Read Abun Sukdu Subot Yerasul 9 Bible Online

Sukdu Subot Yerasul 9 - Abun bible

Sukdu Subot Yerasul 9

¹Tomgane Saulus iwa ben sukye nai yé mwa gato onyar kem mo Yefun Yesus, an iwa gu yé ne kwop wé. Saulus mu ku yekwesu gato gum kok wai mo Yefun Allah bi nu.

²An ndekwa yekwesu ne krom surat wa an gwat mu mo yekwesu mo ye Yahudi bi nu ari bok yo mo kota Damsyik. An ndekwa surat gato syo suktinggi nai an subere an do ku ye gato onyar kem mo Yefun Yesus mo Damsyik it yo, an nggiwa but yé ne, ete gwat satu ma mo Yerusalem.

³Saulus muket os mu mo Damsyik, an mu karowa Damsyik saresa, an gensu sukru sye gato rer-rik kadit gu, sukru ne rer-rik ne rek wairi wa an.

⁴Saulus ges gwa mo bur. An jam yetu ge dik yo ki sare do, “Saulus, Saulus, nan ben sukye nai Ji wa suma ne?”

⁵Saulus ki do, “Yenggras, Nan gum sa u ne?” Yefun Yesus ki do, “Ji gum do Yesus. Nan ben sukye nai Ji bu.

⁶Nan ben suk sane o nde, wo re yo, nan sun nan mu mo kota Damsyik et. Mone yetu ge dik yo bere ki rer nai nan subot suk gato bere Ji syaugat nan ben ne.”

⁷Yé bok yo gato simo Saulus mubot os, án da jam Yefun Yesus duwe sukdu ne, sarewo án yo ku Yefun Yesus gro nde. Sane yé bok ne ti not, án yo ki suk yo mo nde, án nutbot ndo nde.

⁸Saulus sun kadit bur, an gro rek ware, an yo me nden ndo nde, an gro ndu ré. Sane yé bok ne ós jowa an syim gwat an mu mo kota Damsyik.

⁹An gro ndu kom mo kam gri rek. Su kam gri rek ne an yo git sugit nde, an da syur dom nde.

¹⁰Yetu ge dik yo, gato gum do Ananias, an onyar kem mo Yefun Yesus, an kem mo kota Damsyik. An kem mone, an me suk yo tepsu an semda, wo an yo sem nde. Sugane Yefun Yesus ki nai an do, “Ananias o.” Ananias ki do, “Yefun, ji bi Yekwesu, ji anare.”

¹¹Yefun Yesus ki nai an do, “Nan mu mo Yudas bi nu-i mo os gato gum do, os ri, orete yo, nan meret Saulus gato bi nat-i mo Tarsus, we Saulus kem mo nu ne. Re yo, an ki suk su Yefun Allah mone.

¹²Saulus ki suk su Yefun sa, Saulus me suk tepsu an semda, wo an yo sem nde. An me yetu ge dik yo gato gum do Ananias ba ku an ete ak syim mo an su subere an gro ndo satu ré.”

¹³Ananias ki do, “Sarewo Yefun, ji jam ye nuk sukdu subot ye ne. An ben sukye nai ye gato onyar kem mo Nan mo kota Yerusalem.

¹⁴An ma more, an gwat yekwesú mo Yefun Allah bi nu bi surat gato syo suktinggi nai an subere an but men yé mwa ne sino gato nai Nan tepsu men bi Yekwesu.”

¹⁵Sarewo Yefun Yesus ki nai Ananis do, “Nan mu sor! Ji bes an wa an mu ki subot suk gato Ji ben ne nai ye Israel si yewis yi si bi yekwesu-i.

¹⁶Bere Ji dakai kadum nai an do, an gwat Ji gum mu ki nai yé mwa ne sino yo, bere an ku sukye ndo nde mone.”

¹⁷Sane Ananias mu mo nu gane, ete an sok mo nu mit. Ananias ku Saulus mone, orge an ak an syim mo Saulus. An ak an syim mo Saulus sa, an ki do, “Saulus, ji bi nji, Yefun Yesus gato nan ku mo os mit sugato nan ma more, An anato men bi Yekwesu. Yefun Yesus ne syogat ji ma ku nan, subere ji ak ji syim mo nan subere nan gro ndo satu, si Yefun Allah Gen bok nggwa mo nan dom.”

¹⁸Sugane it, suk yo tepsu boge dar sombok wé kadit Saulus gro, orete an gro ndo satu. Sane an sun, ete Ananias ras an mo syur.

¹⁹An git sugit, orete an kaim nggi satu. Saulus kem si ye gato onyar kem mo Yefun Yesus ne mo kota Damsyik kam bok yo o.

²⁰Sugane Saulus faiya mo ye Yahudi bi nu ari bok yo mone. An ki bi sukdu-i sare do, “Yefun Yesus anato Yefun Allah bi Gan.”

²¹Yé mwa gato jam an bi sukdu-i ne yeket, yé mwa ne ki do, “Ye gare anato ben sukye nai ye gato nai Yefun Yesus tepsu án bi Yekwesu mo kota Yerusalem, bado? An ma more wa but ye gato onyar kem mo Yesus Kristus, ete gwat mu mo yekwesú mo Yefun Allah bi nu mo Yerusalem, bado?”

²²Kamdik-kamdik, Saulus faiya nggi o, nggi o, nggi o mone sor, ye Yahudi mone jam rer do, sangge, Yefun Allah syogat Yesus Kristus ma mo bur re wa nai men yetu kadit sukye ete jowa men. Ye Yahudi mo kota ne yo ku os wa duwer Saulus mo sukdu ne nde.

²³Kam bok yo rek, orete ye Yahudi nggau yeko wa gu Saulus kwop wé.

