Read Abun Roma 12 Bible Online

Roma 12 - Abun bible

Roma 12

¹Sane, ji bi nji, ji bi nyanggon, Yefun Allah dakai jimnotku men anato An yo ben suk su men tepsu sukibit gato men ben su An nde, wo An ben sukndo su men sor. Sane nin benbot suk gato ji ki re et: Tepsu suga nyim yé gu suge kwop wa yé som Yefun su ne, su re men bi men nggwa su mbau wa men som Yefun su ne et. Men werwa men bi men nggwa wa men ben Yefun bi suk-i tepsu An mit sor. Men som Yefun Allah su sangge it anane.

²Men ben men bi suk-i tepsu yetu mo bur re ben bi suk-i ne o nde, wo men bi men nggwa mo Yefun Allah subere Yefun Allah win men bi sukjimnut-i su sukjimnut-i gato be o ré. Sane bere men ku os wa men jam suk mwa gato tepsu Yefun Allah mit ré, bere men jam suk gato ndo, bere men jam suk gato Yefun Allah iwa men ben ne, kwa yo gwet mo nde.

³Yefun Allah syo suktinggi is ji dakai yi, sane ji ki nai nin sino sare do, nin bes nin nggwa kok teker eta nde, wo nin nutbot nin nggwa pare et. Nin onyar kem mo Yesus Kristus anato Yefun Allah syo suktinggi nai nin. Sane nin gedik-gedik nutbot nin nggwa pare tepsu pe gato nin onyar kem mo Yesus Kristus ne et.

⁴Men bes men nggwa kok nde, we men sino tepsu yetu kaim dik, men mitmo yu. Tepsu men dakai kaim, men syim mó e, men gro mó e, men gwes mó e ne ut mo men kaim, suk mwa neya mo men kaim ne mó ré. Suk mwa gato ut mo men kaim ne yo ben bi suk-i tepsu yu nde, wo suk mwa gato ut mo men kaim ne ben bi suk-i tara kadit yu.

⁵Sane dom, men yé mwa gato sok mo Kristus bi rus-i anato tepsu yetu kaim dik. Sane men ge dik yo bes men nggwa kok wai kadit ge dik yo nde, we men gedik-gedik mitmo yu, men ut mo yu tepsu suk mwa mo yetu kaim ut mo yu ne. Men sino yedik, men sino sok mo rus dik.

⁶Men gedik-gedik ku bi suktinggi-i tara kadit yu ré. Sane ge dik yo bes nggwa kok wai kadit ge dik yo o nde. Men gedik-gedik ku suktinggi tepsu pe gato Yefun Allah iwa syo nai men dakai yi ne. Sane men ben suk su suktinggi ne et. Ye gato ku suktinggi wa ki subot sukdu gato Yefun Allah tarubot an ne yo, an ki sukdu ne su an mit dik si an onyar dik tepsu suktinggi gato Yefun Allah Gen syo nai an ne sor.

⁷Ye gato ku suktinggi wa ben suk wa ós ye yi it yo, an ben su an mit dik si an onyar dik sor. Ye gato ku suktinggi wa duno nje it yo, an duno nje su an mit dik si an onyar dik sor.

⁸Ye gato ku suktinggi wa ki sukdu gato ndo wa tik ye yi mit wa ben suk gato ndo it yo, an ki sukdu ne su an mit dik si an onyar dik sor. Ye gato ku suktinggi wa syo suk nai ye gato yewa suk it yo, an syo suk mwa su an mit iwa sor. Ye gato ku suktinggi wa an tepsu yekwesu it yo, an jom nje, an ben an bi suk-i su an mit dik si an onyar dik sor. Ye gato ku suktinggi wa an dakai jimnotku ye yi gato ku sukye it yo, an ós ye ne su an mit iwa sor.

⁹Men ben kidar do, men bi sukjimnut sye kas subot nje, wo men mit-i tara ré, bere siri ré, wo men bi sukjimnut sye kas subot nje sisu sangge. Men bariket suk gato ibit. Men jom suk gato ndo ne pe sor.

¹⁰Men bi nggwa nai yu, men mewa yu tepsu men yedik. Men bes ye yi gum-i kok wai kadit men dakai bes men gum-i ne.

¹¹Men ben Yefun Allah bi suk-i, men ben suk su men bambrai nde, wo men ben suk su men samok. Men jammo Yefun Allah Gen, ete men ben Yefun Allah bi suk-i su men mit iwa ne sor.

¹²Men kwabom kam mo Yefun Allah, ete men mit at mone. Men ku sukye yo, men misyar Yefun nde, wo men eswa sukye ne or kadit men. Men ki suk su Yefun Allah petok sor.

¹³Men ós Yefun Allah bi rus-i dogato yewa suk. Men kendo ye Kristen gato men jam nde ma si men sem mo men bi nu-i, men bambrai wa nde, wo men mit iwa sor.

¹⁴Men ndek mo Yefun Allah subere An ben sukndo su ye gato ben sukibit su men. Sangge, men ndekwa Yefun Allah ben sukndo su ye ne. Men dufo mo ye ne nde.

¹⁵Ye to mit at mo suk gato ndo yo, men sino dom mit at su an et. Ye to wo yo, men si an wo sino dom.

¹⁶Men kem ndo su yu. Men bes men nggwa kok nde, wo men ben suk su ye gato gum wok mo bur ne dom. Men ben suk su yé mwa ne su men gro njep. Men bes men nggwa kok wai kadit ye yi mo suk gato men jam ne nde.

¹⁷Ye yo ben sukibit nai men it yo, men waii ben sukibit nai an satu o nde, wo men werwa men ben suk gato ndo nai ye ne sor. Men werwa men ben men bi suk-i subere yé mwa ne sino nut do, men ben suk mwa ne ndo sino.

¹⁸Men werwa men meret os yo sa u subere men si yé mwa ne sino kem ndo su yu sor. Men werwa mone sor kom mo pe gato men dakai bi suktinggi tut mó.

¹⁹Ji bi nji, ji bi nyanggon, ye yo ben sukibit ma nai men it yo, men waii ben sukibit mu nai ye ne satu o nde, wo men misyar Yefun Allah dakai maskwa ye ne sor, tepsu ye krom mo Yefun Allah bi sukdu do, “Bere Ji dakai sor anato maskwa nje tepsu sukibit gato án ben ne. Bere Ji anato syo sukye nai án tepsu sukibit gato án ben ne.”

²⁰Yetu ge dik yo ben sukibit ma nai men it yo, men waii ben sukibit nai ye ne satu o nde, wo men ben suk tepsu ye krom mo Yefun Allah bi sukdu do, “Ye gato nggau yeko ma wa gu men ne do on de it yo, men syo sugit nai an git. An do sosa it yo, men syo syur nai an da et.” Men syo sugit si syur nai an yo, bere an jam nggwa mo sukibit gato an ben mone, bere an krer bot mbam gato ru tó mo an su, subere ye jam do, an jam nggwa ete kwe kadit os ibit anane. Ye yo ben sukibit nai men it yo, men waii ben sukibit nai an satu o nde, wo men werwa men ben suk gato ndo nai ye ne sor

²¹Sane men bi sukjimnut kas subot sukibit gato ye ben ma nai men ne wade men ben sukibit satu nde, wo men ben sukndo satu subere ye gato ben sukibit ne kwet o ré.