Read Abun Roma 11 Bible Online

Roma 11 - Abun bible

Roma 11

¹Ji ndo mo nin sare do, “Ye Israel gato An nai tepsu An bi rus-i su ketke ne te, su re Yefun Allah dakai misyar bado?” Sane de. Ji dakai dom ye Israel, ji bi amui mo Abraham, ji bi wis-i mo Benyamin.

²Yefun Allah yo misyar An bi yetuge-i gato An fro su ketke ne nde. Nin jam suk gato ye krom mo Yefun Allah bi sukdu subot Elia bado? Tomgato Elia ki subot sukibit gato ye Israel ben ne, Elia ki nai Yefun Allah sare do,

³“Yefun, ji bi Yekwesu, ye Israel re gu nje gato gwat Nan bi suktaru ma ne kwop or. Án ben bot kot gato yé gre suge wa som Nan mone mwa ne ibit or ré. Ji dakai sor, ete mó tó, ete yé werwa yé gu ji kwop wé dom.”

⁴Sane, Yefun Allah ki bi sukdu-i nai Elia sa u ne? Yefun Allah ki do, “Nan sor ete sok mo Ji bi rus-i nde, wo Ji dakai fro Ji bi rus-i yetu ge ribu mufit dor wa Ji. Ge ribu mufit ne yo som suk gato yé bes tepsu yefun gato yé kendo gum do Baal ne, yo mo nde.”

⁵Sane dom, su re, Yefun Allah bi sukjimnut sye kas subot ye Israel ge bok yo dakai yi, sane anato An nai ye Israel bok ne sok mo An bi rus-i.

⁶Yefun Allah nai yé bok ne sok mo An bi rus-i kadit suk gato yé bok ne ben ne nde, wo Yefun Allah bi sukjimnut sye kas subot yé bok ne dakai yi sor. An dakai nai yé bok ne sok mo An bi rus-i ré, we Yefun Allah nai yé bok ne sok mo An bi rus-i mo sukndo gato yé bok ben ne yo, bere siri kadit Yefun Allah bi os-i gato An dakai kak yi wa men. Wo Yefun Allah bi sukjimnut sye kas subot men dakai yi, ete mone Yefun Allah nai men sok mo An bi rus-i sor ré. Yefun Allah bi sukjimnut sye kas subot men

⁷Sane bere sa u ne? Ye Israel mwa ne meret Yefun Allah ware, án yo ku os wa sok mo Yefun bi rus-i nde ré. Wo ye Israel ge bok gato Yefun Allah fro suga nyim wa An nai sok mo An bi rus-i ne sor ete ku Yefun. Sarewo Yefun Allah ben ye Israel napyo sye neya sino su krat ware, yé mwa ne yo sok mo An bi rus-i nde.

⁸Tepsu ye krom mo Yefun Allah bi sukdu do, “Yefun Allah ben yé mwa ne bi sukjimnut yo kak o nde. Yé mwa ne gro ndu e, yé mwa ne dabe mbut sor kom mo kam re.”

⁹Daud dom ki subot yé gato su krat. Daud ki subot sukye gato bere yé gato ben suk ket án í ne ku ne, sare do, “Pesta gato yé mwa gato su krat iwa ben ne, Yefun ete ben pesta ne tepsu bus gato yé ne dakai di mó, sane dom, Yefun ete ben pesta ne tepsu bur wak gato yé ne ges kwop mó.

¹⁰Yefun ete ben yé ne gro ndu, subere án yo me suk ndo nde. Yefun ete ben yé ne mu ka, án yo ti ri o nde sor kom mo kapyo mato kapyo.”

¹¹Ji ndo mó o do: Ye Yahudi brek kadit Yefun Allah bi os-i ne, sane anato ye Yahudi yo ku os wa kem gesyos nde bado? Ye Yahudi yo ku os wa sok mo Yefun bi rus-i o nde, bado? Nde ré, Ye Yahudi su krat, án bariwa án jammo os gato Yefun Allah fro wa án ne ré. Sane anato Yefun fro os wa yewis yi sok mo An bi rus-i subere yewis yi kem ndo to kapyo mato kapyo, ete ri ma, ye Yahudi me Yefun nai yewis yi sok mo bi rus-i anato ye Yahudi maskwa ket yewis yi mone.

¹²Sarewo ye Yahudi bariwa Yefun Allah, án ben sukibit, án yo sok mo Yefun bi rus-i nde anato Yefun fro os wa yewis yi sok mo An bi rus-i. Sane bere ye Yahudi do satu ma jammo Yefun Allah bi os-i it yo, bere Yefun ós yetu mo yewis yi mwa wai o waii sok mo Yefun bi rus-i o ré, subere yewis yi mwa ne dom kem ndo to kapyo mato kapyo.

