Read Abun 1 Korintus 10 Bible Online

1 Korintus 10 - Abun bible

1 Korintus 10

¹Ji bi nji, ji bi nyanggon, nin napawa tomgatu men bi amui simo Musa mubot os mo pe gato kwe si sugit yo mo nde. Sugane nyotem kadum os wa án yé mwa ne sino mubot os ne sor, án mubot sem gato gum do, Sem Er ne mit.

²Sane ben sato Yefun ras án mo nyotem mo sem mit ne, tepsu bi sukjimnut do, án simo musa it.

³Mo pe ne, Yefun Allah bi suktinggi bor, Yefun Allah syo sugit wa án git, ete án sino git sugit gato Yefun syo nai án ne.

⁴Mo pe ne syur yo mo nde, sane Yefun Allah bi suktinggi bor mone. Yefun Allah ben syur syesyar kadit banbo jok, ete án sino da syur gato Yefun syo nai án dom. Banbo jok gato ós án yé gato sosa ne anato tepsu Yesus Kristus dakai.

⁵Yefun Allah da ben suk mwa gato ndo su án, sarewo án nap sye Yefun Allah yo iwa nde. Sane anato yé mwa kwop daret mo pe gato kwe yo kom mo nde.

⁶Suk mwa bor mone kadum os wa men subere men waii mit iwa ben suk gato ibit sato men bi amui ben ne o nde.

⁷Sane dom men som sukdaret sato án deyo som ne o nde. We yé krom mo Yefun bi sukduno do, “Yewis ne git sugit, da nau, kamo ete som sukdaret.”

⁸Sane dom men waii ben siri su yu daret sato án deyo ben siri su yu ne o nde, we sugane yetu ge ribu musyu we sop gri kwop su kam dik yo mo sukibit gato án ben ne.

⁹Suk gato men bi Yekwesu Yefun Yesus duyawa men ben ne, men ben nde, we tomga nyim ne án deyo ben suk gato Yefun duyawa ne, orete kwis gu ye gane kwop or.

¹⁰Sane dom, men iswen Yefun sato án deyo ben nyim ne dom nde. Sugane malaikat gato gwat sukkwop ne ma gu án gato iswen Yefun kwop or.

¹¹Suk mwa gato bor mo án ne anato kadum os wa men ye yi ne. Suk mwa ne yé krombot subere tepsu suknapa wa men, we men anato ye gato kem mo bur re sor karowa bur re kru it.

¹²Sane ye to nut mo an dakai do, an sa, ye gato onyar kem pe mo Yefun Yesus it yo, ndo sa an mewa an nggwa, sawe an ges satu mo os ibit o.

¹³Suk mwa ma tik nin mit wa nin ben suk siri kadit Yefun bi os-i. Sane dom, yé mwa meret os wa nin subere ben nin ges mo os ibit. Yé mwa meret os wa nin sane sor nde, wo ye meret os wa men yetu mwa ne sino mo bur re. Sarewo Yefun Allah ben suk su men tepsu An tom ne, An yo misyar suk mwa ne tik men mit teker eta nde. An yo misyar yé mwa meret os wa men nde, wo suk mwa ma tik men mit wa men ben suk siri kadit Yefun bi os-i mó yo, sugane Yefun Allah kak os yi wa men, subere men yo ges mo os ibit nde.

¹⁴Sane ji bi nji, ji bi nyanggon gato ji jimnotku, men som sukdaret nde, men jammo sukdaret nde, wo men kas mu wé kadit sukdaret ne sor.

¹⁵Ji ki sukdu re nai nin, we ji nut do, nin anato tepsu yé gato bi sukjimnut ko. Nin dakai nutbot sukdu gato ji ki re et.

¹⁶Men ki ndo mo Yefun Allah, orete men da nau anggur, bi sukjimnut do, men sino tepsu dik mo gato men da Yesus Kristus dé ne sino, bado? Sane dom, roti gato men syat wa men git subere men napawa Yefun Yesus, men git roti ne yo, bi sukjimnut do, men sino tepsu dik mo Yesus Kristus bi rus-i, gato tepsu An kaim ne, bado?

¹⁷Sangge, men sino tepsu dik, we roti ne gum dik sor ré. Sane men yé mwa gato git roti gum dik ne sino, men sino tepsu kaim dik it anane.

¹⁸Men nutbot ye Yahudi gato git suge ku gato yé gwat ma wa som Yefun Allah su ne. Yé gwat ma, yé gre mo bot kot gato kok mo Yefun Allah bi nu wa yé gre suge wa yé som Yefun su or wé eteyo, yé git. Yé gato git suge ku mo nat ne, án sino tepsu dik su Yefun Allah mone it.

