Read Abun Sukdu Subot Yerasul 4 Bible Online

Sukdu Subot Yerasul 4 - Abun bible

Sukdu Subot Yerasul 4

¹Petrus si Yohanes nuk sukdu su yé mwa mone saresa, yekwesu ge bok yo mo Yefun Allah bi nu si padosye gato mewa Yefun Allah bi nu si ye Saduki ge bok yo ba ku an we mone.

²Yé bok ne maskwa, we án jam do, Petrus si Yohanes ki nai yé mwa mone do, Yefun Allah sun Yefun Yesus kadit sukkwop, sane bere Yefun Allah waii sun ye yi kadit sukkwop dom.

³Sane yé bok ne but an we. Noru it, sane yé bok ne sok an we mo penjara wade ik.

⁴Yé bok ne but an we, ete sok an we mo penjara, sarewo yé mwa gato jammo an we bi sukdu-i ne nai sukjimnut dik do, sukdu ne sangge, án brek kadit os nyim bi sukdu-i, ete án simo os be gato Yefun Yesus kak ne, án onyar kem mo Yefun Yesus it. Sane ye gato nai sukjimnut wa án simo os be gato Yefun Yesus kak ne sok tó doga nyim ne, ye newa nje mone kom mo yetu ge ribu mumek sino ré.

⁵Ik o, ye Yahudi bi yekwesu, ye Yahudi bi yepasye si yeguru agama ne sino sum mo Yerusalem.

⁶Yekwesu gato gum kok wai mo Yefun Allah bi nu gato gum do Hanas si nje sum mone sino. Hanas bi rus si nje sum sino dom. Deyo gum do, Kayafas e, Yohanes si Aleksander.

⁷Yé mu kar Petrus si Yohanes ma, or yepasye gato sum ndobot an we do, “Suma ben to nin ka we nggiwa ben ye gato gwes út ne ge ne? Je u ana syo suktinggi nai nin ka we ne?”

⁸Sugane Yefun Allah Gen pet mo Petrus, ete Petrus ki do, “Nin, ye Yahudi bi yekwesu si yepasye ne sino,

⁹su kam re, nin gwat men ka we ma more wa nin ndobot men ka we mo sukndo gato men ka we ben wa ós ye gato gwes út ne. Nin iwa nin jam suk gato ben ye ne ge e?

¹⁰Saneyo, men ka we ki rer wa nin si ye Israel ne sino jam. Yesus Kristus bi suktinggi anato ben ye gato ti mo men gwem re ge ré. Yesus Kristus anato ye Nazaret gato nin gu kwop mo kwesukwin, wo Yefun Allah sun An kadit sukkwop o ré.

¹¹Sane yé krombot Yesus Kristus anato tepsu Jok mo Yefun Allah bi sukdu sare do, ‘Jok gato ye nggo nu su ne, su ketke nin yé gato nggo nu ne bariwa, nin nut do ibit ré, wo ri ma sa, nin nai Jok ne tepsu Jok gato ndo wai wa yé nggo nu ne su o ré.’

¹²Yefun Yesus ka dik sor anato kak os ndo wa nai men wé kadit bot gesyos, subere men kem ndo to kapyo mato kapyo. Yetu yi yo mo nde, kadit yetu mwa ne sino, Yefun Yesus An ka dik sor anato nggiwa kak os ndo wa men kem gesyos.”

¹³Yepasye mwa gato sum mone, án yeket Petrus si Yohanes mo suk gato an we ki ne. An we ki an we bi sukdu-i ne, an we yo nyu nde, an we yo nokwa nde, an we ti an we ki sor. Sarewo an we yo sok mo nu farkor sye nde, an we yo ku gum mo nde. Yepasye ne yeket an we mone. Yepasye jam do an we ye gato si Yefun Yesus mu sino.

¹⁴Ye gato gwes út ne sisu an we ti mone dom, sane yepasye ne yo ki suk yo o nde.

¹⁵Yepasye ne syogat an we mu mo nden yei, wade án kibot or et.

¹⁶Yepasye ne ndobot yu do, “Yé mwa gato kem mo Yerusalem yeket suk gato an we ben ne wai o ré. Men yo bi os wa rewa suk ne nde. Sane men ben suma su ye we re ne?

¹⁷Saneyo, men syaugat an we do, an we ki sukdu subot Yefun Yesus o nde, wokgan yo dom nde, subere sukdu subot Yefun Yesus yo frekbot nje o nde.”

¹⁸Yepasye kibot or ré, yé kendo an we ma. Yepasye ne ki nai an we do, “Nin ka we ki sukdu subot Yefun Yesus o nde, wokgan yo dom nde. Nin ka we duno nje su Yefun Yesus bi sukduno-i o nde, wokgan yo dom nde.”

¹⁹Yepasye ne ki sane or sa, Petrus si Yohanes ki do, “Yenggras, nin dakai nut subot suk gato ndo wa men ben ne. Kwa u anato tepsu Yefun Allah mit ne, men jammo nin bi sukdu-i anato ndo bado, men jammo Yefun Allah bi sukdu-i anato ndo e?

²⁰Nin dakai nut subot suk gato ndo wa men ben ne, we men ka we nut do, suk gato men ka we me su men gro si suk gato men ka we jam su men dabe, bere men ka we kibot nai ye yi jam gat sor, men ka we yo not nde.”

