Read Abun Roma 7 Bible Online

Roma 7 - Abun bible

Roma 7

¹Ji bi nji, ji bi nyanggon, sangge, nin sino jam men yetu bi sukduno-i ré. Yetu mbau tó yo, an jammo yetu bi sukduno-i sor, wo an do kwop it yo, an yo jammo o nde.

²Sane dom nggon gato kra si bi ya ne kem not sor wade nggon ne bi ya kwop wé et. Nggon bi ya do kwop it yo, yekra bi sukduno-i gato kiwa nggon si bi ya kem not yo jom nggon ne o nde ré.

³Sane, nggon bi ya kem tó, ete nggon ne mu nai ye yi kadit an bi ya yo, nggon ne ben siri it anane. Sarewo nggon bi ya do kwop it yo, sukduno ne ya yawa nggon ne o nde. Nggon iwa kra ye yi yo o yo, nggon kra sor, siri anane nde, wo ribot os anane.

⁴Sane, ji bi nji, ji bi nyanggon, tepsu yekra bi sukduno-i yo jom nggon gato bi ya kwop kadit ne o nde, ye Yahudi bi sukduno-i ben sato kwop kadit nin ré, sukduno ne yo jom nin o nde, we nin si Yesus Kristus tepsu dik, ete nin si An sino kwop kadit sukduno ne ré. Sane ye Yahudi bi sukduno-i yo jom nin o nde, wo nin jammo Kristus bi sukduno-i, we nin tepsu Kristus bi yetuge-i it. Nin jammo Kristus gato Yefun Allah sun kadit sukkwop ne bi sukduno-i subere sukndo gato Yefun Allah iwa men ben ne bor ré.

⁵Suga nyim ne, sukjimnut gato tik men mit wa ben sukibit tepsu yetu mwa ne sino iwa ben ne jom men ré. Sugane ye Yahudi bi sukduno-i ben sato tik men bi sukjimnut ibit mo men mit anato men ben sukibit mwa o ré. Men bi men nggwa wa jammo sukjimnut ibit anato kom mo rut suk mwa gato men ben ne gwat os sukkwop wa men sor. Men bi men nggwa wa jammo sukjimnut ibit anato kom mo rut suk mwa gato men ben ne gwat os sukkwop wa men sor

⁶Sarewo su re, men sombok kadit ye Yahudi bi sukduno-i ne it. Suga nyim ne sukduno ne jom men krat, wo su re ben sato men kwop kadit ré. Men sombok kadit sukduno ne, subere men jammo os be tepsu sukdu gato Yefun Allah Gen kadum nai men ré. Sane men yo jammo ye Yahudi bi sukduno-i gato Musa krom ne o nde, wo men jammo sukduno gato Yefun Allah Gen kadum nai men ne sor.

⁷Sane, bere men kibot ye Yahudi bi sukduno-i ne sa u ne? Sukduno ne ibit bado? Sane nde ré. Sukduno ne da ndo, sarewo ji jam sukduno ne anato ós ji subere ji jam suk gato ji ben ibit ne, ondeyo bere ji jam nde ré. Sato sukduno ne ki do, “Men gro sye wa nai ye yi bi suk nde,” anato ji jam do, ji do gro sye wa nai ye yi bi suk it yo, bere siri ré.

⁸Ye Yahudi bi sukduno-i anato kak os wa tik ji mit wa ji ben sukibit. Ji jam sukduno ne, bergan sukduno ne tik ji bi sukjimnut subere ji gro sye wa ye yi bi suk mwa ne o ré, bere sukduno ne tik ji mit wa ben suk siri kadit sukduno ne mwa o ré. Sarewo sukduno ne yo mo nde yo, bere ji bi sukjimnut ne yo kas kom mo sukibit sane mo nde.

⁹Suga nyim, ji jam nde ye Yahudi bi sukduno-i yo, ji kem mo bur re, ji dakai ben ji bi suk-i sor. Sarewo sukduno ne bor sa, sukduno ne tik ji bi sukjimnut anato ji ben sukibit mwa kas kadit ne it, orete ben sato ji kwop mone or ré.

¹⁰Ji nut do Musa krom ye Yahudi bi sukduno-i subere ós men kem ndo, ondewo, kom mo rut sa, sukduno ne yo ós ji kem ndo nde, wo gwat sukkwop wa ji o ré,

¹¹we sukduno ne kak os wa sukibit ben kidar ji, orete ben sato sukibit ne gu ji kwop or ré.

