Read Abun Sukdu Subot Yerasul 7 Bible Online

Sukdu Subot Yerasul 7 - Abun bible

Sukdu Subot Yerasul 7

¹Yekwesu gato gum kok wai mo Yefun Allah bi nu ndo mo Stefanus do, “Suk gato ye ki ne sangge, bado, nde, e?”

²Stefanus ki do, “Ji bi nji, ji bi yenggras, nin jammo suk gato ji ki re et! Tomgato men bi amui, Abraham kem mo bur Mesopotamia tó, Abraham yo mu kem mo Haran nde tó, Yefun Allah gato gum kok sye wai o ré, kadum nggwa nai Abraham.

³Yefun Allah ki do, ‘Nan mu kadit nan bi bur-i, nan mu kadit nan bi nje-i et. Nan mu kem mo bur gato bere Ji kadum nai nan et.’

⁴Sane, Abraham mu kadit bur Kasdim, orge an mu kem mo Haran. Abraham bi ai kwop, orete Yefun Allah syogat Abraham mu kem mo bur Israel re, gato men sino kem mó su re.

⁵Sugane Yefun Allah yo syo bur re nai Abraham nde, det wokgan yo dom nde, wo Yefun Allah tom su Abraham, An ki do, ‘Kapre nan yo ku pa nde tó, bere Ji syo bur re nai nan si nan bi yewis-i jowa.’

⁶Sarewo Yefun Allah ki nai Abraham do, ‘Ji yo syo bur re nai nan bi yewis-i nde tó, bere nan bi yewis-i tepsu yedamok mo bur yi sor kom mo tahun wotin at. Ye gato kem mo bur ne, bere jowa nan bi yewis-i ne. Bere nan bi yewis-i gum kwerut wa nje mo bur ne. Yé gane ben sukye nai nan bi yewis-i ne mu kom mo tahun wotin at.

⁷Sarewo bere Ji syo sukye nai yé mo bur gato jowa nan bi yewis-i ne tepsu pakwerut. Ji syo sukye nai yé mo bur ne orete yo, nan bi yewis-i ne ma kadit bur ne ma som Ji mo bur re ré.’

⁸Yefun Allah ki sane, orge An syogat Abraham bisunat payebris tepsu bi sukjimnut do, suk gato Yefun Allah tom su Abraham, bere Yefun Allah benbot suk ne su pa gato simo sunat ne. Sane Abraham bi nggon kem su Isak, kam munggwo rek, orete Abraham bisunat pa ne. Or o ri ma Isak ku bi pa, ete Isak waii bisunat an bi pa gato Yakub. Or o Yakub ku bi pa, ete Yakub waii bisunat an bi payebris ge musyu dik sop we. Yenggras ge musyu dik sop we ne anato men ye Yahudi bi amui gato men bes gum kok ne.

⁹Men bi amui maskwa Yusuf mo suk gato Yusuf ku ne, sane án so Yusuf mo ye Mesir tepsu pakwerut, sarewo Yefun Allah sisu Yusuf mone.

¹⁰Yefun Allah nai Yusuf kadit sukye mwa ne sino gato Yusuf ku ne. Yefun Allah ben Yusuf bi sukjimnut nggi, subere Yusuf jam suk mwa. Yefun Allah kak os wa Yusuf subere yekwesu yeraja mo Mesir mit iwa Yusuf, sane yekwesu mo Mesir ne bes Yusuf gum Gubernur wa jowa nje mo bur Mesir. Yusuf dom tepsu yekwesu mo yeraja ne bi nu sye.

¹¹Orge yé mo bur Mesir si bur Kanaan ku sukonde sye, yé ku sukye ndo nde. Men bi amui yewa sugit dom.

¹²Yakub jam sukdu do, yé mo bur Mesir so sugit, sane Yakub syogat an bi pa gato men bi amui ne, mu so sugit mone. Men bi amui mu mo bur Mesir su wam futmo anane.

¹³Su ketke men bi amui jam nde án bi nji Yusuf gato Gubernur mo bur Mesir. Men bi amui ku Yusuf wam kedowe sa, Yusuf kadum nggwa nai án bi nji. Sugane yeraja mo Mesir jam sukdu subot Yusuf si bi nji si bi ai.