¹³Su re, ji ki sukdu nai nin yewis yi. Kadit nyim tuya kom more, ji mit at wa ji ben suk tepsu yerasul gato Yefun Allah syogat gwat Kristus bi sukdu mu ki nai yewis yi mwa neya jam. Ji ki subot suk mwa gato ji ben ne sye wa yé mwa ne jam. … bere Yefun ós yetu mo yewis yi mwa wai o waii sok mo Yefun bi rus-i o ré, subere yewis yi mwa ne dom kem ndo to kapyo mato kapyo

¹⁴Ji mit iwa ji ós yewis yi sok mo Yefun Allah bi rus-i, subere kak ji dakai bi yewis-i bi sukjimnut wade án nut subot sukndo gato yewis yi ku mone. Ji mit iwa án nut subot sukndo gato yewis yi ku ne wade án waii mit wa án sok mo Yefun bi rus-i ne dom.

¹⁵Yefun Allah bariwa ye Yahudi gato su krat ne anato An kak os wa yewis yi mwa ne sino mo bur re sok mo An bi rus-i mone. Sane bere Yefun Allah do iwa nai ye Yahudi sok mo An bi rus-i it yo, bere sa u ne? Bere ye Yahudi tepsu ye gato kwop, ete mbau satu o ré.

¹⁶Sane ye Yahudi ge bok yo tep wa Yefun nai án sok mo An bi rus-i mó yo, bere Yefun nut do, yé mwa ne sino dom tep wa An nai sok mone o ré. Ye me do, roti gum nap gato ye som Yefun Allah su ne, Yefun do iwa ne it yo, bere roti mwa ne sino ndo, tepsu Yefun Allah mit ré. Sane dom, kwebrot nap do ndo it yo, bere i-guk mwa ne sino ndo ré.

¹⁷Men ye Yahudi tepsu kwe zaitun guk gato ye tot wé. Orete ye gwat kwe zaitun gato dakai kom mo nden guk-i bok yo ma but ndom kweke win kwe zaitun guk gato ye tot wé ne. Nin yewis yi tepsu kwe zaitun guk gato ye gwat kadit nden ne ma. Yefun Allah but nin yewis yi ndom kweke ne subere nin waii ku suk mwa gato ndo kadit kwe zaitun ke ne, tepsu nin ku os wa nin sok mo Yefun Allah bi rus-i anane.

¹⁸Sane nin, yewis yi, nin nut do, nin ndo wai kadit i-guk gato Yefun Allah tot wé ne nde. Nin nut sane nde, wo nin nutbot suk gato ji ki re sisu ndo et. Nin dom tepsu i-guk. Kweke ne yo ku sugit kadit i-guk nde, wo i-guk anato ku sugit kadit i-ke.

¹⁹Bere nin ki do, “Sangge, Yefun Allah tot i-guk bok yo wé subere kak os wa ji sok mone win guk ne.”

²⁰Sangge, i-guk bok ne Yefun Allah tot wé, we yé bok ne yo onyar kem mo Kristus nde, sarewo Yefun Allah but nin dom kweke mone, we nin sa, onyar kem mo Kristus. Sane nin mit at teker eta nde, won nin nyu et,

²¹we Yefun Allah tot i-guk gato tepsu ye Yahudi gato misyar Kristus ne wé ré, Yefun yo nutbot nde. Sane nin do misyar Yesus Kristus it yo, bere Yefun Allah tot nin wé ré, An yo nutbot dom nde.

²²Sane more men jam do, Yefun Allah ben An bi suk-i ndo yé, or o Yefun Allah ben An bi suk-i krat yé dom. An ben An bi suk-i krat nai yé gato ben sukibit, wo An ben sukndo su nin. Nin bi sukjimnut kem mo sukndo gato Yefun Allah ben su nin yo, bere nin kem ndo mone tó, wo nin bi sukjimnut yo kem mo sukndo ne o nde yo, bere Yefun Allah tot nin wé kadit kweke ne dom ré.

²³Ye Yahudi yo misyar Yesus Kristus o nde, ete án do nai sukjimnut brek satu ma kem pe mo Yesus Kristus yo, bere Yefun Allah nggiwa nai án gato tepsu i-guk gato Yefun tot wé ne, ete but dom kweke ne satu o.

