus ki do, “Nan sokwa men ka we et!”

⁵Sane, ye ne sokwa an we, an nut do, “Re yo, ye we re syo suk yo nai ji it anare.”

⁶Orge Petrus ki do, “Ji bi sugum yo mo nde, wo suk gato mó yo, bere ji syo nai nan. Yesus Kristus, ye Nazaret ne, syo suktinggi nai ji, sane ji waii syo suktinggi ne nai nan. Ji syo Yesus Kristus bi suktinggi nai nan it anare. Ji ki Yesus Kristus gum mo nan, sane nan ti, nan mu tom!”

⁷Petrus syimtok ye ne syim ge, Petrus bes ye ne ti. Petrus do bes ye ne ti sa, ye ne gwes kom mo an gwes tak we ne nggi it anane.

⁸Ye ne ti, an muya-muma. Orge an si ye we ngga mo Yefun Allah bi nu de mo ros de mit ne, an mu, an yak, an wi, an ambre an un Yefun Allah.

⁹Yé mwa mone sokwa ye ne mu, ete un Yefun Allah sa,

¹⁰yé mwa ne napakom ye ne do, ye gato kem ndek sugum mo nje mo Yefun Allah bi nusyo, gato ye kendo do, “Nusyo gato ndo.” Yé mwa ne sokwa ye ne mu ete un Yefun sa, yé mwa ne nutbot ndo nde. Yé mwa ne yeket ete ki nai yu do, “Bei! Suma anato ben ye re ge sare ne?” Yé mwa ne jam nde suk gato ben an ge ne ware.

¹¹Ye gane sisu Petrus si Yohanes petok sor. Yé mwa mo Yefun Allah bi nu mit ne yeket. Yé mwa ne kas ma ku an ka gri mo pe gato ye kendo do, “Salomo bi Nusyari.”

¹²Petrus me yé mwa ne kas ma, sane Petrus ki nai yé mwa ne do, “Ji bi nji, ji bi nyanggon, ye Israel, nin yeket suk gare wa suma ne? Nin sokwa men ka we gat wa suma ne? Nin nut do, men ka we anato nggiwa ben ye gato gwes út re ge, bado? Sane nde. Nin nut do, men ka we ben suk tepsu Yefun Allah mit anato ye re ge, bado? Sane nde.

¹³Yefun Allah gato jom Abraham, Isak si Yakub, Yefun Allah gato jom men bi amui, Yefun Allah ne bes Yefun Yesus gato An bi pakwerut ne gum kok sye wai o ré. Yefun Yesus nin syo mo ye gato ben sukibit syim wa ye gu An kwop wé. Kapre Pilatus iwa sombok An, nin misyar An ré.

¹⁴Nin misyar Yefun Yesus gato ben suk tepsu Yefun Allah mit. Nin misyar yé gu Yefun Yesus gato ben Yefun Allah bi suk-i sor, wo nin ndekwa Pilatus sombok ye gato gu yetu bok yo kwop ne wé.

¹⁵Sane nin dom si nje tepsu dik wa gu Yefun Yesus kwop wé anane. Nin gu Yefun Yesus gato ós men yetu kem ndo ne. Sarewo Yefun Allah sun Yefun Yesus kadit sukkwop o ré. Men dakai me su men gro it.

¹⁶Ye gato gwes út re, nin ku, nin jam an ré. Ye re ge satu, an gwes nggi satu it. Suk gato ben an ge ne anato an onyar kem mo Yefun Yesus si Yefun Yesus bi suktinggi-i. Sangge, kadit an onyar kem mo Yefun Yesus, ye re ge it. Nin dakai me su nin gro it.

¹⁷Ji bi nji, ji bi nyanggon, ji jam do, nin si nin bi yekwesu yo jam suk gato nin ben kom mo pe yo nde anato nin ben sukye nai Yefun Yesus,

¹⁸wo suk gato nin ben ne bor tepsu suktaru gato Yefun Allah tarubot yenabi suga nyim tuya sare do, “Yekwesu gato ye kendo do Kristus, gato Yefun Allah syogat ma mo bur re wa nai men yetu wé kadit sukye ete jowa men, Kristus ne bere ku sukye.” Nin anato ben sukye ne nai Yefun Yesus tepsu sukdu gato Yefun Allah tarubot yenabi ne ré.

¹⁹Sane nin kwet, nin brek kadit os ibit, ete nin jammo Yefun Allah et. Nin kwet subere Yefun Allah yo maskwa nin mo sukibit gato nin ben ne o nde, wo ben sato Yefun rus sukibit gato nin ben ne wé ré.

²⁰Nin kwet subere Yefun Allah ben nin nggiwa ben An bi suk-i sisu nin mit dik. Nin kwet subere Yefun Allah bi Yesus Kristus ba ku nin, we Yefun Allah bes Yesus Kristus wa nai nin wé kadit sukye, ete jowa nin.

²¹Yesus Kristus kem mo gu sane sor, Yefun Allah ben suk mwa ne be or, eteyo Yesus Kristus ma o, tepsu sukdu gato Yefun Allah tom su men suga nyim tuya. Sukdu ne An tarubot yenabi gato ben An bi suk-i sor.

²²Yenabi dik yo gato gum do Musa, ki subot Yefun Yesus sare do, ‘Yefun Allah bere bes Yenabi ge dik yo gato yewis dik su men, tepsu Yefun Allah bes ji. Suk mwa gato An ki ne nin jamwa pe, nin benbot.

²³Ye gato yo jammo Yenabi ne nde yo, ye ne yo sok mo Yefun Allah bi rus-i nde, an kwop kadit ré.’

²⁴Musa ki sane sor nde, wo yenabi ne sino kadit yenabi Samuel sor, kom mo yenabi yi neya, án sino frot is men do, bere Yefun Allah bes Yenabi ge dik yo.

²⁵Suk gato Yefun Allah tom su men bi amui, An tarubot yenabi ne wa men sino. Yefun Allah ki nai Abraham, men bi amui, do, ‘Nan bi Pa-i ge dik yo, bere kak os ndo wa yé mwa ne sino mo bur re iwedewe.’

²⁶Sane Yefun Allah bes Yefun Yesus tepsu pakwerut wa ben Yefun Allah bi suk-i. Yefun Allah syogat Yefun Yesus ba kun nin nyim, subere Yefun Yesus ben sukndo su nin. Yefun Yesus ben sukndo sun nin anato An ós nin brek kadit os ibit.”