Read Abun 1 Korintus 2 Bible Online

1 Korintus 2 - Abun bible

1 Korintus 2

¹Ji bi nji, ji bi nyanggon, tomgato ji ba ku nin mone, ji ki subot os gato Yefun Allah fro wa men yetu ne sa, ji yo nuk ji bi sukdu-i tepsu yetu mo bur re gato jam suk mwa nuk bi sukdu-i nde, ji yo ki su kwa gato kru dom nde,

²we ji sisu nin kem mone sa, ji nai sukjimnut dik so sare do, ji ki sukdu subot Yesus Kristus sor ré, ji ki sukdu subot tomgato yé mban An mo kwesukwin ne, ji yo ki subot suk yi neya nde.

³Ji ba ku nin mone sa, ji kaim rere, ji nyu, ji kaim kro ndo nde.

⁴Ji ki sukdu subot Yesus Kristus nai nin sa, ji duno nin, ji yo wergat nin tepsu ye gato jam suk mwa ne duno nje nde, wo ji ki bi sukdu-i ndaf yi sor, ji yo ki su kwa gato kru nde. Ji ki ji bi sukdu-i, ete nin me Yefun Allah Gen bi suktinggi ne bor mone, we sukdu ne pet mo nin mit ré.

⁵Sane nin onyar kem mo sukdu ne kadit ji ki sukdu tepsu yetu bi sukjimnut gato ko ne nde, wo kadit Yefun Allah Gen bi suktinggi pet mo nin mit ne sor.

⁶Men da ki men bi sukdu-i tepsu ye gato gi sukjimnut gato ko nai ye gato onyar kem mo Yefun nam it ne dom. Sarewo men ki men bi sukdu-i tepsu ye gato jam suk mwa mo bur re nde, men ki men bi sukdu-i tepsu yepasye gato jowa bur re dom nde, yepasye ne kom mo rut bi suktinggi kom mo pe yo nde.

⁷Sarewo men ki men bi sukdu-i gato ma kadit Yefun Allah dakai bi sukjimnut-i gato ma kadit Yefun Allah dakai bi sukjimnut-i gato ko ne sor. Sukdu ne suga nyim tuya yo bor wa yetu jam nde, wo Yefun Allah fro sukdu ne wa men suga bur re yo mo nde tó, subere men duno nje su, ete yé mwa ne bes men gum kok mone ré.

⁸Yepasye mwa gato jowa bur re, ge dik yo jam sukdu ne mo nde. Yepasye ne jam sukdu ne sa, án yo gu men bi Yekwesu gato gum kok sye wai ne kwop o kwesukwin nde.

⁹Sarewo ye krom mo Yefun Allah bi sukdu, “Suk gato Yefun Allah fro wa ye gato bi sukjimnut sye kas subot An, anato ndo wai o ré, men yetu yo me nde tó. Men yo jam sukdu subot suk ne dom nde. Men yetu bi sukjimnut yo kom mone dom nde.”

¹⁰Wo men sa, men jam suk gato Yefun Allah fro ne, we Yefun Allah Gen dakai kadum nai men jam ré. Yefun Allah Gen watbot suk mwa ne sor, Yefun Allah Gen jam Yefun Allah bi sukjimnut gato kru ne kom mo mit ré.

¹¹Je u anato jam yetu ge dik yo dakai bi sukjimnut-i mwa ne sino kom mo mit ne? Ye ne dakai sor ete jam. Sane Yefun Allah Gen sor ete jam Yefun Allah dakai bi sukjimnut-i mwa ne sino kom mo mit ne dom.

¹²Men jam suk mwa gato Yefun Allah dakai syo is men yi kadit men yetu bi sukjimnut-i nde, wo An syo An Gen nai men subere men jam suk mwa gato Yefun Allah syo is men dakai yi ne.

¹³Sane sukdu gato men ki ne ma kadit yetu gato jam suk mwa nde, wo sukdu ne ma kadit Yefun Allah Gen. Yefun Allah Gen duno men, An anato kadum sukdu nei men orete men waii duno nje su ne. Sukdu gato sangge ne, Yefun Allah Gen ós men ki rer nai nje.

¹⁴Yé gato Yefun Allah Gen yo bok nggwa mo nde yo, yé ne yo ku os wa jammo sukdu gato Yefun Allah Gen kadum nai án nde. Ye ga sane jam nde ware, án nut do, men ki sukdu dakai daret kaii, we Yefun Allah Gen yo kem mo án mit nde.

¹⁵Wo yé gato jammo Yefun Allah Gen pe, án sa, nggiwa watbot sukdu mwa ne sino, bere án jam sukdu gato ndo kadit sukdu gato ibit ne. Sane ye yi yo nggiwa ki án gum ibit mo suk gato án ben ne nde.

¹⁶Yé krom mo Yefun Allah bi sukdu do, “Je u anato jam Yefun Allah bi sukjimnut-i ne subere an nggiwa duno Yefun Allah ne?” Yetu dakai yo nggi kom mo pe yo nde, wo men sa, bi sukjimnut-i ré.