Read Abun 1 Korintus 12 Bible Online

1 Korintus 12 - Abun bible

1 Korintus 12

¹Ji bi nji, ji bi nyanggon, ji iwa nin jam sukdu subot suktinggi gato Yefun Allah Gen syo nai men wa ben men nggiwa ben suk wa An.

²Nin napawa tomgatu nin yo jam Yefun nde tó, suk yo tik nin mit wa nin mu som sukdaret gato yo du nde.

³Sane ji iwa nin jam do, Yefun Allah Gen yo ben men dufo mo Yefun Yesus nde, wo Yefun Allah Gen ne sor anato ben men ki do, “Yefun Yesus anato men bi Yekwesu gato men jammo.”

⁴Suktinggi gato Yefun Allah Gen bi nai men ne ben men nggiwa ben suk mwa, sarewo suktinggi mwa ne ma kadit Yefun Allah Gen ne dik sor.

⁵Suk gato men ben wa men bi Yekwesu ne mwa, sarewo men bi Yekwesu gato men ben suk wa ne ka dik sor.

⁶Suk mwa gato men ben wa men bi Yekwesu ne kwa ma yé ré, sarewo Yefun Allah ka dik ne anato bi suktinggi nai men sino wa men ben suk ne.

⁷Yefun Allah Gen syo suktinggi nai men yé gato onyar kem mo Yefun Yesus gedik-gedik ne bor wa ós men yé mwa ne sino.

⁸Yefun Allah Gen ben men deyo nggiwa ki Yefun Allah bi suktaru wa ós kak ye yi bi sukjimnut. Or o Yefun Allah Gen dik ne ben men deyo o nggiwa ki Yefun Allah bi suktaru ne rer wa ye yi jam kom mo mit ré.

⁹Or o Yefun Allah Gen dik ne ben men deyo o nggiwa men onyar kem mo Yesus Kristus wai kadit ye yi o ré. Or o Yefun Allah Gen dik ne ben men deyo o nggiwa men syun suki wé kadit ye gato i ne, wade ye ne ge satu.

¹⁰Or o Yefun Allah Gen ben men deyo o nggiwa ben suk gato ben ye yi yeket. Or o Yefun Allah Gen ben men deyo o nggiwa jam sukdu gato Yefun Allah tarubot an, ete an ki nai ye yi jam. Or o Yefun Allah Gen ben men deyo o nggiwa watbot sukdu subere an jam dogato ma kadit Yefun Allah tara kadit sukdu gato ma kadit biris bi yekwesu bi de-i ne. Or o Yefun Allah Gen ben men deyo o nggiwa ki suk su a yi gato men jam nde. Or o Yefun Allah Gen ben men deyo o nggiwa brek sukdu gato ye ki su a yi ne rer wa men sino jam.

¹¹Suk mwa gato Yefun Allah Gen ben men nggiwa ben ne ma kadit Yefun Allah Gen ne dik sor. Yefun Allah Gen syo An bi suktinggi subot men kadik-kadik tepsu pe gato An imo.

¹²Kapre men yetu kaim ne dik sor, mo men kaim ne, men gwes e, men syim e, men su e, men dabe e, men sugo e, men gro e, men syokwet e ne mó. Kapre suk mwa mó, men kaim ne dik sor. Kristus dom, An ka dik sor, wo yetu mwa sok mo An kaim.

¹³Ben sato men tepsu Kristus kaim, we men sino, kapre men ye Yahudi e, yewis yi e, kapre men pakwerut e, men yé gato dakai ti mo men dakai e, Yefun Allah Gen gato bok nggwa mo men ne anato ben men tepsu Kristus kaim dik ne sor. Men sino men jam Yefun Allah Gen dik ne bok nggwa mo men pe ré.

¹⁴Sane men nutbot men yetu kaim re, suk dik mone sor nde, wo suk mwa mó sato men gwes e, men syim e ne.

¹⁵Sato men gwes ki do, “Ji re syim nde ré, sane it yo, ji re yo sok mo kaim ne nde.” Kapre men gwes da ki sane o, men gwes sok mo men kaim ne sor.

