Read Abun Roma 10 Bible Online

Roma 10 - Abun bible

Roma 10

¹Ji bi nji, ji bi nyanggon, ji mit iwa ji bi wis-i, ye Israel ne, kem ndo to kapyo mato kapyo. Ji ki suk su Yefun Allah sisu sangge wa ji bi wis-i ne sor.

²Ji ki rer subot ji bi wis-i ne do, sangge, ji bi wis-i mit iwa ben suk wa Yefun Allah. Án da mit iwa ben suk wa Yefun Allah, sarewo án bi sukjimnut yo kak mo suk gato Yefun Allah iwa án ben ne nde tó ré.

³Án jam nde os ndo gato Yesus Kristus kak wa án sok mo Yefun bi rus-i, wo {ye Israel gato ye kendo gum yo o do, ye Yahudi}, án dakai fro án dakai bi os-i. Án nut do án benbot ye Yahudi bi sukduno-i sa, bere Yefun nai án gum sok mo bi rus-i sor ré. Án dakai fro án dakai bi os-i sane anato án yo jammo os gato Yefun Allah fro ne nde.

⁴Yefun Allah fro bi os-i anato Yefun Allah bi Yesus Kristus ma mo bur re. Yesus Kristus ma fro os gato tara kadit ye Yahudi bi sukduno-i. Sane su re, men ku os wa men gum sok mo Yefun Allah bi rus-i mo os ndo gato Kristus kak ne sor ré. Os nyim gato ye benbot ye Yahudi bi sukduno-i ne yo tep o nde. Kristus ma kak os be subere ye gato onyar kem mo Yesus Kristus sa, bere Yefun Allah nai ye ne gum sok mo An bi rus-i mone.

⁵Musa krom do, ye gato benbot ye Yahudi bi sukduno-i subere Yefun Allah nai án gum sok mo Yefun bi rus-i. Yé ne benbot sukduno mwa ne sino sor, kwa yo gwet mo nde, sane sa, bere Yefun Allah nai án gum sok mo An bi rus-i ne. Men ndobot sane bere bi sukjimnut do, men werwa sun Kristus satu kadit sukkwop anane. Sarewo Kristus sun kadit sukkwop, An kak so ndo wa men mó ré.

⁶Sarewo ye gato onyar kem mo Kristus, ete mone Yefun Allah ki mo ye ne do, án sa, tep wa Yefun nai án gum sok mo Yefun bi rus-i ne yo, yé ne yo meret os yi yo o wa án sok mo Yefun bi rus-i o nde, we Yesus Kristus ma kak os ne it. Yefun Allah bi sukdu ki sare do, “Nan ndobot nan mit do, ‘Je u anato it mu mo gu wa meret ye yo ma kak os wa men ne?’ Sane bere siri ré.” (Men ndobot sane bere bi sukjimnut do, men werwa kar Kristus is ma mo bur wam dik yo o anane, sarewo Kristus is ma mo bur re, An kak os ndo wa men mó ré.)

⁷Sane dom, “Nan ndobot mo nan mit do, ‘Je u anato is mu mo gwinggri syo mo bur desnak wa meret ye yo ma kak os wa men ne?’ Sane bere siri ré.” (Me ndobot sane bere bi sukjimnut do, men werwa sun Kristus satu kadit sukkwop anane. Sarewo Kristus sun kadit sukkwop, An kak os ndo wa men mó ré.)

⁸Sarewo men yé gato simo os ndo gato Kristus kak ne, men ki sare do, “Sukdu subot Kristus ne ma kom mo nin it, nin ki subot sukdu ne petok sor, nin grem sukdu ne pe mo nin mit mó ré.” Sukdu gato men ki frekbot nin anato nin onyar kem mo sukdu subot Yesus Kristus sor.

⁹Nin do ki rer su nin mit dik sare do, Yesus Kristus anato tepsu nin bi Yekwesu, ete nin bi sukjimnut dik mo nin mit do, sangge, Yefun Allah sun Yesus Kristus kadit sukkwop, sane it yo, Yefun Allah nai nin gum sok mo An bi rus-i wé kadit bot gesyos ne it, bere nin kem ndo to kapyo mato kapyo.

