Read Abun Roma 15 Bible Online

Roma 15 - Abun bible

Roma 15

¹Ye gato bi sukjimnut yo nggi mo Yefun bi sukduno-i nde tó, an do ben bi suk-i siri kadit Yefun bi os-i it yo, men yé gato jom Yefun Allah bi sukduno-i krat, men ben men bi suk-i ne njep su an. Men misyar suk gato men dakai iwa men ben ne,

²ete men werwa men ben suk gato ós an et. Men gedik-gedik werwa men ben suk gato ndo su ye gato men ku ne subere men ós an bi sukjimnut nggi mo Yefun Allah wai o kadit nyim ne o ré.

³Men misyar suk gato men dakai iwa men ben ne, ete men ben suk wa men ós ye yi, we Kristus dom misyar suk gato An dakai iwa ben ne, ete ós men ré. Tepsu ye krom mo Yefun Allah bi sukdu, Yefun Yesus ki nai bi Ai do, “Sukkabor gato ye kabor Nan su ne, Ji ku win Nan ré.” Yefun Allah ete ós nin yé gato simo Yesus Kristus kem ndo su yu tepsu yedik sor

⁴Sukdu mwa gato ye krom mo Yefun Allah bi sukdu ne sino suga nyim tuya, ye krom wa duno men su. Men jom sukduno gato ós men ti nggi mo Yefun bi suk-i ne krat sa, bere ben men kwabom kam mo Yefun Allah sor.

⁵Yefun Allah ós men yetu jom sukduno ne krat. Yefun Allah ós men ti nggi mo An bi suk-i ne. Yefun Allah ete ós nin yé gato simo Yesus Kristus kem ndo su yu tepsu yedik sor.

⁶Sane bere nin sino tepsu yedik wa bes men bi Yekwesu Yesus Kristus bi Ai, Yefun Allah ne gum kok sye wai o ré.

⁷Sane Kristus kak An mit wa nin, sane nin waii kak nin mit wa yu, subere nin bes Yefun Allah gum kok mone.

⁸Ji ki sare do, Kristus ma kak os ndo wa ye Yahudi sok mo Yefun bi rus-i, subere ye jam do, suk gato Yefun Allah tom su men bi amui, An benbot it, An yo brek kadit nde.

⁹Kristus ma subere yewis yi neya bes Yefun Allah gum kok sye wai o ré dom. Yefun Allah dakai jimnotku yewis yi anato yewis yi bes Yefun Allah gum kok tepsu ye krom mo Yefun Allah bi sukdu subot Kristus do, “Yefun Allah ki do, ‘Sane bere Ji un Nan gum wa yewis yi ne jam sino. Bere Ji kos sukos un Nan gum.’ ”

¹⁰Ye krom subot yewis yi ne o do, “Nin yewis yi ne si ye gato Yefun Allah fro wa sok mo An bi rus-i ne, nin sino mit at mo suk gato Yefun fro ne et.”

¹¹Ye krom o do, “Nin yewis yi ne sino, nin un Yefun Allah. Yetu mwa ne sino mo buryo-buryo bes Yefun Allah gum kok sor.”

¹²Sane o, Yesaya krom do, “Yetu ge dik yo kadit Isai {gato Daud bi ai} bi wis-i bere ma mo bur re. Yefun Allah bes Ye ne wa jom yewis yi mwa ne mo buryo-buryo. Bere yewis yi kwabom kam mo Ye ne sor.”

¹³Sane Yefun Allah fro os wa nin anato nin kwabom kam mo An. Sane Yefun Allah ete ben nin mit at mo suk mwa gato An ben ne. Yefun ete ben nin kem ndo su yé mwa neya sino, we nin onyar kem mo Kristus. Yefun Allah Gen bi suktinggi ete ben nin kwabom kam mo Yefun Allah krat wai kadit nyim ne o ré.

¹⁴Ji bi nji, ji bi nyanggon, ji jam do, sangge, nin sa, nin ben nin bi suk-i ne ndo wai o ré. Nin jam subot sukdu gato ndo kom mo mit, ete nin owa nin duno yu su sukdu ne.

¹⁵Sarewo mo surat re, ji ki suknapa wa nin subot sukdu kwa bok yo. Sukdu bok gato ji krom re, ji yo gurik wan de, wo ji krom rer wa nin jam, we Yefun Allah dakai bes ji wa ki subot An bi sukdu ne rer sor.

¹⁶Ji anato tepsu Yesus Kristus bi pakwerut gato An syogat mu ki subot An bi sukdu nai yewis yi neya. Ji ben suk tepsu yegweswai gato gwat Yefun Allah bi sukdu subot os ndo gato Yesus Kristus kak ne mu wa ki nai yewis yi jam. Ji mu ki sukdu ne subere yewis yi ne brek kadit os ibit ete jammo Yefun Allah yo, bere án tepsu suksom gato tep wa yé som Yefun Allah su ne, bere Yefun Allah kak Yefun mit wa án.

¹⁷Yesus Kristus kak os ndo wa men yetu, sane anato ji mit at wa ji ben suk gato Yefun Allah syogat ji ben ne.