¹⁴Orge Yusuf taruwa bi ai, gato gum do Yakub. Yusuf taruwa do, Yakub si bi rus sino ma kem mo bur Mesir. Yakub si bi rus tepsu ye ka musyu mufit sop mek.

¹⁵Sane Yakub si bi rus sino mu kem mo bur Mesir. Yakub si men bi amui deyo kwop mone.

¹⁶Su kam sari ne ma ye gwat men bi amui mukri satu ma mo kota Sikhem, ete bi án mukri mo jokwak mit mone. Suga nyim tuya Abraham so bur det gato jokwak sye dik yo mó. Abraham so bur det ne kadit Hemor bi pa mo kota Sikhem.

¹⁷Karowa bi kam-i gato Yefun Allah syo bur det gato An tom su Abraham ne, men bi amui ku bi pa si bi dat mwa o mo bur Mesir.

¹⁸Kom mone, ye bes yekwesu yeraja dobe mo bur Mesir. Yekwesu be ne jam nde Yusuf.

¹⁹Sane yekwesu ne ben sukot nai men bi amui. Yekwesu ne jom men bi amui ne krat, an ben sukye nai men bi amui. Men bi amui do kem su pabom yo, an syaugat men bi amui bare pabom ne mo nden wé, subere pabom ne kwop.

²⁰Tomgane Musa bi im kem su Musa. Pabom ne ndo wai o ré. Musa ka pabom er, ye mewa pa ne mo pa bi ai bi nu kom mo aina gri, orge

²¹pa bi yenggras bare pa ne mo nden. Pa bi yenggras bare pa ne mo nden sa, yeraja bi pa donggon nai pabom, gato Musa ne. Yeraja bi mam kon Musa tepsu mom dakai bi pa.

²²Yé duno Musa su ye Mesir bi sukdu mwa ne. Musa ki suk yo, an ki suk nggi, an ben suk yo, an samok.

²³Musa kaim sa kom mo tahun musyu at, orge an nut mo an syidem do, ‘Ji mu ku ji bi yewis-i, ye Israel ne et.’

²⁴Musa mu ku an bi yewis-i ne sa, an me ye Mesir ge dik yo ben sukye nai ye Israel ge dik yo, sane Musa mu ós ye Israel ne. Musa gu ye Mesir ne kwop wé.

²⁵Musa dakai nut mo an dakai do, ‘Ji bi yewis-i ye Israel ne bere jam do, Yefun Allah bes ji wa nai án kadit sukye gato ye Mesir ben nai án ne.’ Musa nut sane, sarewo ye Israel yo nut sane nde.

²⁶Ik o, ete Musa ku ye Israel ge we yo o gato maskwa yu ete gu yu. Musa werwa ye we ne kem ndo su yu, an ki do, ‘Nin ka we tepsu yedik, nin ka we gu yu wa suma ne? Nin ka we gu yu o nde, wo nin ka we jom syim ete kem not sor.’

²⁷Musa da ki sane, sarewo ye we sye gato gu bi nji ne bam Musa mo nden kadit, ye we sye ki do, ‘Je u anato bes nan tepsu men bi yekwesu ne? Je u anato bes nan tepsu yepasye gato kibot men bi sukmaskwa ne?

²⁸Nan mit iwa nan gu ji kwop tepsu nan gu ye Mesir kamekre ne bado?’

²⁹Musa jam suk gato ye we sye ki ne, orge Musa nyu, Musa titi kadit bur Mesir mu mo bur Midian ré. Mone an kem tepsu yedamok, an kra, ete an ku payebris ge we.

³⁰Tahun musyu at, orete Musa ku malaikat ge dik yo mo pe gato kwe yo kom mo nde karowa banbo gato gum do Sinai. Musa me malaikat ne bor mo suk gato ru tepsu bot mo kwe wokgan mone.

³¹Musa do me malaikat bor mo bot ne sa, an yeket. An mu karowa bot ne wa watbot sisu ndo sa, Yefun Allah ki nai an do,

³²‘Ji anato Yefun Allah gato jom nan bi amui. Ji anato Yefun Allah gato jom Abraham, Isak si Yakub.’ Sane Musa kwabom kro, an nyuwa ndo nde, sane an sok mu nden kadit bot ne, an nyu teker ware.

³³Orge Yefun Allah ki o do, ‘Nan sombok nan bi sandal wé, we pe gato nan ti mone, Ji dakai bi pe-i anane.

