Read Abun 1 Korintus 11 Bible Online

1 Korintus 11 - Abun bible

1 Korintus 11

¹Nin benbot suk gato ji ben ne tepsu ji benbot suk gato Yesus Kristus ben ne.

²Nin sa, nin yo mbrinket ji nde, wo nin napawa jim nin jom sukduno gato Yefun tarubot ji wa nin petok sor. Sane ji mit iwa.

³Sarewo ji iwa nin jam sukdu kwa dik yo sare do, men yebris ne sino bi Yekwesu mo Kristus; nggon bi yekwesumo bi ya; ete Kristus bi Yekwesu mo Yefun Allah.

⁴Yebris gato ki suk su Yefun Allah e, ki subot suktaru kadit Yefun Allah nai nje, ete an bom san wa an su yo, bere siri ré, tepsu ye ne yo bes Kristus gum kok nde.

⁵Sarewo nggon gato ki suk su Yefun Allah e, ki subot suktaru kadit Yefun Allah nai nje, ete nggon ne yo bom san wa mom su nde yo, bere siri ré. Nggon ne yo bes mom bi ya gum kok nde, we nggon ne tepsu nggon gato ye kwok mom sugo or kadit ré.

⁶Sane nggon gato bariwa bom san wa mom su it yo, sa ndo sa, ye tot an sugo wé sor. Sarewo nggon gato ye tot sugo e, kwok sugo ne wé ben mom damen mone it yo, ndo sa, nggon ne bom san wa mom su sor.

⁷Sane nggon bom san wa mom su tepsu mom bes mom bi ya gum kok anane, wo yebris yo bom san wa an su nde, we Yefun Allah ut yebris bergan tepsu Yefun Allah dakai, subere ye bes Yefun Allah gum kok mone. Sane yebris yo bom san wa an su nde,

⁸we sare, Yefun Allah yo ut yebris kadit nggon nde, wo Yefun Allah ut nggon kadit yebris.

⁹Sane dom, su ketke, Yefun Allah ut yebris tepsu yeos wa nggon nde, wo Yefun Allah ut nggon tepsu yeos wa yebris.

¹⁰Sane nggon bom san wa mom su subere ye jam do, nggon ne sa, bes mom bi ya gum kok, mom jammo mom bi ya sor. Nggon bom san sane subere malaikat dom iwa nggon ne.

¹¹Sarewo mo men yé gato onyar kem mo Yesus Kristus, nggon yo ti mo dakai dor kadit yebris nde. Sane dom yebris yo ti mo dakai dor kadit nggon nde,

¹²we su ketke Yefun Allah ut nggon kadit yebris, wo kadit ne o, nggon anato pe yebris. Men yetu mwa ne sino ma kadit Yefun Allah.

¹³Nin dakai nutbot sisu ndo et, dom nggon gato ki suk su Yefun Allah ete mom yo bom san wa mom su nde, anato ndo, bado, ibit e?

¹⁴Nin kem mo bur re, yé duno nin kadit ketke do, yebris gato sugo syu teker, bere ibit ré.

¹⁵Wo nggon gato sugo syu, sane sa, nggon ne nut do, ndo wai o ré, we Yefun Allah syo sugo syu ne nai nggon tepsu suk gato mom bom kewa mom su ne.

¹⁶Sane ye to iwa duwer men mo sukdu ne mó it yo, ji ki do, misyar, we men sor nde, wo yé mwa gato onyar kem mo Yefun Yesus mo nu ari mwa ne sino simo sukdu gato men ki ne, nggon bom san wa su sor, wo yebris yo bom san nde.

¹⁷Sukdu gato ji krombot re nin yo benbot sisu ndo nde, ji yo un nin gum mo gato nin benbot sukdu re nde. Nin ben ari, nin yo sibot sukduno gato ji duno nin su nde. Nin sum wa ben ari yo, suk gato nin ben mone yo ós nje onyar kem mo Yefun nde, wo ben nje ko kadit Yefun ré.

¹⁸Ketke, ji jam sukdu do, nin sum wa ben ari yo, nin wat yu, deyo duwer deyo. Ji nut do, sukdu ne sangge bayok,

¹⁹we, nin deyo mit-i tara kadit nin deyo mit-i ré. Sane bere men yetu wat yu sane mó ré, subere nin deyo gato ben Yefun Allah bi suk-i su sangge bor wa yé mwa me tara kadit nin deyo gato bariwa Yefun Allah.