²⁴Noru nombrak yeko ne eswa an mo kota bi ros syo, subere ye gu Saulus kwop wé, sarewo Saulus jamwa ré.

²⁵Sane, noru dik yo, yé gato simo Saulus bok Saulus mo syu bo gato sye. Án sa Saulus is su syu bo ket nusyo kot mo ros gato ye gat wa nden wa kota ne mu kom mo bur mo kota de nden, orge Saulus mu ré.

²⁶Saulus mu mo Yerusalem. An mu kom motu sa, an werwa an ku ye gato onyar kem mo Yefun Yesus, ware yé bariwa ku an, yé nyuwa ré, we yé nut do, Saulus yo onyar kem mo Yefun Yesus nde, wo Saulus meret os wa án sor.

²⁷Sarewo yetu ge dik yo gato gum do Barnabas mu ku Saulus, orge Barnabas top an mu mo yerasul bok ne. Barnabas ki nai yerasul do, “Tomgato Saulus mu mo kota Damsyik, mo os miten, an ku Yefun Yesus. Yefun Yesus ki suk su an mone. Sane dom, mo kota Damsyik, Saulus faiya subot Yefun Yesus. Saulus ki sukdu subot Yefun Yesus nai yé mwa mone, an yo nyuwa nde.”

²⁸Sane yerasul yo nyuwa Saulus o nde, Saulus si yerasul bok ne kem mone sino. Saulus mubot Yerusalem, an ki sukdu subot Yefun Yesus, an yo nyuwa nde.

²⁹An ki sukdu subot Yefun Yesus nai ye Yahudi gato ki suk su a Yunani ne jam. An si ye Yahudi ne duwer yu mo Yefun Yesus bi sukdu-i ware, ye Yahudi nggau yeko wa gu an kwop wé.

³⁰Ye gato onyar kem mo Yefun Yesus jam do ye Yahudi nggau yeko wa gu Saulus sa, yé top Saulus mu sare ti mu mo kota Kaisarea kadit, orge yé syogat Saulus mu mo kota Tarsus ne o.

³¹Sane ye gato onyar kem mo Yefun Yesus mo bur Yudea, bur Galilea si bur Samaria yo ku sukye o nde yei, án sino kem not. Yefun Allah Gen ben yé mwa ne nggi. Yefun Allah Gen ós ben yé mwa ne onyar kem mo Yefun nggi wai o. Yé mwa ne jammo Yefun Yesus, sane yé mwa yo o waii nai Yefun Yesus tepsu án bi Yekwesu ne dom, ete si án sok ari sino.

³²Petrus mubot pe mwa ne sino, an mu ku yé gato onyar kem mo Yefun Yesus. Kam dik yo an mu ku ye gato onyar kem mo Yefun Yesus mo kota Lida.

³³Mone an ku yetu ge dik yo gato gum do Eneas. Eneas gwes út, an yo ti ndo nde, an sem sane sor kom mo tahun munggwo.

³⁴Petrus ki nai Eneas do, “Eneas, Yesus Kristus ben nan ge it. Nan sun, nan pam nan bi sun et.” Sugane it, Eneas sun ré.

³⁵Yé mwa gato kem mo kota Lida si kota Saron ne me Eneas gato Yesus Kristus ben ge ré, sane yé mwa mone brek kadit os ibit, ete ma jammo Yefun Yesus tepsu án bi Yekwesu.

³⁶Nggon ge dik yo gato onyar kem mo Yefun Yesus kem mo kota Yope. Nggon ne gum do Tabita (su a Yunani, mom gum do Dorkas, gato bi sukjimnut do rusa). Nggon ne ben sukndo petok sor, mom syo suk nai ye gato yewa suk petok sor.

³⁷Sugane nggon ne i, or mom kwop ré. Ye mus mom mukri, orete ye grem mo gumwak mo nim mo nu gwes kok dik yo.

³⁸Kota Yope si kota Lida karowa yu. Yé gato onyar kem mo Yefun Yesus mo kota Yope jam do Petrus kem mo kota Lida sa, án syogat yetu ge we mu kar Petrus ma kekro. Ye we ne wergat Petrus do, “Nan ma men mu kekro se!”

³⁹Petrus si an we mu kadit kota Lida ma mo kota Yope. Petrus ma kom mo kota Yope sa, ye we top Petrus mu mo gumwak mo nim mo nu gwes kok ne. Nggonna mwa ti wairi wa Petrus. Nggonna ne wo, án kadum san gato Dorkas bit ete syo is án sugato Dorkas mbau, ete kem su án tó.

⁴⁰Petrus syogat án sino mu nden kadit gumwak ne. Orete Petrus tu an umsu, an ki suk su Yefun. An ki suk su Yefun, orete an sokwa Dorkas mukri, ete an ki do, “Dorkas, nan sun se!” Dorkas gro rek it anane. Dorkas gro rek, mom me Petrus, mom sun, mom kem.

⁴¹Petrus jowa mom syim ós mom ti, orge Petrus kendo yé gato onyar kem mo Yefun Yesus ma si nggonna ne ma, or Petrus ki do, “Yefun anato sun Dorkas mbau satu ré.”

⁴²Yé mwa ne sino mo kota Yope jam sukdu subot Dorkas ne, sane yé mwa mone nai sukjimnut dik do, sangge Yefun Allah syogat Yesus Kristus ma mo bur re tepsu Yekwesu wa nai men yetu kadit sukye ete jowa men, sane yé mwa ne jammo Yefun Yesus tepsu án bi Yekwesu mone it.

⁴³Petrus kem mo kota Yope kam bok yo o. An kem mo Simon bi nu. Simon anato ye gato ben suk su suge da.