Read Abun Roma 14 Bible Online

Roma 14 - Abun bible

Roma 14

¹Ye gato yo onyar kem nggi mo Yefun Allah nde tó yo, men ben suknjep su ye ne sor. Ye ne bi sukjimnut-i tara kadit men bi sukjimnut-i mo sukduno wokgan gato yo ós men teker eta nde yo, men ki an gum ibit mone nde, men duwer án mo sukduno gato án dakai jom ne dom nde.

²Sato yetu ge dik yo nut mo an dakai do, an git suk mwa neya daret sor. Wo yetu ge dik yo o gato bi sukjimnut yo nggi mo Yefun Allah nde tó, an nut do, ye gane bi sukjimnut-i siri ré, wo an dakai nut do, an git sugit daret nde, an git sukom sor ré.

³Ye gato git sugit daret ne, do ki ye gato git sukom sor ne gum ibit mone yo, bere siri ré. Sane dom, ye gato git sukom sor ne do kiket ye gato git sugit daret ne gum ibit yo, bere siri ré, we Yefun Allah nai ye gato git suk mwa ne daret sisu ye gato git sukom ne sino sok mo An bi rus-i it, Yefun yo nut subot sugit gato men git ne nde.

⁴Je u anato bes men wa men ndobot suk gato yenggras yi bi pakwerut-i ben ne? Pakwerut gane dakai bi yenggras sor ete ndobot suk gato pa ben ne, ete nai sukjimnut do, yenggras ne imo bado, bari e? Sane men ki ye yi gum ibit mo sukwokgan daret nde, we Yefun Allah bere dakai fro bi pakwerut-i mone tó. Yefun sa, nggiwa mewa An dakai bi pakwerut ne ete ós pa ne ben suk gato Yefun Allah imo.

⁵Men kibot sukduno gato yo ós men teker eta nde yo, men duwer yu mo sukdu ne nde. Sato ye deyo ki do, kam mwa ne sino, kam deyo sye wai kadit kam deyo. Or o ye deyo o ki do, kam mwa ne sino tepsu yu ré, kam deyo sye wai kadit kam deyo mo nde. Sukduno subot kam yo ós men teker eta nde, sane men misyar yetu gedik-gedik dakai nai bi sukjimnut subot sukduno sane tepsu pe gato án dakai bi sukjimnut-i kwop mone sor. … men ki ye yi gum ibit mo sukwokgan daret nde

⁶Ye gato bes kam deyo gum kok kadit kam deyo o, an ben sane, we an iwa bes Yefun Allah gum kok mone. Ye gato git suk mwa daret, an ben sane, we an iwa bes Yefun Allah gum kok mone, ete an ki ndo mo Yefun Allah mo suk mwa gato an git ne. Sane dom, ye gato bariwa git sugit deyo, an ben sane, we an iwa bes Yefun Allah gum kok mone, ete an ki ndo mo Yefun Allah mo suk gato an git ne.

⁷Men kem mo bur re wa men ben suk ket men í sor nde, wo men kwop o, men mbau o, men bi men nggwa mo Yefun, men bes An gum kok mo suk gato men ben ne sor.

⁸Sane men kem mo bur re wa men ben men bi Yekwesu Yesus Kristus bi suk-i. Sane dom, men kwop o, men mbau o, men bes An gum kok mo suk mwa gato men ben ne sor. Sane bere men kwop o, men mbau o, men sok mo men bi Yekwesu Yesus Kristus bi de-i ne sor,

⁹we Yesus Kristus kwop, or o An sun o, subere An gum Yekwesu wa ye gato kwop si ye gato mbau ne sino. Su kam gato bere men sino ti mo Yefun Allah gwem, bere Yefun ndobot men gedik-gedik ne sino, sane men iwa ki ye yi gum ibit wa suma ne?

¹⁰Sane men bi nji gato men si án sino onyar kem mo Yefun Yesus ne te, men ki án gum ibit mo sukduno wokgan gato án jom tara kadit men ne wa suma ne? Men kiket án do, án jam nde suk wa suma ne? Su kam gato bere men sino ti mo Yefun Allah gwem, bere Yefun ndobot men gedik-gedik ne sino, sane men iwa ki ye yi gum ibit wa suma ne? Men do ki ye yi gum ibit it yo, bere men ku sukye mone go!

