Read Abun 1 Korintus 5 Bible Online

1 Korintus 5 - Abun bible

1 Korintus 5

¹Yé mwa ki sukdu nai ji do, nin yé gato sok mo nu ari deyo ben suksiri su yu sato, pa ge dik yo ben siri su pa bi im gato kon su pa ne. Ye gato jam ndo Yefun yo ben suksiri gato ibit teker sane nde.

²Nin mit at teker nde, wo sa ndo sa, nin kwabom dek, ete nin syun pa gato ben suk sane mu nden wé kadit nu ari sor.

³Ji kaim yo si nin kem mone nde, wo ji gen sa, kem su nin mone pe. Sane kapre ji kaim yo si nin mone nde, Yesus Kristus syo sukjimnut nai ji sare do, nin syo sukye nai pa gato ben sukibit ne sor. Sane nin sum mone wa un men bi Yekwesu Yefun Yesus it yo, nin nut do, ji da si nin mone dom, ji si men bi Yekwesu Yefun Yesus bi suktinggi si nin mone dom, sugane

⁵Nin syo pa ne mo biris bi yekwesu syim-i, subere biris bi yekwesu ne ben sukye nai pa da kridek, sane sor pa ne yo ndo o nde. Men ben sane subere sukjimnut gato tik pa mit wa pe ben sukibit yo jom pa o nde. Sane kam gato Yefun Yesus satu ma mo bur re yo, bere pa ne da gesyos yo ges mo bot gesyos nde, wo bere pa ne kem ndo to kapyo mato kapyo mo Yefun Allah bi nat-i.

⁶Nin nut do, nin ben sukndo, sarewo nin mit at teker mo suk ne nde, wo nin jammo sukdu gato yé ki sare do, “Bibit roti wokgan ta ben tepung mwa ne it sye or ré.”

⁷Sane nin bare bibit roti gato rok ne wé, tepsu nin syun pa gato ben sukibit ne mu nden wé kadit nin, subere sukibit gato an ben ne yo tok nin nde. Nin bare bibit roti gato ibit ne wé, sane bere nin tepsu roti gato ye kon yi sor, bibit roti yo mo nde. Sane sukibit yo tok nin o nde, wo nin tesu ye be. Ji jam do, sangge, nin tepsu ye be sane it. Sane men fro wa men konwa Kam Sye Waiket, we Kristus anato tepsu domba gato ye Yahudi gu kwop wa konwa kam sye ne. Su re, Kristus kwop wa men it, An tot suktot mo sukibit gato men ben ne wé ré.

⁸Sane men konwa kam sye ne yo, men ben suk tepsu Yefun Allah mit sor, men ben sukibit si suksiri su nde. Men ben sukibit sane tepsu men kon roti su bibit roti gato ibit anane. Men ben sane o nde, wo men konwa kam sye ne yo, men ben sukndo su yu, men ki sukdu gato sangge su yu sor. Men ben sukndo sane tepsu men kon roti gato bi bibit roti yo mo nde.

⁹Mo surat gato ji krom nyim ne, ji krom mone do, men mu karowa ye gato da bro wa ben siri ne nde.

¹⁰Ji bi sukjimnut mone do, ye gato ki do, an onyar kem mo Yefun Yesus, ete an ben sukibit yo, men mu karowa ye ne nde, wo ji yo duyawa men mu karowa ye gato jam nde Yefun Allah ne nde. Ye gato jam nde Yefun ne ben siri si yu e, gro sye wa suk mwa e, kidar wa syimsi suk e, som sukdaret e ne, ye gane jam nde Yefun or ré. Ji bi sukjimnut do, men kem ko kadit ye gato sre nde, we men do ben sane, bere men mu kadit bur re sor, men yo kem mo bur re o nde. Men syun ye gato ben bi suk-i ibit mu nden wé kadit men et

¹¹Wo ji bi sukjimnut do, ye gato ki do an onyar kem mo Yefun Yesus, sarewo an ben an bi suk-i ibit bu, men mu karowa an o nde. Ye gato ben an bi suk-i sato re: an da bro wa ben suksiri e, an gro sye wa suk mwa e, an som sukdaret e, an iwa kiket ye yi gum e, an yenau bu e, an kidar wa syimsi suk e ne. Ye gato ben bi suk-i sane men mu karowa an nde, men git sugit su an dom nde.

¹²Ji yo nggiwa syo sukye nai yé gato jam nde Yefun nde. Bere Yefun Allah dakai ete syo sukye nai yé ne. Wo yé gato onyar ke mo Yefun Yesus gato si nin sok ari sino do ben bi suk-i ibit sane it yo, nin syun án wé kadit nin mo nu ari ne sor, we Yefun bi sukdu duwe do, “Men syun ye gato ben bi suk-i ibit mu nden wé kadit men et.”