²⁴Nin, yewis yi neya, nin tepsu kwe zaitun guk gato kom mo nden, ete ye gwat ma ye but dom kwe zaitun ke gato ye mewa ne. Ye gwat nin ma but dom kweke gato ye mewa ne, yo ndaf nde, we kweke mo nden si kweke gato ye mewa ne, we ne yo tepsu yu nde. Wo ye Yahudi gato tepsu kwe zaitun gato ye mewa ne guk-i, ye tot i-guk ne wé, orete ri ma ye but i-guk ne dom kweke ne satu o yo, ndaf wai kadit ye nai kwe zaitun yi guk-i ma ete ye but guk ne dom kwe zaitun gato ye mewa ne ke. Sane Yefun nai ye Yahudi satu anato ndaf wai kadit Yefun nai yewis yi sok mo An bi rus-i ne.

²⁵Ji bi nji, ji bi nyanggon, ji iwa nin jam subot suk yo gato Yefun Allah gurik kadit men yetu kom more. Nin jam sukdu re subere nin dakai bes nin nggwa daret nde. Sukdu ne sare: ye Yahudi ne bere su krat sor kom mo kam gato yewis yi onyar brek ma kem mo Kristus, tepsu Yefun Allah nut do, tep mone it, orete yo, ye Yehudi yo su krat o nde. … ji iwa nin jam subot suk yo gato Yefun Allah gurik kadit men yetu

²⁶Sane kom mone sa, ye Yahudi mwa ne sino bere Yefun Allah nai sok mo An bi rus-i wé kadit sukye gato án ku mo bot gesyos, tepsu ye krom mo Yefun Allah bi sukdu do, “Ye gato ma nai men wé kadit sukye, bere ye ne ma kadit Sion, bere An tot sukibit mwa gato rai Yakub si bi wis-i, ye Yahudi bi pa mwa ne sino.

²⁷Ji tom su ye Israel sare do, bere Ji yo maskwa án mo sukibit gato án ben ne o nde, bere Ji yo nutbot o nde.”

²⁸Ye Yahudi bariwa simo os ndo gato Yesus Kristus kak ne anato án tepsu yeko wa Yefun Allah ré. Sane anato Yefun Allah fro os ndo wa nin yewis yi ne. Sarewo Yefun Allah fro ne Yahudi su ketke wa sok mo An bi rus-i, anato Yefun Allah bi sukjimnut sye kas subot ye Yahudi tepsu suk gato An tom su ye Yahudi bi amui ne tó.

²⁹Sane sukndo gato Yefun Allah fro wa An ben ne, An ki kwop mone it. Yefun Allah yo brek kadit suk gato An tom su nje nde.

³⁰Kam nyim tuya, nin yewis yi yo jammo Yefun Allah nde, nin yo ben Yefun Allah bi suk-i ri-roi nde, sarewo su re sa, ye Yahudi yo ben Yefun Allah bi suk-i ri-roi nde anato Yefun dakai jimnotku nin yewis yi, An nai nin sok mo An bi rus-i ré.

³¹Sane dom, su re ye Yahudi yo jammo Yefun Allah nde, án yo ben Yefun bi suk-i ri-roi nde, subere Yefun dakai jimnotku nin. Sarewo bere Yefun dakai jimnotku án mone tó.

³²Yefun Allah misyar sukibit jom men yetu mwa ne sino mo bur re, subere ri ma An ku os wa An kadum do, An dakai jimnotku men anato An yo ben suk su men tepsu sukibit gato men ben su An nde, wo An ben sukndo su men sor

³³Yefun Allah jam suk mwa wai o ré, men yetu yo karowa dom nde. Yefun Allah bi sukjimnut-i ne ko wai o ré, men yetu bi sukjimnut-i yo kom mone nde. Suk gato Yefun Allah ki do, kwop mone it, je u anato nggiwa duwer Yefun mo ne? Yefun Allah fro suk mwa ne, je u anato nggiwa jam kom mo ne?

³⁴Tepsu ye krom mo Yefun Allah bi sukdu do, “Je u anato nggiwa jam Yefun Allah bi sukjimnut-i ne? Je u anato nggiwa duno Yefun Allah ne?

³⁵Je u anato syo suk nai Yefun Allah, ete nggiwa ndek Yefun Allah win suk ne o ne?”

³⁶Yefun Allah ut suk mwa ne sino. Yefun ut suk mwa ne su An bi suktinggi. Yefun ut suk mwa ne wa An dakai. Sane men bes Yefun Allah gum kok petok sor to kapyo mato kapyo, Sangge.