Read Abun Roma 13 Bible Online

Roma 13 - Abun bible

Roma 13

¹Yefun Allah sor anato bes yekwesu mo bur re wa jom men yetu. Yekwesu ne ku suktinggi kadit Yefun Allah wa jom bi yetu mwa mo bur re, sane men jammo men bi yekwesu gato jom men ne et.

²Sane ye gato su krat wa jammo bi yekwesu, ete duwer bi yekwesu ne, tepsu an su krat wa jammo Yefun Allah, ete duwer Yefun dom anane. Ye gato duwer bi yekwesu mo bur re, bere an dakai ku sukye mo koirut.

³Ye gato ben bi suk-i ndo yo, bere an yo kwabom dek subot suk gato an bi yekwesu ben su an ne nde, wo ye gato ben bi suk-i ibit yo, bere an kwabom dek subot suk gato bere an bi yekwesu ne ben su an. Sane men bariwa men bi yekwesu ben sukye nai men it yo, men ben men bi suk-i ne ndo petok sor. Sane bere men bi yekwesu un men mo sukndo gato men ben ne.

⁴Men ben men bi suk-i ne ndo sor, we men bi yekwesu anato tepsu Yefun Allah bi pakwerut gato fro sukndo wa men. Wo men do ben sukibit it yo, men kwabom dek subot suk gato men bi yekwesu ben su men ne sor, we an ku suktinggi wa ben sukye nai men. An tepsu Yefun Allah bi pakwerut. Yekwesu ne gwat Yefun Allah bi sukmaskwa, ete syo sukye nai ye gato ben sukibit mo bur re.

⁵Sane men jammo men bi yekwesu mwa ne sino mo bur re sor. Men jammo án, we men nyuwa men ku sukye mo sukibit gato men ben ne sor nde, wo men jammo men bi sukjimnut gato ndo mo men mit ne, ete men ben suk gato men bi yekwesu ki ne.

⁶Yekwesu mo bur re ben suk tepsu Yefun Allah bi pakwerut. Men bi yekwesu ne fro suk mwa neya wa men tepsu Yefun Allah bi pakwerut, sane anato men syo sugum pajak nai án.

⁷Sane sugum pajak gato yekwesu mo bur re syogat men bi ne, men bi sor. Men bi yekwesu syogat men bi sugum wa sukyo-sukyo it yo, men bi sor. Men un men bi yekwesu sino ete bes an gum kok mo sukndo gato an ben tepsu Yefun Allah bi pakwerut ne.

⁸Sugum gato men tom wa men bi nai ye yi yo, men bi sor. Men bi bon mó yo, men bi kekro or wé et. Suk dik sor gato yo or wé kadit men nde anato men bi sukjimnut kas subot yu petok sor. Ye gato bi sukjimnut sye kas subot ye yi neya anato ben suk tepsu Musa bi sukduno-i mwa ne sino,

⁹we ye gato bi sukjimnut kas subot ye yi neya, bere ye ne benbot ye Yahudi bi sukduno-i sato re do: men ben siri daret nde; men gu ye yi kwop daret nde; men syimsi suk nde; men gro sye wa men nai ye yi bi suk nde. Sukduno bok gare si sukduno yi neya bi i-ke mo sukduno kwa sye dik yo sare do, “Men bi sukjimnut sye kas subot ye yi tepsu men bi sukjimnut sye kas subot men dakai et.”

¹⁰Ye gato bi sukjimnut sye kas subot ye yi, bere an yo ben sukibit nai ye ne nde. Sane ye gato bi sukjimnut sye kas subot ye yi, tepsu an benbot ye Yahudi bi sukduno-i mwa ne sino it anane.

¹¹Sane dom, men jam do, su re bi kam tep wa men sem o nde, wo men sun et, men ben Yefun bi suk-i petok sor, we su re karowa bi kam gato Yefun Yesus ma kar men mu kem ndo mo An bi nat-i. Su re, kam gato Yefun satu ma mo bur re ne karowa wai kadit kam gato men onyar kem mo Yefun Yesus su ketke ne.

¹²Noru miten wai it, karowa nombrak it are. Sa ndo sa, ndendu bi suk-i men ben o nde, men misyar sor, ete men nai Yefun Allah bi sukmise gato rer wa men syun ndendu bi suk-i wé kadit men et.

¹³Men ben men bi suk-i ndo sor, men ben men bi suk-i tepsu suk gato ye ben su nombrak. Men kamo e, men yenau su e, men ben siri su dom nde. Men yenau nde. Yebris si nggon ben siri su yu daret nde. Men ben suk siri dakai daret nde. Men ben sukndi nde. Men maskwa ye yi mo sukndo gato ye ne ku ne nde.

¹⁴Men jammo sukjimnut gato tik men mit wa ben sukibit tepsu yetu iwa ben ne o nde, wo men nai sukjimnut wa men bi men nggwa mo men bi Yekwesu Yesus Kristus subere men ben suk tepsu An mit sor.