Read Abun Sukdu Subot Yerasul 8 Bible Online

Sukdu Subot Yerasul 8 - Abun bible

Sukdu Subot Yerasul 8

¹Saulus gato ti mone, an nut do, ndo it, ye gu Stefanus kwop wé ré. Kadit kam gane, yé ben sukye nai ye gato onyar kem mo Yefun Yesus gato kem mo Yerusalem. Sane yé mwa ne sino titi mu rut, deyo mu mo bur Yudea, deyo mu mo bur Samaria, wo yerasul sor ete kem mo Yerusalem.

²Yetu ge bok yo gato ben suk tepsu Yefun Allah mit anato bi Stefanus mukri mo makwe. Yé ne wo nderku Stefanus ndo nde.

³Saulus werwa ben sukye nai ye gato sok mo Yefun Yesus bi rus-i. Saulus mubot nu, an do ku ye gato onyar kem mo Yefun Yesus it yo, an ben sukye nai yebris si nggon ne sino, an gwat mu sok mo penjara.

⁴Ye gato titi mu rut ne, án duno nje subot os ndo gato Yefun Allah fro wa men yetu ne mo pe mwa gato án mu mone.

⁵Filipus mu mo kota dik yo mo bur Samaria. Filipus ki sukdu subot Yefun Yesus mone. An ki subot Yekwesu gato Yefun Allah syogat ma mo bur re wa nai men yetu kadit sukye ete jowa men.

⁶Yé mwa mone jam suk gato Filipus ki ne. Yé mwa me suk gato Filipus ben, gato kadum Yefun Allah bi suktinggi mone, wade yé mwa ne yeket. Sane yé mwa ne sino jamwa suk gato Filipus ki ne pe.

⁷Filipus kadum Yefun Allah bi suktinggi, an syun semda wé kadit yé mwa gato semda ben ne. An syun semda ne wé saresa, yé mwa ne saiye. Yé bok yo o gato syim út e, gwes út e ne, an ben ge dom ré.

⁸Sane yé mwa mo kota ne mit iwa suk gato Filipus ben ne.

⁹Mo kota ne, nam it, yewon ge dik yo gato gum do Simon, an kwa syua e, an me suk e, an tik suk kadit nje e ne. Yé mwa ne sino mo bur Samaria yeket Simon. Sane Simon bes an nggwa kok mone, an ki do, an sa, nggi wai kadit ye yi neya.

¹⁰Yepasye si pa wokgan, yé mwa ne sino jamwa suk gato an ben ne pe. Yé mwa ne ki do, “Simon re ku suktinggi kadit Yefun Allah gato ye ki do, ‘Suktinggi gato sye wai.’ ”

¹¹Nam it, Simon ben yé mwa ne yeket suk gato an ben sato tik suk kadit nje e ne, sane yé mwa ne simo an.

¹²Sarewo Filipus ma ki sukdu subot os nd gato Yesus Kristus kak wa men yetu subere Yefun Allah nai men gum sok mo An bi rus-i, ete An tepsu men bi Yekwesu mone. Filipus ki sukdu mwa ne subot Yesus Kristus sa, yé mwa ne bi sukjimnut sye mo Simon o nde, wo yé mwa nai sukjimnut do, án onyar kem mo sukdu gato Filipus ki ne sor, orete Filipus ras án mo syur, yebris si nggon sino.

¹³Simon dakai nai sukjimnut do, an simo os be gato Yefun Yesus kak ne, an onyar kem mo sukdu subot Yefun Yesus ne, orete Filipus ras Simon mo syur. Orge Simon simo Filipus mu mo pe mwa gato Filipus mu mone. Filipus kadum Yefun Allah bi suktinggi mo suk gato an ben ne, sane Simon yeket suk gato Filipus ben ne, Simon nutbot ndo nde.

¹⁴Yerasul mwa gato kem mo Yerusalem jam do nje mo bur Samaria onyar kem mo Yefun Allah bi sukdu sa, yerasul syogat yerasul ge we gato Petrus si Yohanes mu ku nje mone.

¹⁵An we mu kom motu sa, an we ki suk su Yefun wa nje mo bur Samaria, subere Yefun Allah Gen bok nggwa mo án,

¹⁶we kom mone Yefun Allah Gen yo bok nggwa mo nje mo bur ne mo nde tó. Án bi nggwa mo Yefun Yesus tepsu án bi Yekwesu, ete Filipus ras án mo syur, Filipus ki Yefun Yesus gum mone, sarewo Yefun Allah Gen yo bok nggwa mo án nde tó.

¹⁷Sane Petrus si Yohanes ak syim mo án, orge Yefun Allah Gen bok nggwa mo án ré.

¹⁸Simon me an we ak syim mo nje, orete Yefun Allah Gen bok nggwa mo nje ne, sane Simon gwat sugum wa syo nai an we, Simon ki do,

¹⁹“Nin ka we syo suktinggi nai ji subere ji nggiwa ji ak syim mo nje, subere yé mwa gato ji ak syim mó, bere Yefun Allah Gen bok nggwa mo nje ne.”

²⁰Petrus ki do, “Mban! Nan nut do, nan so suk gato Yefun Allah dakai syo yi ne, nan so su sugum bado? Sane nde! Nan si nan bi sugum ges mo bot gesyos et!