¹⁰Men mit si men onyar kem mo Yesus Kristus, sane Yefun Allah nut mo men do, men sa, men gum tep wa sok mo An bi rus-i it. Sane dom, men ki rer si men mit dik do, Yesus Kristus anato tepsu men bi Yekwesu it yo, bere Yefun Allah nai men wé kadit bot gesyos, subere men kem ndo to kapyo mato kapyo.

¹¹Tepsu ye krom mo Yefun Allah bi sukdu do, “Ye gato kwabom kam mo Yefun, bere ye ne damen nde, wo bere an ku suk gato Yefun fro ne ré.”

¹²Os dik ne sor ré, yewis mwa mo bur re or sino, ye Yahudi, si yewis yi mwa ne sino, bi os wa sok mo Yefun bi rus-i ne tepsu yu ré, os gato tara yo mo nde. Kristus anato Yekwesu wa yetu mo yewis mwa ne sino gato onyar kem mo An. Yetu mo yewis mwa ne sino gato ndekwa Kristus ós án, bere Kristus ben sukndo su ye ne ré. Men mit si men onyar kem mo Yesus Kristus, sane Yefun Allah nut mo men do, men sa, men gum tep wa sok mo An bi rus-i it.

¹³Tepsu ye krom mo Yefun Allah bi sukdu do, “Yé mwa ne sino gato ndekwa Yefun nai án wé kadit sukye it yo, bere án kem ndo to kapyo mato kapyo ré.”

¹⁴Sarewo ye gato yo onyar kem mo Kristus nde tó, bere ye ne ndekwa Yefun Allah ós an sa u ne? An yo ku os nde. Sane dom ye gato jam sukdu subot Kristus nde tó, bere an onyar kem mo Kristus sa u ne? An yo ku os nde. Sane dom, ye yo mu ki sukdu ne nai an nde tó, bere an jam sukdu subot Kristus sa u ne? An jam nde.

¹⁵Ye syogat nje mu ki sukdu ne nde tó, bere ye ki sukdu subot Kristus nai nje jam sa u ne? An jam sukdu mo nde. Ye krom mo Yefun Allah bi sukdu subot ye gato gwat sukdu ne do, “Yé mit iwa ye gato ma ki sukdu subot os ndo gato Yefun Allah fro ne ba ku án et.”

¹⁶Sarewo yé mwa ne sino yo mit iwa jambot sukdu subot os ndo gato Yefun Allah fro ne nde, tepsu Yesaya ki do, “Men bi Yekwesu o! Je u anato onyar kem mo sukdu gato men ki re ne?”

¹⁷Sane anato yé mu ki sukdu subot os ndo gato Yesus Kristus kak ne, bere yé jam sukdu subot Kristus ré. Yé jam sukdu subot Kristus, sane bere yé ku os wa ye onyar kem mo Kristus mone.

¹⁸Sarewo ji ndo mó do: Sangge, ye Israel jam sukdu subot os ndo ne nde tó bado? Nde ré, án jam it, we ye krom mo Yefun Allah bi sukdu do, “Yé ki sukdu ne frekbot bur re iwedewe it. Án bi sukdu-i ne kas kom mo pe mwa ne or sino ré.”

¹⁹Ji ndobot o do, ye Israel jam sukdu subot Kristus ne ri ré, bado nde tó, e? Ye Israel ne da jam, sarewo án bariwa jammo sukdu ne, wo yewis yi sor ete iwa jammo. Musa ki subot suk gato bor mo yewis yi suga nyim ne. Musa krom sukdu gato Yefun Allah ki nai ye Israel sare do, “Yewis yi neya gato nin nut do tepsu yebaut ne, bere Ji ben nin maskwa ket yewis yi ne mo os ndo gato Ji fro wa án ne. Bere Ji ben nin maskwa ket yewis yi gato nin nut do jam suk nde.”

²⁰Sane dom, Yesaya waii krom suk gato Yefun ki ne nggi o sare do, “Yewis yi yo syeret Ji nde, wo yé mwa ne ku Ji it. Ji kadum Ji nggwa nai ye gato yo meret Ji nde ré.”

²¹Sarewo Yesaya krom sukdu gato Yefun Allah ki subot ye Israel ne dom sare do, “Noru nombrak Ji eswa án, yewis dik gato su krat ne, Ji eswa án, yewis gato bariwa jammo Ji, subere án satu ma wa si Ji kem ndo ware, án yo ma nde.”