Read Abun Roma 5 Bible Online

Roma 5 - Abun bible

Roma 5

¹Sane su re Yefun Allah ki do, men sa, tep wa men gum sok mo An bi rus-i, we men onyar kem mo Yesus Kristus it. Sane anato men yo ku sukmaskwa kadit Yefun Allah o nde, wo men si Yefun Allah kem ndo su yu sor. Men bi Yekwesu Yesus Kristus anato kak os ne wa men ré.

²Men onyar kem mo Yesus Kristus sane Yesus Kristus kak os wa men dakai yi anato men si Yefun Allah kem ndo su yu. Men jam do, sangge, bere men kem ndo wai tepsu Yefun Allah kem ndo wai o ré, sane men mit at wa.

³Men mit at mone sor nde, wo men mit at mo sukye gato men ku ne dom, we men jam do, sukye gato men ku ne, bere ben men nggiwa ben suk gato ndo pe sor, men yo sombok kadit suk gato men ben ne nde.

⁴Men sombok kadit sukndo gato men ben ne nde, wo men ben pe, sane bere ben men bi sukjimnut nggi mone o ré. Men bi sukjimnut nggi it yo, bere ben men kwabom kam mo Yefun Allah do, bere Yefun syo suk gato An tom ne nai men mone tó.

⁵Men kwabom kam mo Yefun Allah sane bere men damen mone nde, we bere suk gato An tom ne bor mone tó, we men jam do, Yefun Allah Gen gato bok nggwa mo men anato kadum nai men do, Yefun Allah bi sukjimnut sye kas subot men ré.

⁶Tepsu kam gato Yefun Allah fro ne, men yo ku os mo nde tó, Kristus ma kwop win men yetu gato bariket Yefun Allah ne.

⁷Sarewo yetu ge dik yo gato iwa bi nggwa kwop win ye gato ben bi suk-i ndo tepsu Yefun Allah mit, men ku ye ga sane ndaf nde. Sane dom, ye gato ben bi suk-i ne ndo, bere yetu ge dik na sor ete fro nggwa wa kwop wa ye gane bayok.

⁸Sarewo men ben men bi suk-i siri kadit Yefun Allah mit tó, sugane Yesus Kristus ma bi nggwa kwop win men. Sane anato men jam mone do, Yefun Allah bi sukjimnut sye kas subot men ndo nde.

⁹Yesus Kristus dé sye, An kwop win men anato An kak os wa Yefun Allah ki do, men yo ku sukye mo sukibit gato men ben ne o nde, wo Yefun nai men gum sok mo An bi rus-i it. Sane it yo, bere Kristus nai men wé kadit Yefun Allah bi sukmaskwa ne dom. Yesus Kristus ku sukmaskwa ne win men it.

¹⁰Suga nyim men bariket Yefun Allah, sarewo Yefun Allah syo An bi Gan ma kwop kak os wa men si Yefun Allah kem ndo su yu. Sane su re, Kristus mbau, ete men si Yefun Allah kem ndo su yu it, sane bere Kristus kak os wa men kem ndo mo Yefun Allah bi nat-i ne o ré.

¹¹Men mit at mo suk ne sor nde, wo men mit at wa Yefun Allah mo suk mwa gato men bi Yekwesu Yesus Kristus ben ne dom ré. Kristus kak os ndo wa men, anato men si Yefun Allah kem ndo su yu it.

¹²Yetu ge dik yo kak os wa yetu mwa ne sino anato men ben sukibit mo bur re. Ye ge dik ne ben sukibit anato an kwop ré. Kom mo rut sa, ye ne kak os wa yetu mwa mo bur re sino kwop, we yé mwa ne sino ben sukibit tepsu an ré.

¹³Yefun Allah yo syo bi sukduno-i nai ye Yehudi nde tó, yé mwa mo bur re sino ben sukibit mó ré, sarewo tomgato sukduno yo mo nde tó, Yefun Allah yo newa sukibit ne nde tó.

¹⁴Kapre Yefun yo newa sukibit ne nde, yetu mwa ne sino kwop ré. Kadit kam gato Adam kem mo bur re sor kom mo kam gato Musa krom ye Yahudi bi sukduno-i ne, yetu mwa ne sino kwop ré. Kapre yetu yo ben siri tepsu Adam ben ne nde, yé mwa ne kwop or. Yefun Allah da ki sukdu nai Adam, sarewo Adam dakai ben suk wai mo sukdu ne o ré. Adam gane anato tepsu sukamno subot Ye gato ma wari ne.