³⁴Ji me sukye gato Ji bi nje ku mo bur Mesir mó ré. Ji jam án wo bot sukye gato án ku ne. Sane Ji is ma wa sombok án wé kadit ye Mesir, subere ye Mesir yo jowa án ete ben sukye nai án o nde, subere án dakai ti mo án dakai. Sane Ji syogat nan satu mu mo bur Mesir subere nan sombok ye Israel wé kadit ye Mesir.’

³⁵Musa gare, an anato ye gato ye Israel bariwa ne, ye ki do, ‘Je u anato bes nan tepsu men bi yekwesu ne? Je u anato bes nan tepsu yepasye gato kibot men bi sukmaskwa ne?’ Wo Yefun Allah dakai bes Musa tepsu ye Israel bi yekwesu. Yefun Allah dakai bes Musa subere Musa sombok ye Israel wé kadit ye Mesir. Yefun Allah tarubot malaikat gato Musa ku mo kwe wokgan ne.

³⁶Musa re ri ma gwat ye Israel mu kadit bur Mesir. An kadum Yefun Allah bi suktinggi ne bor mo bur Mesir, subere yé mwa ne sino yeket ete nutbot ndo nde. An kadum Yefun Allah bi suktinggi mo Sem Er. Yé mwa ne yeket suk gato an ben ne mo pe gato kwe yo kom mo nde sane sor kom mo tahun musyu at.

³⁷Musa gato ben suk mwa ne anato Musa gato ki nai ye Israel ne do, ‘Yefun Allah bes ji tepsu yenabi gato ma ki An bi sukdu-i nai nin jam. Sane dom, kam sari ne ma, bere Yefun Allah waii bes nin ge dik yo gum yenabi wa ki Yefun Allah bi suktaru nai nin jam.’

³⁸Musa anato si men bi amui sino mo pe gato kwe yo kom mo nde. Tomgane malaikat dik yo ki suk nai Musa mo banbo Sinai. Or o Musa waii ki sukdu gato Yefun tarubot malaikat ne nai men bi amui jam. Musa jam Yefun Allah bi sukduno gato ós men kem ndo. Orge Musa waii ki sukduno ne nai men jam ré.

³⁹Sarewo men bi amui bariwa jammo sukduno gato Musa ki ne. Án misyar Musa, án mitwa án brek satu mu mo bur Mesir.

⁴⁰Tomgato Musa mo banbo Sinai tó, men bi amui ki nai Musa bi nji dosye, Harun, do, ‘Nan fro suk bok yo wa men som tepsu Yekwesu gato mewa men et. Musa gato gwat men kadit bur Mesir, men jam nde or ré, an mu mo ganeyo kadit en ré.’

⁴¹Sane, yé ut suk yo ka sato sapi gan su emas wa án som tepsu án bi Yekwesu. Men bi amui gwat suksom, án som sapi gan ne su, án sara wa sapi gan gato án dakai ut su án syim.

⁴²Sane Yefun Allah misyar men bi amui or ré. Yefun Allah misyar án som suk sato bí mo gu e neya. Men bi amui som suk daret sane tepsu sukdu gato Yefun Allah tarubot yenabi gato krom mo bi buku sare do, ‘Ye Israel, tomgato nin kem mo pe gato kwe yo kom mo nde, kom mo tahun musyu at, nin yo gu suge wa som Ji su nde, nin yo som Ji su suksom yo mo nde, wo nin som suk yi neya gato nin bes win Ji su suksom sor ré.

⁴³Nin som Ji nde, wo nin gwat yefun gato gum do Molokhlah si bi nu-i muya-muma wa nin som. Nin gwat yefun dik yo o gato kaim tepsu bí, gato gum do Refan wa nin som. Nin nai yefun yi sato ye we ne wa nin som, wo nin misyar Ji or ré. Sane, Ji misyar yé gato ben sukibit ma but nin, ete gwat nin mu mo os syu mu mo bur Babel.’ ”

⁴⁴Stefanus ki o do, “Tomgato men bi amui kem mo pe gato kwe yo kom mo nde, Yefun Allah syogat Musa fro nu ti gato ye pam ete gwat bot os wa men bi amui som Yefun Allah mó. Musa fro nu ti ne tepsu suk gato Yefun Allah kadum nai an me ne.