¹⁶Sane dom, sato men dabe ki do, “Ji re gro nde ré, sane it yo, ji re yo sok mo kaim ne nde.” Kapre men dabe da ki sane o, men dabe sok mo men kaim ne sor.

¹⁷Sato men kaim ne sino tepsu men gro sor ré, bere men jam sukdu gato ye ki nai men sa u ne? Sane dom, sato men kaim ne sino tepsu men dabe sor ré, bere men ni suk basmi sa u ne?

¹⁸Suk mwa gato kom ut tok me kaim re, mwa ne sino, Yefun Allah dakai fro bi nat wa ré, tepsu pe gato An imo.

¹⁹Sato Yefun ut suk dik sato men gwes mo men kaim sor ré, bere me kaim gato sangge ana u ri ne?

²⁰Sane mo men kaim ne suk mwa mó, sato gwes e, syim e, dabe e, gro e ne, sarewo men kaim ne dik sor.

²¹Sato men gro ki nai men syim do, “Ji yo mitmo nan nde,” sane bere siri ré. Sane dom, men su ki nai men gwes do, “Ji yo mitmo nan nde,” sane bere siri ré. Sane dom, men su ki nai men gwe do, “Ji yo mitmo nan nde,” sane bere siri dom ré.

²²Wo sare, men kaim deyo gato men nut do, yo nggi nde, men kaim de gane men mitmo wai kadit deyi neya.

²³Sane dom men kaim deyo gato men yo nutbot teker nde, men kaim de gane men bes gum kok ré. Men kaim deyo o gato men damen wa ne, men fro san kewa ré, wo

²⁴men kaim deyo o gato men yo damen wa nde, men yo fro san kewa nde. Yefun Allah fro men kaim ne, ete men kaim deyo gato men nut do, yo ndo teker nde yo, Yefun Allah bes men kaim de ne gum kok ré.

²⁵Yefun Allah bes de gato yo ndo teker nde gum kok subere suk mwa gato mo men kaim re yo misyar de ne nde, wo suk mwa ne ben suk sino, yo wat yu nde. Sane dom, Yefun Allah bes de gato yo ndo teker nde gum kok subere suk mwa gato tara kadit yu mo men kaim re mewa yu tepsu yu petok sor.

²⁶Sane pe dik yo mo men kaim re ku sukye yo, tepsu men kaim sino ku sukye it. Sane dom ye bes pe dik yo mo men kaim gum kok it yo, bere suk mwa gato mo men kaim ne sino mit at wa.

²⁷Sane men sino sok mo Kristus kaim ne it. Men kadik-kadik anato tepsu Kristus syim e, gwes e, su e, dabe si suk yi neya.

²⁸Sane mo nu ari, Yefun Allah fro nje sato re do; ketke yerasul; kedowe o, yenabi gato ki Yefun Allah bi suktaru nai nje jam; kedogri o, yeguru gato duno nje su Yefun Allah bi sukdu; or o ye gato ben suk gato ben ye yi yeket sato syun semda e ne; or o ye gato ben ye gato i ne ge kadit bi suki ne; or o ye gato ós ye yi mo sukye gato ye ne ku ne; or o ye gato fro nu ari bi suki; or o ye gato ki suk su a yi neya gato an jam nde.

²⁹Te yé bok ne sino gum yerasul bado, yenabi bado, yeguru bado? Nde ré. Te yé bok ne sino nggiwa ben ye yi yeket suk gato an ben ne bado? Nde ré.

³⁰Sane dom yé bok ne sino nggiwa ben ye gato i ne ge kadit bi suki ne bado? Nde ré. Sane o, yé bok ne sino nggiwa ki suk su a yi neya bado? Nde ré. Yé bok ne sino nggiwa brek suk gato ye ki su a yi ne wa men jam sino bado? Nde ré.

³¹Yé bok ne sino ku suktinggi wa ben suk mwa ne nde, wo ndo sa, men wergat men nggwa subere men ku suktinggi gato ndo wai kadit Yefun Allah Gen ne et. Men ben sane anato ndo, wo os gato ndo wai o ré anato ji krombot more bur o.