²⁰Sane nin sum nin git roti wa napawa Yefun Yesus ne yo, nin yo ben sisu sangge nde,

²¹we nin git, nin gedik-gedik dakai mu nai sugit or kadit ye yi. Sane nin deyo yo ku sugit nde, án on de. Deyo o da nau mwa wade án yenau su.

²²Nin ben sukibit sane wa suma ne? Nin bi nu mo nde bado? Nin dakai git sugit si da syur mone sor. Nin yo bes ye gato onyar kem mo Yefun mo nu ari ne gum kok nde wa suma ne? Nin iwa nin ben ye gato yo suk yo mo nde damen bado? Ji ki suma nai nin ne? Sane nin nut do, ji imo nin mo suk gato nin ben ne bado? Nde ré, ji bari ré!

²³Nin yo jambot ji bi sukdu-i nde wa suma ne? We sare, sukdu gato ji duno nin su ne, men bi Yekwesu Yefun Yesus dakai tarubot ji, orete ji waii ki nai nin jam. Ji ki sukdu ne sare do, su noru gato yetu ge dik yo meret os wa gwat yeko ma wa but Yefun Yesus ne, ye yo but An nde tó, Yefun Yesus nai roti, ete

²⁴Yefun Yesus ki do, “Ndo mo Nan, Yefun Allah wa roti gato Nan syo nai men re.” Orete An syat roti ne, ete An ki do, “Ji ku anare. Ji syo Ji kaim ma kwop tepsu suktot wa sukibit gato nin ben ne. Sane nin benbot suk gato Ji ben re subere nin napawa Ji.”

²⁵Sane dom, án sino git sugit, or Yefun Yesus nai mok su nau anggur, ete An ki do, “Nau gato Ji sye wa nin re anato tepsu Ji dé gato sye subere Ji kak os gato be wa Yefun Allah nai nin gum sok mo An bi rus-i sagato An tom ne. Nin da nau yo, nin waii ben sato Ji ben re subere nin napawa Ji.”

²⁶Sane men do git roti si men da nau anggur ne yo, tepsu men frot nai nje do, men bi Yekwesu Yefun Yesus kwop wa men it. Men ben sane sor kom mo kam gato Yefun Yesus satu ma mo bur re o.

²⁷Sane ye to git roti si da nahu wa napawa men bi Yekwesu ne, ete an yo benbot sisu an mit dik si an onyar dik nde yo, ye ne ben sukibit nai men bi Yekwesu gato bi nggwa ete dé sye wa men. gato bi nggwa ete dé sye wa men.

²⁸Sane men watbot men dakai mit si men onyar sisu ndo or wé, eteyo men git roti si men da nau anggur wa napawa Yefun Yesus,

²⁹we ye to ma git roti si da nau anggu ne, ete an jam nde men bi Yekwesu gato bi An nggwa wa men ne bi sukjimnut ne ware, wo an dakai si nje git roti si da nau dakai daret yo, bere Yefun Allah syo sukye nai ye ne.

³⁰Nin deyo git roti ne dakai daret, nin nutbot suk gato nin ben ne nde anato nin yé mwa kaim rere e, nin i, ete nin ge bok yo kwop ré.

³¹Wo ndo sa, men watbot men mit si men onyar sisu sangge or wé, eteyo men git roti si men da nau anggur ne. Sane bere Yefun Allah yo syo sukye nai men mone nde.

³²Wo Yefun Allah syo sukye nai men yo, tepsu An kwam men, subere men kwet kadit os ibit, subere kam sari ne ma Yefun Allah yo bare men tó ye gato ben sukibit mo bur re sino mo bot geyos nde.

³³Sane ji bi nji ji bi nyanggon nin sum wa nin git roti wa napawa Yefun Yesus sino yo, nin eswa yu et, deyo git nyim kadit deyo nde.

³⁴Nin dogato on de teker, sa ndo sa, nin git sugit mo nin bi nu nyim wé et. Sane bere nin sum sino it yo, nin deyo git nyim kadit deyo nde, subere Yefun Allah yo syo sukye nai nin mo suk ne nde. Sukdu subot suk yi neya, ji ba mone yo, bere ji ki rer nai nin jam.