Read Abun 1 Korintus 3 Bible Online

1 Korintus 3 - Abun bible

1 Korintus 3

¹Ji bi nji, ji bi nyanggon, nin yo jammo Yefun Allah Gen pe nde tó, wo nin ben nin bi suk-i tepsu yetu mo bur re ben bi suk-i ne tó. Sane ji duno nin tepsu ji duno ye gato onyar kem mo Yesus Kristus sim. Nin tepsu pabom mo Kristus bi sukdu-i tó.

²Tomga nyim ji duno nin su sukdu gato ndaf, tepsu nggon syo sus is pabom da. An yo syo sugit gato krat nde, we pabom ne er tó. Sane ji yo duno nin su sukduno gato kru nde tó. Su re dom nin tepsu pabom mo Yefun bi suk-i tó, sane ji duno nin su sukdu gato yo kru nde,

³we nin ben nin bi suk-i tepsu yetu mo bur re ben sbi suk-i tó. Nin ben sukndo e, nin maskwa ket yu mo suk gato nin deyo ku e ne, sane anato men jam do, nin ben suk tepsu ye gato jam nde Yefun tó. Nin jammo sukjimnut gato tik nin mit wa ben sukibit ne tó.

⁴Nin deyo ki do, “Men simo Paulus.” Nin deyo o ki do, “Men simo Apolos.” Nin ki nin bi suk-i sane anato men jam do, nin ben nin bi suk-i tepsu yetu mo bur re ben bi suk-i ne tó.

⁵Je u anato ji ne? Je u anato Apolos ne? Nin bes men ka we gum kok nde. Men ka we anato Yefun Allah bi pakwerut gato ós nin sor. Men ka we ki sukdu gato ós nin nai sukjimnut subere nin brek kadit os ibit, ete nin onyar brek ma kem mo Yefus Kristus. Men ka we dakai benbot suk gato men bi Yekwesu syogat men kadik-kadik ben ne sor ré.

⁶Nin bes men ka we gum kok nde. Ji anato ben suk tepsu ye gato jan suk mo nggwe, Apolos anato tepsu ye gato sye syur wa, sarewo Yefun Allah anato ben sukjan ne kom. Sane nin bes Yefun Allah gum kok sor.

⁷Ye gato jan suk si ye gato sye syur wa ne, an we yo nggiwa ben sukjan ne kom nde, wo Yefun Allah dakai sor ete nggiwa ben sukjan ne kom.

⁸Ye gato jan suk si ye gato sye syur wa ne, an we bi sukjimnut tepsu yu, an we ne iwa sukjan ne kom. Bere Yefun Allah syo suk gato ndo nai án tepsu án bi kamba mone.

⁹Men ka we si Yefun Allah ben suk sino mo An bi nggwe. Nin anato tepsu Yefun Allah bi nggwe. Nin anato tepsu Yefun Allah bi nu dik yo dom.

¹⁰Yefun Allah syo suktinggi nai ji anato ji jam ji nggo nu sisu ndo. Sane ji ben fondasi gato krat. Or o ye yi yo o waii ma ben nu kaim mo fondasi ne. Ye gato ben nu kaim mo fondasi ne it yo, an ben sisu ndo sor.

¹¹Fondasi gato Yefun Allah syogat ji ut ne anato Yesus Kristus ka dik ne sor. Fondasi yi yo tep wa Yefun Allah bi nu yo mo nde.

¹²Yé deyo ben nu kaim mo fondasi ne su suk gato kem nam sato: emas, perak si jok gato bi sugum sye. Yé deyo o ben nu kaim mo fondasi ne su suk gato yo kem nam nde saato: kwe si es gato gu.

¹³Nu kaim gato yé ben ne, bere men me rer su kam gato Yesus Kristus satu ma mo bur re. Bere men me nu gato krat si nu gato yo krat nde. Nu gato bot yo git nde it yo, men jam do, nu ne krat, wo nu gato bot git or yo, men jam do, nu ne yo krat nde.

¹⁴Sane nu gato yé ben ne kem krat kadit bot git nde yo, bere ye gato ben nu ne Yefun Allah syo suk gato ndo nai án mo án bi kamba.

¹⁵Wo nu gato bot git ne yo, ye gato ben nu ne yo ku suk gato ndo kadit Yefun Allah nde. Yefun Allah nai yé ne wé kadit bot gesyos, subere yé ne kem ndo to kapyo mato kapyo mo Yefun Allah bi nat-i. Sarewo Yefun Allah yo syo suk yo o nai án nde, bere án sok mo Yefun bi nat-i tepsu yé gato titi fro mo nden kadit nu mit gato bot git wairi wa ne.

¹⁶Nin dakai anato tepsu Yefun Allah bi nu, nin dakai jam ré. Yefun Allah Gen kem mo nin mit it, nin dakai jam ré.

¹⁷Ye to ben Yefun Allah bi nu ibit su sukduno gato siri kadit Yefun Allah bi sukduno ne it yo, bere Yefun Allah dom ben ye ne ibit, we nu ne Yefun Allah fro dor wa Yefun Allah bi suk-i sor. Nin anato tepsu nu ne.

¹⁸Nin dakai kidar nin dakai nde. Ye gato nut do, an sa, jam suk mwa tepsu yetu bu sukjimnut-i mo bur re, ndo sa, an ben nggwa tepsu ye gato jam nde bur ré bi suk-i, subere an ku os wa an jam suk mwa su sangge tepsu Yefun Allah bi sukjimnut-i ne,

¹⁹we ye gato bi sukjimnut ko mo bur re bi sukdu-i ne, Yefun Allah ki do, sukdu ne yé dakai ki daret kaii. Tepsu ye krom mo Yefun Allah bi sukdu-i sare do, “Yefun Allah ben ye gato bi sukjimnut ko ne ku sukue mo koirut tepsu ye ne ré bus, ete bus ne dakai sip an dakai.”

²⁰Ye krom o do, “Yefun Allah jam do, ye gato bi sukjimnut ko ne bi sukjimnut mwa ne yo ós nje ne nde, wokgan yo dom nde.”

²¹Sane men bes yetu gum kok daret mo sukdu gato an jam ne o nde. Suk mwa gato ndo wa men jam ne Yefun Allah fro wa men ré.

²²Yefun Allah fro yetu wa ós nin jam suk gato ndo sato: ji e, Apolos si Petrus. Bur re, Yefun Allah fro wa men. Suga men kem mo bur re sor kom mo kam sari ne ma, men kwop o, men mbau o, suk mwa ne sino, Yefun Anato fro wa men, tepsu men bi suk.

²³Sane dom men anato Kristus bi nje-i, ete Kristus anato Yefun Allah bi Gan.