¹⁸Ji yo nggiwa ki subot suk yi neya nde, wo ji ki subot suk gato Kristus ben bor mo ji sor. Ji ki sukdu subot Kristus, ji ben suk tepsu Kristus mit. Sane anato Kristus tik yewis yi neya mit wa jammo Yefun Allah mo suk gato ji ben si suk gato ji ki ne ré. Ji ki sukdu subot Kristus, ji ben suk tepsu Kristus mit

¹⁹Ji ki subot suk gato Yefun Allah Gen ben ji nggiwa ji ki ne. Yefun Allah Gen ben ji nggiwa ji ben ye gato i ne ge e, ji sun ye gato kwop mbau satu e, ji syun semda wé e ne, ji ben suk bok ne anato ben yé mwa ne yeket ndo nde. Suk gato ji ben ne kadum Yefun Allah Gen bi suktinggi-i nai yé mwa ne jam ré. Ji ki sukdu subot os ndo gato Yesus Kristus kak wa men yetu ne mo pe mwa neya ketke mo kota Yerusalem, or o kadit ne sor kom mo kota Ilirikum ne ré.

²⁰Kadit kam nyim ji mit iwa ji mu ki sukdu subot os ndo ne nai ye gato jam nde tó, subere suk gato ji ben ne, ji fro kadit i-ke ne sor. Ji ki sukdu mo pe yo su ketke yo, tepsu ji fro bi pondasi anane, bere ji iwa. Wo ye yi ki sukdu mone su ketke ben sato ye yi ne fro bi pondasi anane. Sane ji waii ma kom ete ki sukdu mone o yo, tepsu ji nggo nu mo ye yi bi pondasi anane, bere ji bariwa ré. Wo ji ki sukdu ne mo i-ke sa,

²¹bere tepsu ye krom mo Yefun Allah bi sukdu do, “Ye gato ye yo ki sukdu subot Yefun nai an jam nde tó, bere ye ne jam ré. Ye gato jam nde sukdu subot Yefun ne, bere an jam o ré.”

²²Ji mu ki sukdu subot Yesus Kristus nai nje mo pe yi neya wam bok yo anato ji yo ku os wa ji ba kun nin nde tó.

²³Sarewo su re sa, suk gato ji ben mo peyo-peyo ne or ré. Ji iwa ji ba ku nin, tahun bok yo it anare, sane

²⁴ji do mu mo bur Spanyol it yo, bere ji ku nin. Ji do mu mo bur Spanyol it yo, bere ji wai ket nin bi kota-i, sane ji nut do, bere ji is mone ku nin ré. Bere ji si nin kem mone kam bok yo rek, ji si nin mit at wa ku yu sino mone, orete nin ós ji waii mu mo bur Spanyol o.

²⁵Sarewo ji yo ba ku nin nde tó, we su re, ji mu mo kota Yerusalem or et. Ji mu mo Yerusalem subere ji gwat sugum wa ós ye gato onyar kem mo Yefun Yesus mone.

²⁶Ji gwat sugum gato nje mo nu ari mo bur Makedonia si bur Akhaya sum ne. Án mit iwa án sum sugum wa ós ye gato onyar kem mo Yefun Yesus deyo gato yewa suk mo kota Yerusalem.

²⁷Án iwa sum sugum wa yémwa ne. Suk ne ndo wa án ben dom ré, we ye Yahudi ne kak os wa Yefun Allah ós yewis yi kem ndo to kapyo mato kapyo. Sa ndo sa, yewis yi ne waii kak os wa ye Yahudi ku suk gato án yewa mo bur re dom.

²⁸Sane bere ji mu mo Yerusalem, ete ji syo sugum mwa ne sino nai yé gato kem mone. Ji ben suk gato ye syogat ji ben ne or yo, ji mu mo bur Spanyol it anane. Ji do mu mone yo, bere ji ba ku nin mo nin bi kota-i, ete ji wai kadit nin mu mo bur Spanyol.

²⁹Ji do ba ku nin it yo, bere ji ben sukndo su nin tepsu Kristus ben sukndo su men mo suk mwa ne sino.

³⁰Ji bi nji ji bi nyanggon, ji ndekwa nin ki suk su Yefun Allah wa ji, nin ki su nin mit dik si nin onyar dik. Nin werwa nin ki suk su Yefun wa ji subere ji nggiwa ji ki subot Yefun bi sukdu-i. Nin benadi wa ji yo, tepsu nin si ji ben suk mone sino anane. Nin ki suk su Yefun yo, bere men bi Yekwesu Yesus Kristus ben nin nggi mone. Sane o, Yefun Allah Gen bi sukjimnut sye kas subot men anato nin ku suktinggi wa nin benadi ne dom.

³¹Nin ki suk su Yefun subere Yefun Allah mewa ji kadit ye gato jam nde Yefun mo bur Yudea subere yé mone yo ben sukye nai ji nde. Nin ki suk su Yefun subere ji gwat sugum mu mo Yerusalem yo, bere ye gato onyar kem mo Yefun Yesus mone mit iwa suk gato ji ben ne dom.

³²Sane nin benadi subere Yefun Allah mewa ji mone, orete Yefun Allah imo yo, Yefun kak os wa ji ba ku nin, subere ji mit at wa, ete men ku yu, men ós yu, men sino mit ndo mone.

³³Yefun Allah gato ós men kem ndo su yu ete sisu nin sino. Sangge.