²¹Nan bi nan nggwa mo Yefun Allah sisu sangge nde tó, sane nan si men ka we ak syim mo nje nde, nan si men ka we ben suk sino nde.

²²Nan nut mo nan mit do, nan so Yefun Allah Gen su sugum, sukjimnut ibit anane. Sane nan kwet kadit sukjimnut ibit ne et. Nan ki suk su Yefun subere Yefun Allah yo maskwa nan mone o nde, subere Yefun yo nutbot nan bi sukjimnut ibit ne o nde.

²³Nan ki suk su Yefun, we ji jam do, nan bi sukjimnut ibit, ben sato sukjimnut ibit ne rai nan tepsu ye rai nan su bus.”

²⁴Orge Simon ki do, “Saneyo, nin ka we ki suk su Yefun wa ji, subere ji yo ku sukye tepsu nin ka we bi sukdu-i nde.”

²⁵Petrus si Yohanes ki sukdu subot suk gato an we me Yesus Kristus ben ne nai nje jam. An we ki sukdu subot men bi Yekwesu Yefun Yesus nai nje mone jam, orge an we satu mu mo Yerusalem. An we mubot os, an we ki sukdu subot os ndo gato Yesus Kristus kak wa men yetu ne nai nje mo kampung bok yo mo bur Samaria.

²⁶Yefun Allah bi malaikat ge dik yo ku Filipus, ete ki nai an do, “Nan mu nden, nan mu mo os gato mu kadit kota Yerusalem mu kom mo kota Gaza. Os ne mo pe gato kwe yo kom mo nde.”

²⁷Sane Filipus mu. An mu nden saresa, an ku yetu ge dik yo gato ma kadit bur Etiopia. Ye ne, ye bes an wa an ben suk su nggon yepasye gato gum do Kandake, ete ye tik an koijo ne wé mone. Nggon ne, yeratu gato jowa nje mwa ne mo bur Etiopia. Ye gato Filipus ku ne, ye bes gum yepasye, an mewa nggon yeratu bi suk mwa ne. Yepasye ne ma kadit Yerusalem satu mu mo an bi bur-i. An mu mo Yerusalem wa an som Yefun Allah, orge an ma ré.

²⁸Yepasye ne satu mu mo an bi bur-i. An mu, an kem mo kwem gato kuda tik ket bur saresa, an baca buku dik yo gato yenabi Yesaya krom.

²⁹Yefun Allah Gen ki nai Filipus do, “Nan mu karowa kwem ne et.”

³⁰Sane Filipus kas mu karowa kwem ne. An jam yepasye ne baca yenabi Yesaya bi buku. Sane Filipus ndo mo an do, “Yenggras, nan jam suk gato nan baca ne, bado?”

³¹Yepasye ne ki nai Filipus do, “Ji jam nde ware, wo ye gato jam ete ki rer nai ji sa, bere ji jam.” Sane an kiwa Filipus it kem mo kwem mit ne si an mu sino.

³²Yepasye ne baca sukdu mo Yefun Allah bi sukdu sare do, “An tepsu domba gato ye gwat mu, ye gu kwop wé. An tepsu domba gan gato ye tot go wé, ete An yo ba su nde. An kem not, An yo ki sukdu kwa dik yo dom nde.

³³Ye ki An ket kwayo-kwayo ben An damen, ye ben sukye nai An, sarewo An yo ben suk yo siri mo nde. Ye gu An kwop wé kadit bur re, sane ye yo nuk subot An bi dat nde.”

³⁴Yepasye ne baca sukdu ne, orge an ki nai Filipus do, “Nan ki rer nai ji subot sukdu re et, yenabi krom subot je u ne? An krom subot an dakai, bado, ye yi, e?”

³⁵Sane Filipus ki rer subot sukdu ne nai yepasye ne jam, orge Filipus waii ki rer subot os ndo gato Yesus Kristus kak wa men yetu subere Yefun Allah nai men gum sok mo An bi rus-i, Filipus ki rer wa yepasye ne jam dom.

³⁶Yepasye ne si Filipus simo kwem muket os mit saresa, an we ma kom mo pe gato syur ok mó. Sane yepasye ne ki do, “Syur anare, nan ras ji mo syur re et, suma anato yawa nan ras ji ne?” [

³⁷Filipus ki do, “Nan onyar kem mo Yefun Yesus su nan mit dik si nan onyar dik yo, bere ji ras nan mo syur ré.” Yepasye kadit bur Etiopia ne ki do, “Ji onyar kem mo Yefun Yesus, Yefun Allah bi Gan ne it.”]

³⁸Yepasye ne syogat kuda gato tik kwem ne ti yei, orge an we is mu mo syur. An we syo syur ne an we ti mo syur miten, orge Filipus ras yepasye ne mo syur.

³⁹An we mu nden kadit syur ne. Sugane it, Yefun Allah Gen gwat Filipus mu mo pe yi gato ko kadit yepasye ne o ré. Yepasye ne gensu, an yo ku Filipus o nde, wo yepasye ne dakai mu mo an bi bur-i, an mit iwa suk gato Filipus ben su an ne.

⁴⁰Yefun Allah Gen gwat Filipus mu kom mo kota Asdod or, Filipus muket os gato mu mo kota Kaisarea. An muket os ne saresa, mo kota bok ne sino mo os miten, an ki sukdu subot os ndo gato Yesus Kristus kak wa men yetu. An kibot sukdu ne sane sor kom mo kota Kaisarea.