Read Abun 1 Korintus 6 Bible Online

1 Korintus 6 - Abun bible

1 Korintus 6

¹Men yé gato onyar kem mo Yefun Yesus, deyo do maskwa ket yu mo suk yo it yo, men mu kendo yepasye gato jam nde Yefun Allah ma wa kibot sukmaskwa ne wa suma ne? Sa ndo sa, men mu kendo yepasyé gato onyar kem mo Yefun Yesus ma wa kibot sor ré. Sa ndo sa, men mu kendo yepasye gato onyar kem mo Yefun Yesus ma wa kibot sukmaskwa sor ré

²Su kam sari ne ma, bere men yé gato onyar kem mo Yefun Yesus anato ndobot yetu mwa ne sino mo bur re iwedewe. Nin jam sukdu ne it, bado nde, e? Men ndobot yé mwa ne su kam sari, sane su re sukmaskwa wokgan mo bur re it yo, men dakai kibot sor ré.

³Bere men anato ndobot malaikat mwa ne sino dom. Nin jam bado, nde, e? Sane su re men dakai ndobot yu mo suk gato men maskwa ket yu mo bur re dom.

⁴Saneyo, nin do maskwa ket yu mo suk yo it yo, nin mu kendo ye gato onyar kem mo Yefun Yesus, kapre an gum sok, men kendo an ma kibot anato ndo wai kadit nin kendo yepasye gato jam nde Yefun.

⁵Ji ki sane subere ben nin dakai damen mó et. Kadit nin yé bok ne sino gato onyar kem mo Yefun Yesus, deyo bi sukjimnut nggiwa kibot suk gato nin maskwa ket yu ne mó ré, bado? Mó ré,

⁶sarewo ye Kristen ge dik yo maskwa ket ge dik yo o mó yo, an we yo kendo yepasye gato onyar kem mo Kristus ne ma wa kibot nde, wo an we mu kendo yepasye gato jam nde Yefun ma wa kibot. Nin ben sane bere siri ré.

⁷Men yé gato onyar kem mo Yefun Yesus mu kendo yepasye gato jam nde Yefun ma wa kibot sukdu ne yo, men ben suk siri kadit Yefun Allah bi sukduno it anane, bere men sino ku sukye mone. Yé gato onyar kem mo Yefun Yesus do ben sukibit nai men it yo, sa ndo sa, men misyar anato ndo wai kadit men kendo yepasye gato jam nde Yefun ma wa kibot. Ye ne syimsi men bi suk it yo, sa ndo sa, men misyar anato ndo wai kadit men kibot suk ne mo yepasye gato jam nde Yefun ne gwem.

⁸Sarewo nin deyo dakai anato ben sukibit nai nin deyo. Nin dakai kidar ye yi, ete nin nai suk kadit nin dakai bi nji mo Kristus bi rus-i, nin ben sukibit nai nin dakai bi nji ne it.

⁹Ye gato ben sukibit ne gum yo sok mo Yefun Allah bi rus-i nde, nin jam sukdu ne bado, nde e? Nin jam sukdu ne, sane nin dakai kidar nin dakai nde, Yefun Allah bariwa nai ye gato ben bi suk-i ibit sok mo An bi rus-i, sato re: yebris si nggon gato ben siri su yu daret e, ye gato som sukdaret e, yekra gato ben siri su nggon daret si nggonkra gato be siri su ye daret, yebris gato iwa ben siri wa meret sugum e, yebirs gato ben siri su yu,

¹⁰ye gato syimsi suk, ye gato gro sye wa suk mwa, ye gato yenau bu, ye gato iwa kiket ye yi gum, ye gato gu ye yi ete nai ye ne bi suk. Ye gato ben bi suk-i sane yo, bere Yefun Allah yo nai ye ne gum sok mo An bi rus-i nde.

¹¹Suga nyim nin ge bok yo mone ben suk sane ré, sarewo su re, nin brek kadit os ibit gato nin ben suga nyim ne ré. Yefun Allah nai nin sok mo An bi rus-i wa nin ben An bi suk-i sor. Men bi Yekwesu Yesus Kristus kak os wa nin subere Yefun Allah yo ben sukye nai nin tepsu sukibit gato nin ben ne nde, wo An ki do, nin sa, tep wa sok mo An bi rus-i. Yefun Allah gato jom men ne, An Gen ós nin onyar kem mo Yefun Yesus anato nin ku os wa sok mo Yefun Allah bi rus-i ne it.

¹²Yé ki do, “Suk mwa ne ndo sino, Ji dakai ben ket ji i sor.” Sarewo ji ki do, suk mwa ne sino yo ós men nde. Yé ki do, “Suk mwa ne ndo sino, ji dakai ben ket ji i sor.” Sarewo ji bariwa suk yo jom ji tepsu ji gum pakwerut wa suk ne ré.

¹³Yé deyo ki do, “Yefun Allah ut sugit wa men git ngga mo men ondim. Sane dom Yefun ut men ondim fro ndek wa sugit.” Sarewo su kam sari ne ma Yefun Allah ben men ondim si sugit ne sino ibit or ré. Sane dom Yefun fro yebris kaim wa nggon, ete nggon kaim wa yebris. Sarewo Yefun Allah yo ut men yebris si nggon kaim wa men ben siri su yu daret nde, wo An ut men kaim wa men ben men bi Yekwesu bi suk-i. Ete An mewa men kaim ré.

¹⁴Men bi Yekwesu ne, Yefun Yesus, Yefun Allah dakai sun kadit sukkwop su An bi suktinggi ne it. Sane bere An sun men kaim kadit sukkwop su An bi suktinggi ne dom.

¹⁵Sane men kaim anato sok mo Yesus Kristus kaim. Nin nutbot sisu ndo et. Sane men gwat Kristus kaim mu ku nggon gato ben siri mwa, ete men ben siri su nggon ne, men si nggon ne tepsu dik digane anato ndo, bado? Nde ré! Men ben sane wam dik yo dom nde!

¹⁶Ye gato ben siri su nggon gato ben siri mwa ne anato tepsu dik su nggon ne. Ye ne kaim si nggon ne kaim tepsu dik. Nin nutbot sisu ndo et. Ye gato ben siri su nggon ne, an si nggon ne tepsu dik, we yé krom mo Yefun Allah bi sukdu do, “Ye we gato nai yu ne, an we tepsu dik it.”

¹⁷Sarewo ye gato si Yefun Yesus tepsu dik it yo, an si Yefun Gen tepsu dik it yo, an si Yefun Gen tepsu dik it.

¹⁸Sane men yebris si nggon mewa men nggwa kadit men ben siri su yu daret nde. Sukibit de yi neya men ben mo men kaim de nden sor ré, wo sukibit gato men ben siri su yu daret ne ben men dakai kaim ibit ré.

¹⁹Men kaim ne anato tepsu nu wa Yefun Allah Gen kem mó. Yefun Allah Gen bok nggwa mo nin. Yefun Allah dakai bi An Gen bok nggwa mo nin it. Nin nutbot sisu ndo et. Sane, nin kaim sok mo nin bi suk-i o nde, wo nin kaim sok mo Yefun Allah bi suk-i,

²⁰we Yefun Allah bi Gan bi nggwa wa nai nin ré. Yefun Allah syogat Yefun Yesus ma kwop wa tot suktot mo sukibit gato nin ben ne. An bi An bi Gan kaim wa so nin su it anane. Nin sok mo An it. Sane nin bi nin nggwa wa nin ben Yefun Allah bi suk-i, nin ben suk su nin kaim subere yé bes Yefun Allah gum kok mone sor.