Read Abun Roma 4 Bible Online

Roma 4 - Abun bible

Roma 4

¹Sane bere men ki sukdu sato suma subot men bi amui, Abraham ne? Yenggras ne nutbot ye Yahudi bi sukduno-i ne te, sukduno ne kak os wa men sok mo Yefun Allah bi rus-i ne bado, sa u ne?

²Abraham ku os wa Yefun Allah nai Abraham gum sok mo Yefun bi rus-i mo gato Abraham ben bi suk-i ne ndo tepsu ye Yahudi bi sukduno-i yo, bere Abraham ku os wa bes an nggwa kok mone ré. Sarewo Abraham yo ku os wa bes an nggwa kok mo Yefun Allah gwem yo mo nde.

³Tepsu ye krom mo Yefun Allah bi sukdu do, “Abraham onyar kem mo sukdu gato Yefun Allah ki nai an, sane anato Yefun Allah nut mo Abraham do, an sa, tep wa sok mo Yefun Allah bi rus-i it.”

⁴Ye gato ben suk, bere ku sugum mo bi kamba. Sugum ne ye yo bi nai an yi nde, wo ye bi tepsu an bi kamba ne.

⁵Sarewo ye gato nut do, an kamba wa benbot ye Yahudi bi sukduno-i subere Yefun Allah nut mo an do, an tep wa sok mo Yefun Allah bi rus-i ne yo, bere siri ré, Yefun Allah yo nai ye ne sok mo bi rus-i nde. Sarewo ye gato yo nutbot an bi kamba nde, wo an kwabom kam mo Yefun Allah do, bere Yefun nai an wé kadit sukye gato an ku mo os ibit, sane bere Yefun Allah nut mo ye ne do, “Ye re sa, onyar kem mo Ji it, sane Ji nai an gum sok mo Ji bi rus-i sor.” Yefun nai an sok mo Yefun bi rus-i mo an bi kamba nde, wo Yefun nai an sok mo Yefun bi rus-i mo gato an onyar kem mo suk gato Yefun ki ne sor.

⁶Sane dom, Daud bi sukjimnut-i tepsu sukdu ne. Daud ki do, “Ye gato Yefun Allah nut do, ‘Ye ne sa, an yo bi sukjimnut sye mo suk gato an dakai ben ne nde, wo an onyar kem mo Ji, sane an sa, tep wa sok mo Ji bi rus-i it,’ sane bere ye ne mit at wa.” Daud ki sukdu subot ye gato sok mo Yefun Allah bi rus-i sare do,

⁷“Ye gato Yefun Allah yo nutbot bi sukibit ne o nde, bere ye ne mit at wa. Ye gato Yefun Allah ben sato rom bi sukdaret wé kadit an, tepsu ye rom sukkwik mo bur ne wé, ete ye nutbot o nde, sane bere ye ne mit at wa.

⁸Ye gato Yefun Allah yo ben sukye nai mo sukibit gato an ben ne o nde, bere ye ne mit at wa.”

⁹Mo Daud bi sukdu ne, ye gato mit at wa ne te, ye gato simo sunat sor ré, bado, ye gato yo simo sunat nde dom e? Sunat mo yo, sunat mo nde yo, suk yo nde, wo men ki mó ré, sare do, Abraham onyar kem mo suk gato Yefun Allah ki ne anato Yefun Allah nut mo an do, “Abraham re sa, tep wa sok mo Ji bi rus-i it.”

¹⁰Sane Yefun Allah ki sukdu ne nai Abraham su kam u ne? Te Abraham simo sunat nyim bado, Abraham simo sunat wari, ete Yefun ki nai an bado? Sare, Abraham yo simo sunat nde tó, Yefun Allah nai Abraham gum sok mo An bi rus-i nyim wé ré.

¹¹Orete Yefun Allah syogat Abraham subere an simo sunat. An simo sunat tepsu sukkran subere yé mwa jam do, Yefun Allah nut mo an do, an sa, tep wa sok mo Yefun Allah bi rus-i it. Sane Abraham onyar kem mo suk gato Yefun Allah ki ne nyim wé anato Yefun iwa nai an gum sok mo bi rus-i, wo Abraham simo sunat wari. Sane Abraham anato tepsu ye gato kadum os wa yé mwa gato onyar kem mo Yefun Allah, gato yo simo sunat nde. Kapre án yé mwa ne yo simo sunat nde, Yefun Allah ki mo án do, án sa, tep wa sok mo Yefun Allah bi rus-i it.

¹²Abraham dom, an tepsu ye gato kadum os wa yé mwa gato simo sunat. Abraham kadum os wa yé mwa gato simo sunat sor nde, wo an kadum os wa yé mwa gato onyar kem mo Yefun dom. Men bi amui Abraham yo simo sunat nde tó, an onyar kem mo Yefun suga nyim tuya ré.

¹³Yefun Allah tom su Abraham si bi wis-i ne sino sare do, “Suk mwa gato mo bur re bere sok mo nan si nan bi wis-i o ré.” Yefun Allah tom sukdu su Abraham mo gato an benbot ye Yahudi bi sukduno-i nde, wo Yefun Allah tom sukdu su Abraham mo gato Abraham onyar kem mo suk gato Yefun Allah ki ne, anato Yefun Allah ki do, Abraham sa, tep wa sok mo Yefun bi rus-i it.