¹⁵Adam si Kristus, ye we ne yo tepsu yu nde. Adam kak os ibit, wo Kristus kak os ndo wa men. Os ndo gato Yefun Allah fro yi wa men yetu mo bur re mo suk gato Kristus ben ne ndo wai kadit os ibit gato Adam kak ne. Sukibit gato Adam ben ne gwat os sukkwop wa yé mwa ré. Wo Yefun Allah bi yetu ge dik, Yesus Kristus ma wa kak os ndo wa men yetu subere men kem gesyos. Yefun Allah dakai bi sukjimnut sye kas subot men yetu ndo nde anato Yefun Allah syo Yesus Kristus ma wa men yetu mo bur re dakai yi, men yo ben suk yo wa An nyim nde. Sane anato men yetu sino bi os wa men kem gesyos mone o ré.

¹⁶Os gato Yefun Allah fro wa men yetu kem gesyos ne yo tepsu os gato Adam kak mo suk gato an ben wai mo Yefun bi sukdu ne nde. Adam ben suk wai mo Yefun wam dik ne sor, orete Yefun ki bi sukdu-i do, “Siri ré, Ji syo sukye nai yetu mone sor,” sane An kak os sukkwop wa men yetu sino it. Sarewo yetu kem sor kom mo kam gato Kristus ma ne, yetu ben sukibit mwa yé, orete Yefun Allah fro os ndo ne gato ós men yetu kem gesyos ré.

¹⁷Kadit sukibit gato yetu ge dik ben ne anato yé mwa mo bur re kwop. Sarewo kadit sukndo gato yetu ge dik yo o, gato gum do, Yesus Kristus ben ne anato men yetu ku os wa men kem gesyos. Os ndo gato Yesus Kristus kak wa men ne ndo wai kadit os sukkwop gato kak mo sukibit gato Adam ben ne o ré. Yefun Allah ben An bi suk-i ndo yé su men dakai yi, sane ye gato kak an mit wa os ndo gato Yefun Allah syogat Yesus Kristus kak ne, bere Yefun Allah ki do, ye ne sa, tep wa an gum sok mo Yefun bi rus-i. Sane bere an ku suktinggi sugato an kem mo bur re ré.

¹⁸Sane kadit sukibit gato yetu ge dik ben ne anato Yefun Allah syo sukye nai yetu mwa mo bur re or sino. Sane dom kadit sukndo gato yetu ge dik yo o ben tepsu Yefun Allah mit ne anato Yefun kak os ndo wa men yetu mwa ne sino. Yefun Allah nai men wé kadit sukye mo sukibit gato men ben ne, orete Yefun Allah ki subot men do, men sa, tep wa men gum sok mo An bi rus-i it. Sane men ku os wa men kem ndo to kapyo mato kapyo.

¹⁹Yetu ge dik gato bariwa jammo Yefun Allah, ye ne anato kak os wa yé mwa ne sino ges mo os ibit ré. Sane dom yetu ge dik yo o, gato jammo Yefun Allah, Ye ne anato kak os wa yé mwa subere Yefun ki do, yé mwa ne tep wa án gum sok mo Yefun Allah bi rus-i it.

²⁰Ye Yahudi bi sukduno-i anato Yefun Allah grem su ye Yahudi ne. Sukduno ne kak men yetu bi sukjimnut mo suk gato ibit, sane anato ri ma men ben suk mwa gato siri kadit sukduno ne o ré. Yetu da ben siri mwa wai o kadit sukduno ne, sarewo Yefun Allah bi sukjimnut sye kas subot men dakai yi nggi wai kadit ne o ré.

²¹Sane anato tepsu sukibit gato men ben ne jom men anato men kwop mone, Yefun Allah bi sukjimnut sye kas subot men dakai yi dom, men yo ben suk yo wa An nyim nde, anato An fro os wa men subere An nai men wé kadit sukye. Orete An ki mo men do, men sa, tep wa men gum sok mo An bi rus-i it. Sane men kem gesyos mo os ndo gato men bi Yekwesu Yesus Kristus kak ne, sane anato men si Yefun Allah kem ndo to kapyo mato kapyo.