²¹Yepasye ne yo ku os nde, sane án syaugat ye we ne ki subot sukdu ne o nde ware, án sombok Petrus si Yohanes wé, we án jam do yé mwa un Yefun Allah mo suk gato Petrus si Yohanes ben su ye gato út ne.

²²Ye gato an we ben ge su Yesus Kristus bi suktinggi-i ne, ye ne kaim sa wai kadit tahun musyu at.

²³Yepasye ne sombok Petrus si Yohanes or, an we satu mu ku an we bi yesyim mwa gato onyar kem mo Yefun Yesus. An we ku yé mwa ne, an we ki do, “Yekwesú mo Yefun Allah bi nu si ye Yahudi bi yepasye, án syaugat men ka we do, men ka we ki sukdu subot Yefun Yesus o nde, wokgan yo dom nde.”

²⁴Yé mwa mone jam sukdu ne, orge án sino ki suk su Yefun tepsu dik, án ki nai Yefun Allah do, “Yenggras gato gum sye kok tepsu men bi Yekwesu. Nan anato ut gu nim ne. Nan anato ut bur re. Nan anato ut sem si suk mwa gato kem mo pe mwa ne sino.

²⁵Nan bok Nan Gen mo men bi amui bi yepasye gato gum do Daud, gato gum pakwerut wa Nan. Nan ki sukdu subot nje gato bere misyar Yefun Yesus. Nan taru sukdu ne subot Daud, ete Daud waii krom wa men sare do, ‘Suma ben to ye gato jam nde Yefun maskwa ndo nde ne? Yé fro os wa gu Yefun kwop wé ware, ye yo ku os nde.

²⁶Yepasye yeraja mo bur re sisu yekwesu bok ne sino sum wa gu men bi Yekwesu. Án sum wa gu men bi Yekwesu gato Yefun Allah syogat ma mo bur re wa nai men yetu kadit sukye ete jowa men.’

²⁷Suk gato Daud krom ne sangge, we yeraja Herodes si Gubernur Pontius Pilatus si yewis gato ye Yahudi nde si ye Yahudi mo kota re sum sino. Yé bok ne fro os wa gu Yefun Yesus kwop wé. Yé bok ne fro os wa gu Nan bi pakwerut gato Nan bes wa ben Nan bi suk-i sor. Yé bok ne fro os wa gu Yefun Yesus gato Nan syogat ma mo bur re wa nai men yetu kadit sukye ete jowa men.

²⁸Yé bok ne sum sino fro os wa gu Yefun Yesus kwop wé. Yé bok ne yo nggi wai kadit Nan bi suktinggi nde, yé bok ne gu An tepsu pe gato Nan imo, tepsu pe gato Nan dakai fro suga nyim tuya.

²⁹Re yo, Yefun, men bi Yekwesu, Nan me yé bok ne syaugat men ki sukdu subot Yefun Yesus o nde, sane Nan ben men yé gato ben Nan bi suk-i, Nan ben men nggiwa men ki Nan bi sukdu subot Yefun Yesus nai yé mwa jam, men yo nyuwa wokgan yo dom nde.

³⁰Sane dom, Nan ben men nggiwa men ki Yefun Yesus gum mo ye gato i, subere ye ne ge. Nan ben men nggiwa men ki Yefun Yesus gum mo suk mwa neya subere kadum Nan bi suktinggi ne bor, subere yé mwa ne sino yeket ete nutbot ndo nde, wade yé jam do, suk ne ma kadit Yefun Yesus, Nan bi pakwerut gato Nan bes wa ben Nan bi suk-i.”

³¹Án sino ki suk su Yefun Allah, orge nat gato án sum mone gwi. Yefun Allah Gen bok nggwa mo án sino. Án sino mu, án ki Yefun Allah bi sukdu subot Yefun Yesus, án yo nyuwa nde.

³²Ye gato onyar kem mo Yefun Yesus ne sino, án tepsu dik. Kadik-kadik ki do, ji yo bi suk-i are nde, wo men yé mwa re bi suk-i anare. Án nut do kadik-kadik bi suk o nde, wo yé mwa ne bi suk sino. Sane ye ós yu su suk.

³³Yerasul bok ne mu ki bi sukdu-i ne nggi wai o ré. Án ki rer subot án bi Yekwesu nai yé mwa jam sare do, “Yefun Yesus sun kadit sukkwop it.” Sane Yefun Allah ben sukndo mwa yé su yé mwa gato onyar kem mo Yefun Yesus ne sino.

³⁴Sane ge dik yo mo án miten yo yewa suk yo mo nde. Ye gato bi suk mó sato bur det e, nu e ne, ye ne so bi suk ne, or án gwat bi sugum ma

³⁵án syo nai yerasul, orge yerasul syo nai ye gato yewa suk. Sane mo án miten ye gato yewa suk yo mo nde.

³⁶Yetu ge dik yo gato gum do Yusup, an ye Lewi gato ma kadit bur Siprus. Yerasul kendo ye ne gum yo o do Barnabas (gato bi sukjimnut do, ye gato ós ye yi). Sane Yusup re so an bi bur det dik yo or, an gwat bi sugum ma syo nai yerasul.