¹⁹Sane ji ndobot nin do, sugit gato yewis yi gwat ma wa som sukdaret su ne te, sugit ne bi suktinggi mó, bado nde e? Yo mo nde. Sane dom, sukdaret gato yé onyar kem mone te, bi suktinggi mó bado nde, e?

²⁰Yo mo nde, wo suk mwa gato yewis yi som ne, án yo som Yefun Allah nde, wo án som biris bi rus-i sato yerom e, aboksye e, yeyau e ne sor ré. Ji bariwa nin si biris bi rus-i ne tepsu dik sane.

²¹Men si nje da nau anggur wa napawa suk gato Yefun Yesus ben ne, ete men waii mu som biris bi rus-i digane dom, sane bere siri ré. Sane dom, men git roti wa men napawa Yefun Yesus, ete men waii mu si yé git sugit wa som biris bi rus-i sio dom, bere siri ré.

²²Men fros Yefun bi os-i sibiris bi rus-i sato yerom e, aboksye e ne bi os-i sane yo, bere men ben Yefun maskwa men mone o ré. Men iwa men ben An maskwa mone bado? Men anato nggi wai kadit An anato men dakai ben An maskwa mone bado?

²³Yé ki do, “Suk mwa ne ndo sino, men dakai ben ket men i sor.” Sangge, sarewo ji ki do, suk mwa ne sino yo ós men nde. Yé ki do, “Suk mwa ne ndo sino, men dakai ben ket men í sor,” sarewo suk mwa ne yo ós men kem ndo mo bur re nde.

²⁴Men ben men bi suk-i mo bur re yo, men nutbot men dakai bi suk-i sor nde, wo men nutbot ye yi et, men werwa men ós ye yi sor.

²⁵Suge ku gato yé so mo pasar, men git sor, men ndobot nyim dom nde. “Men git suge ku gato yé som sukdaret su ne nde,” sane bere siri ré. Men misyar sukjimnut sane, men git suge ku ne sor, men fowa nde,

²⁶we yé krom mo Yefun bi sukdu do, “Bur re si suk mwa mo bur re sino anato Yefun Allah bi suk-i.”

²⁷Sane yetu ge dik yo gato jam nde Yefun Yesus kendo men ma si an git sugit, ete men iwa si an git sino it yo, men si an git sugit gato an fro wa men git ne sor. Men bi sukjimnut mo men mit do, “Men git suge ku gato yé som sukdaret su ne nde,” sane bere siri ré, men misyar sukjimnut ne, men ndobot nde, men git sugit ne sor.

²⁸Sarewo yetu ge dik yo o ma frot is men do, “Sugit ne yé som sukdaret su ré,” sane yo, men git sugit ne nde, we men nutbot ye ne bi kamba mone, ete men jammo ye ne bi sukjimnut mo an mit ne dom.

²⁹Ji bi sukdu-i sare do, men benbot men dakai bi sukjimnut mo men mit-i ne sor nde, wo men benbot ye yi bi sukjimnut mo an mit-i ne dom et. Bere yé deyo ki sare do, “Bei! Suma ben anato ji jammo ye yi bi sukjimnut mo an mit gato duyawa suk gato ji iwa ben ne?” Kapre ye yi bi sukjimnut sane men jammo sor.

³⁰Bere yé deyo o ki sare do, “Men ki ndo mo Yefun Allah wa sugit gato men git ne yo, suma ben anato ye yi ki men gum ibit mo sugit ne?” {Ndo sa, men misyar men bi sukjimnut, ete men jammo ye ne bi sukdu-i, subere men ben suk yo wai kadit an bi sukjimnut mo an mit nde.}

³¹Sane ji bi sukdu-i sare, nin git sugit e, nin da syur e, suk mwa gato nin ben ne sino yo, nin ben wa nin bes Yefun Allah gum kok sor.

³²Nin ben nin bi suk-i mo bur re yo, nin mewa nin nggwa subere nin ben ye yi ges mo os ibit nde. Nin ben suk sane su yé mwa ne sino, ye Yahudi e, yewis yi, si ye gato sok mo Yefun Allah bi rus-i ne sino.

³³Nin ben nin bi suk-i tepsu ji sor. Ji wergat ji nggwa subere ji ben suk mwa ne tepsu pe gato yé mwa ne mit iwa ne sor. Ji nutbot ji dakai nde, wo ji nutbot yé mwa ne sor, subere án brek kadit os ibit ete jammo Yefun, subere án kem ndo to kapyo mato kapyo.