¹¹Men ki ye yi gum ibit nde, wo men bes Yefun Allah gum kok sor, tepsu ye krom mo Yefun Allah bi sukdu do, “Yefun Allah ki do, ‘Ji kem gesyos, sane bere suk gato Ji ki ne, sangge, bere bor sor, sangge, bere yetu gedik-gedik nyuwa Ji ete ma tu umsu mo Ji gwem. Bere yé mwa ne sino ki rer do, Ji anato Yefun Allah gato gum kok wai o ré.’ ”

¹²Sane bere men yetu gedik-gedik dakai ki rek subot suk mwa gato men dakai ben ne mo Yefun Allah gwem sor. Sane men mewa men nggwa kadit men ki yu daret nde.

¹³Sane men kiket ye yi gum ibit mo sukduno wokgan gato yo ós men teker eta nde wa suma ne? Men kiket an, ye gato jom sukduno wokgan tara kadit men ne o nde, wo men nai sukjimnut do, men mewa men nggwa kadit men duwer an mo sukduno ne. Men nai sukjimnut do, men yo ben ye Kristen yi bi sukjimnut waiyu mo Yefun bi suk-i ne o nde.

¹⁴Ji si Ji bi Yekwesu Yesus Kristus tepsu yedik, sane anato ji jam rer do, sangge, sugit gato Yefun duyawa men git ne yo mo nde. Sarewo ye gato bi sukjimnut do, bere Yefun Allah bariket an mo gato an git sugit wis yo it yo, an git sugit ne bere siri ré.

¹⁵Sarewo ye Kristen yi me men git sugit gato an nut do, bere ben Yefun Allah bariket men, ete ye Kristen yi ne bi sukjimnut waiyu ndo nde mone it yo, men ben sukibit anane. Men yo ben suk tepsu ye gato bi sukjimnut sye kas subot ye yi anane nde. Yesus Kristus kwop wa ye ne, sane men mewa men nggwa subere men git sugit gato kak os wa ben ye ne ges mo os ibit mo koirut nde.

¹⁶Sane men mewa men nggwa subere, kapre men ben suk gato men nut do, ndo ne, men yo kak os wa ye yi ki men gum ibit mone nde.

¹⁷Yefun Allah tepsu men bi Yekwesu, sane it yo, men nutbot syur gato men da teker o nde, men nutbot sugit gato men git e ne teker o nde, wo men bi sukjimnut sye mo suk gato Yefun Allah Gen ben men nggiwa ben sato re: men nggiwa ben suk gato Yefun Allah iwa men ben e, men ku os wa men si Yefun Allah kem ndo su yu ne e, men mit at wa Yefun Allah bi suk-i e ne.

¹⁸Men ben suk gato Yesus Kristus iwa e, men si Kristus kem not e, men mit at wa Kristus bi suk-i e en. Ye gato bi an nggwa wa an ben suk bok re wa Kristus it yo, bere Yefun Allah mit iwa ye ne. Yefun iwa ye ne sor nde, wo bere yetu dom un ye ne gum mo suk gato ye ne ben ne.

¹⁹Sane men werwa men ben suk gato bere ós men sino kem ndo su yu. Men werwa men ben suk gato ós yu subere men sino onyar kem mo Yefun Allah nggi wai o et.

²⁰Yefun Allah fro os wa men yetu sok mo An bi rus-i. Sane ye yi do simo os gato Yefun fro ne it yo, men ben an brek kadit os ne mo sugit gato men dakai iwa men git ne nde. Men ben ye ne ibit sane nde. Sugit mwa ne ndo sino, sarewo men do git sugit gato ben ye yi bi sukjimnut waiyu orete ben ye ne ges satu mo os ibit it yo, men ben sukibit it anane.

²¹Sane men jam do men git suge ku anato ben men bi nji ges mo os ibit, sa ndo sa, men git suge ku o nde. Men jam do, men da nau anato ben men bi nji ges mo os ibit, sa ndo sa, men da nau o nde. Men jam do, men ben suk yo anato ben men bi nji ges mo os ibit, sa ndo sa, men ben suk sane o nde.

²²Sane sukduno subot sugit gato men nut do, ndo wa men git e, syur gato ndo wa men da e ne, men duwer nje subot sukduno ne nde, wo men ki men bi sukjimnut mone nai Yefun Allah dakai jam sor ré. Men nut do, sugit ne ndo, men bi sukjimnut we mone nde yo, sane men wadigan git sor, bere men mit at wa.

²³Sarewo ye gato bi sukjimnut we sare do, Yefun Allah iwa an git sugit ne bado, Yefun bariwa bado, orete an git sugit ne su an mit we mone yo, bere an bi sukjimnut waiyu, we an git sugit ne su an bi sukjimnut dik mo Yefun mo suk gato an ben ne nde. Sane men yo bi sukjimnut dik subot suk gato men ben ne nde, tepsu men ben sukibit it anane.