¹⁴Sane yé do benbot ye Yahudi bi sukduno-i anato yé ku suk mwa gato Yefun tom ne it yo, bere yé onyar kem mo Yefun Allah wa suma ne? Yo ós nde, bere yé yo ku suk gato Yefun tom ne nde.

¹⁵Sarewo men do werwa men benbot ye Yahudi bi sukduno-i yo, bere men yo ku suk gato Yefun Allah tom ne nde, wo bere men ku Yefun Allah bi sukmaskwa mo suk gato men ben suk siri kadit sukduno ne sor ré. Yé duno men su sukduno ne mó ré, anato men ben suk siri kadit, wo sukduno ne yo mo nde yo, bere men jam nde ré.

¹⁶Sane suk gato Yefun Allah tom ne kem su ye gato onyar kem mo An sor. Abraham bi wis-i sor ré, bere ku suk ne, we án sino onyar kem mo Yefun Allah it. Abraham bi wis-i yo kamba wa ben suk yo wa ku suk gato Yefun Allah tom ne nde, wo Yefun Allah dakai bi sukjimnut sye kas subot án anato Yefun Allah syo suk gato Yefun tom su ne dakai yi nai án sor. Sane anato Abraham bi wis-i mwa ne sino jam do, sangge, bere án ku suk gato Yefun Allah tom su án ne it. Suk gato Yefun Allah tom ne, Yefun tom su Abraham bi pa-i gato ye Yahudi bi sukduno-i kem su ne sor nde, wo Yefun Allah tom su ye gato sok mo Abraham bi wis-i mo gato án onyar kem mo Yefun Allah sagato Abraham onyar kem mo Yefun ne. Abraham gare tepsu ye gato kadum os wa men yé mwa ne sino gato onyar kem mo Yefun Allah ne, Yefun Allah tom sukdu su Abraham mo gato Abraham onyar kem mo suk gato Yefun Allah ki ne

¹⁷tepsu ye krom mo Yefun Allah bi sukdu, Yefun Allah ki nai Abraham do, “Ji anato bes nan tepsu ye gato duk os su ketke wa yewis mwa gato kem mo bur re or sino.” Yefun Allah tom suk su Abraham anato ben sato Abraham tepsu men bi ai ré. Abraham onyar kem mo suk gato Yefun Allah ki ne. Abraham jam do Yefun Allah anato nggiwa sun yekwop mbau satu, Yefun Allah nggiwa ut suk gato yo mo nde, Yefun Allah ki sukdu ne sor, bere suk ne bor ré.

¹⁸Kapre ye nut do, suk gato Yefun Allah ki ne bere yo bor nde tó, Abraham kwabom kam mo Yefun, Abraham onyar kem pe mo Yefun sor, sane anato Abraham tepsu yeketke mo yewis mwa, tepsu ye krom Yefun Allah bi sukdu do, “Nan bi wis-i bere mwa wai o ré.” Abraham kwabom kam mo Yefun, Abraham onyar kem pe mo Yefun sor

¹⁹Abraham jam do, suk gato Yefun Allah tom ne bere bor ré. Sugane Abraham me do, an ka yenggras rok it, an kaim sa karowa kom mo tahun wotin dik it. Sane an nut do, an kaim yo nggi tep wa ku pa o nde bayok. Sane dom, an bi nggon Sara nukwerit pe ré. Sarewo Abraham onyar kem pe mo Yefun sor. An bi sukjimnut yo brek kadit suk gato Yefun tom ne wokgan yo dom nde.

²⁰Abraham bi sukjimnut we subot suk gato Yefun tom ne nde, wo an onyar kem pe mo Yefun ne nggi wai kadit nyim ne o ré, ete an bes Yefun Allah gum kok sye wai sor.

²¹An jam do, sangge, suk gato Yefun Allah tom ne, bere Yefun Allah anato nggiwa benbot mone tó, Abraham jamwa pe ré.

²²Sane anato Yefun Allah nut mo Abraham do, “Ye re sa, an onyar kem mo suk gato Ji ki ne, sane an sa, tep wa sok mo Ji bi rus-i it.”

²³Sukdu gato ki do, “Yefun Allah nut mo Abraham do, ye re sa, an onyar kem mo suk gato Ji ki ne,” ye krom sukdu ne subot Abraham sor nde,

²⁴wo ye krom sukdu ne subot men dom. Sane Yefun Allah me do, men onyar kem mo Yefun Allah gato sun men bi Yekwesu Yesus Kristus kadit sukkwop ne it yo, Yefun nut mo men do, men sa, tep wa sok mo An bi rus-i it.

²⁵Yesus Kristus re, Yefun Allah bi ma wa ye gu kwop win men mo sukibit gato men ben ne. Orete Yefun Allah sun An kadit sukkwop subere kak os wa Yefun Allah nai men gum sok mo An bi rus-i subere men si Yefun Allah kem ndo su yu it.