⁴⁵Ri ma, Musa syo nu ti ne nai men bi amui mo pe gato nje yo kem mo nde, or án pam, án sam nu ti ne ma mo bur re. Men bi amui jammo Yosua tepsu án bi yekwesu anato án ma kem mo bur re win yewis bok yo gato Yefun Allah syun wé kadit bur re nyim wé ré. Sugane Yosua si men bi amui sam nu ti ne ma mo bur re. Nu ti ne kem sor, men bi amui som Yefun Allah mone sor kom mo kam gato yeraja Daud kem mo bur re.

⁴⁶Daud ben suk tepsu Yefun Allah mit. Daud ndo mo Yefun Allah do, ‘Yefun Allah gato men bi amui Yakub som ne, men nggo nu pe wa men som Nan mó bado nde e?’

⁴⁷Kom mo rut Daud yo nggo nu ne nde, wo Salomo anato nggo nu ne wa Yefun Allah.

⁴⁸Salomo da nggo nu wa Yefun Allah, sarewo Yefun Allah gato gum kok sye wai o ré, An yo kem mo nu gato men yetu nggo nde, we yenabi dik yo krom suk gato Yefun Allah ki sare do,

⁴⁹‘Gu anato tepsu pe gato Ji kem mó tepsu Yekwesu, Bur anato tepsu pe gato Ji gwes tak ak mó. Sane Ji kem not mo nu sato suma ne? Nin nggo nu sato suma tep wa Ji kem mone ne?

⁵⁰Ji anato ut suk mwa ne sino.’ Yefun Allah bi sukdu-i anane.”

⁵¹Stefanus ki o do, “Nin yé gato su krat! Nin dabe go nit! Nin ben suk tepsu nin bi amui, nin bariwa nin jammo Yefun Allah Gen.

⁵²Nin bi amui ben sukibit nai yenabi bok ne sino. Nin bi amui gu yenabi bok ne kwop wé. Yenabi ne ki sukdu subot Yefun Allah bi Pakwerut gato ben sukndo tepsu Yefun Allah mit ne, sarewo nin bi amui gu yenabi ne kwop wé ré. Suk ne sor nde, wo gabere nin dakai meret os wa Pakwerut ne, orete nin gu An kwop wé ré.

⁵³Yefun Allah bi sukduno ne, Yefun Allah tarubot malaikat mwa neya. Nin da jam sukduno ne, sarewo nin yo benbot sukduno ne nde.”

⁵⁴Yepasye mwa gato sum mone jam suk gato Stefanus ki ne, orge án maskwa, án on sa ket Stefanus ndo nde.

⁵⁵Sarewo Yefun Allah Gen bok nggwa mo Stefanus, orete Stefanus sok mu nim mo gu. Stefanus me Yefun Allah gato gum kok sye wai o ré, an me Yefun Yesus ti tak Yefun Allah de syim ge, Yefun Yesus bi suktinggi tepsu Yefun Allah sino mone.

⁵⁶Sane Stefanus ki do, “Nin me suk gato ji me re et. Ji me gu kak, ete ji me Yesus gato ye kendo do Yetu bi pa, An ti tak Yefun Allah de syim ge, An bi suktinggi tepsu Yefun Allah mone.”

⁵⁷Yepasye mwa ne bariwa suk gato Stefanus ki ne, sane án syim kewa án dabe. Án syim kewa án dabe saresa, án saiye, án bapu daret subere án jam sukdu gato Stefanus ki ne o nde, ete án kas mu but Stefanus,

⁵⁸án tik Stefanus án jurin bot bur mu kom mo kota de nden. Mone án am Stefanus su jok subere Stefanus kwop. Yé gato ma sokwa yé am Stefanus su jok ne, án jogru án bi san de nden ne wé. San ne yé syo nai yetu ge dik yo gato gum do Saulus mewa.

⁵⁹Yé am Stefanus saresa, Stefanus ki nai Yefun Yesus do, “Yefun Yesus, ji bi Yekwesu, Nan nai ji gen, Nan mewa.”

⁶⁰Stefanus tu an umsu mo bur, ete an saiye do, “Yefun, ji bi Yekwesu, Nan syo sukye nai yepasye re mo sukibit gato an ben nai ji nde. Nan misyar sor.” Stefanus ki or sa, an kwop ré.