¹²Ye Yahudi bi sukduno-i, Yefun Allah dakai grem kem su ye Yahudi. Kwa bok ne sino ma kadit Yefun Allah. Sane sukduno ne sangge, ete kadum os gato ndo tepsu Yefun Allah mit.

¹³Sane sukduno gato ndo ne anato gwat sukkwop wa ji bado? Sane nde ré, wo sukibit gato ji ben ne anato gwat sukkwop wa ji ré. Sukduno ne da ndo, sarewo sukduno ne kadum suk gato ibit nai ji jam rer anato kak os wa sukibit gwat sukkwop wa ji. Sukduno ne da ndo, sarewo sukduno ne kak os wa gwat sukkwop wa men subere men jam do, suk gato men ben siri kadit sukduno ne ibit tep yi nde, wo suk gato men ben siri kadit sukduno ne ibit wai o ré. … sukjimnut ibit mo ji mit gato jom ji anato ben ji ben sukibit ne

¹⁴Men jam do, ye Yahudi bi sukduno-i ma kadit Yefun Allah Gen, sarewo ji tepsu yetu gato yo nggi nde sor ré. Ji bi ji nggwa wa sukjimnut ibit ne jom ji tepsu bi pakwerut ré.

¹⁵Sane sukndo gato ji iwa ji ben ne, ji yo ben nde. Sarewo sukibit gato ji bariwa ji ben ne anato ji ben. Ji jam nde suk gato ben ji anato ji ben ji bi suk-i sane ne!

¹⁶Sane, ji ben sukibit gato ji bariwa ji ben ne yo, bi sukjimnut do, ji nut do, sangge, ye Yahudi bi sukduno-i ne da ndo, sarewo ji dakai yo nggiwa benbot nde.

¹⁷Sane, ji dakai yo ben sukibit ne nde ré, wo sukjimnut ibit mo ji mit gato jom ji anato ben ji ben sukibit ne.

¹⁸Ji jam do, sukjimnut gato tik ji mit wa ji ben suk tepsu yetu mwa ne sino iwa ben ne, bi kwa dik yo gato ndo yo mo nde, suk mwa ne ibit sino. Ji da iwa ben suk gato ndo, sarewo ji yo nggiwa ben nde.

¹⁹Ji yo ben sukndo gato ji iwa ji ben ne nde, wo ji ben sukibit gato ji bariwa ji ben ne sor.

²⁰Ji ben sukibit gato ji bariwa ji ben ne yo, bi sukjimnut do, ji dakai bi sukjimnut wa ben sukibit ne nde ré, wo sukjimnut gato tik ji mit wa ji ben sukibit gato jom ji anato ben ji ben sukibit ne.

²¹Sane, ji nai sukjimnut sare do, sukjimnut gato bor mo ji anare: ji da iwa ben sukndo sarewo sukjimnut ibit bere jom ji anato ji ben ji bi suk-i ne ibit o ré.

²²Mo ji mit si ji onyar re, ji da mit iwa ji benbot Yefun Allah bi sukduno-i,

²³sarewo ji me mo ji dakai, sukjimnut gato bor mo suk gato ji gro e, ji syim e, ji gwes e ne ben ne tara ré. Sukjimnut ibit ne ben sato duwer ji dakai bi sukjimnut-i. Sukjimnut ibit ne ben sato farket ji dakai anato ji tepsu pakwerut wa ben sukibit bu.

²⁴Sane ji dakai mit iwa ji tepsu pakwerut wa benbot Yefun Allah bi sukduno-i, wo ji bi sukjimnut ibit mo ji mit ne, ben ji wade ji tepsu pakwerut wa ben sukibit bu. Sane, ji yo ndo o nde it. Je u anato bere nai ji wé kadit sukjimnut ibit gato jom ji dakai ete gwat ji mu kadit os sukkwop re ne? Ji ki ndo mo Yefun Allah, we Yefun fro os mó ré. An sa, syo men bi Yekwesu Yesus Kristus ma wa fro os wa men ré. An fro os wa nai ji kadit sukjimnut ibit gato jom ji ne, sane ji ki ndo mo Yefun Allah sor.