Read Abun 1 Korintus 7 Bible Online

1 Korintus 7 - Abun bible

1 Korintus 7

¹Su re ji krom subot sukdu gato nin krom mo surat wa ji ne. Ji ki sare do, men yebirs yo kra nde yo, ndo dom.

²Wo yé mwa ben siri su yu daret teker, sane ndo sa, men yebris kra bi nggon ge dik kadit men ben siri nde. Sane dom, nggon kra bi ya ge dik kadit mom ben siri nde.

³Sa ndo sa, men yebris eswa nggwa kadit men bi nggon nde. Sane dom, nggon eswa nggwa kadit mom bi ya nde. Sa ndo sa yebris si bi nggon bi nggwa mo yu sor.

⁴Nggon kaim anato nggon ne bi suk-i sor nde, wo mom bi ya bi suk-i anane dom. Sane dom, men yebris kaim anato men bi suk-i sor nde, wo men bi nggon bi suk-i anane dom.

⁵Sane men eswa nggwa kadit yu nde. Wo men si men bi nggon do iwa ki suk su Yefun subot suk yo gato men mit mone it yo, men bi nggwa nai yu nde wade kam bok yo, subere men si men bi nggon ki suk su Yefun Allah gat sor. Men bi nggwa nai yu nde sor kom mo kam gato men tom su yu ne or wé yo, men si men bi nggon sem su yu satu o, sawe biris bi yekwesu ku os wa ben kidar men ben siri su nggon yi. Men si men bi nggon sem su yu satu, we men yo nggiwa men mewa men nggwa sisu ndo mo suk nde nde tó.

⁶Sane ji ki do, nin kra anato ndo, sarewo ji sayugat nin nde. Wo ji jam do nin yo nggiwa nin mewa nin nggwa nde anato ji duno nin do, sa ndo sa, nin kra sor.

⁷Wo ji da iwa yebris sino yo kra nde tepsu ji, sarewo Yefun Allah dakai ós ji anato ji yo bi sukjimnut wa ji kra nde. Yefun Allah syo suktinggi nai men kadik-kadik ne, sarewo Yefun Allah syo suktinggi ne nai men subere men nggiwa men ben suk tara kadit yu ré. Yefun Allah ben ji nggi anato ji yo mit iwa ji kra su nggon nde.

⁸Ji bi sukdu wa ye gato yo kra nde tó si nggonna sare do, sa ndo sa, nin kra nde, nin kem yi tepsu ji sor.

⁹Wo nin yo nggiwa nin mewa nin nggwa nde yo, sa ndo sa, nin kra sor kadit nin da bro wa nggon teker nde. Nin kra su nggon anato ndo wai kadit nin da bro wa nggon gat, ete nin ben siri su nggon.

¹⁰Ji bi sukdu wa yekra. (Ji bi sukdu-i anare nde, wo men bi Yekwesu dakai bi sukdu-i anare.) Yefun Allah syaugat men do, nggonkra sombok kadit bi ya nde.

¹¹Wo mom do sombok kadit mom bi ya it yo, mom kem yi sor, mo kra o nde. Ondeyo mom satu mo mom bi ya ga nyim ne, ete si bi ya ne kem not satu. Sane dom, Yefun Allah syaugat men o do, yekra sombok kadit an bi nggon nde.

¹²Ji bi sukdu wa ye yi neya. Men bi Yekwesu bi sukdu-i anare nde, wo ji i sukdu-i anare. Yebris ye Kristen gato kra su nggon gato jam nde Yesus Kristus, ete nggon ne iwa kra su an pe it yo, yebris ne sombok kadit nggon ne nde.

¹³Sane dom, nggonkra gato jammo Kristus ne kra su yebris gato jam nde Yesus Kristus, ete yebris ne iwa kra su mom pe it yo, mom sombok kadit yebris ne nde.

¹⁴Nggonkra ne sombok kadit bi ya nde, we kapre bi ya jam nde Yefun, Yefun Allah mewa bi ya mo gato nggon ne sok mo Yefun Allah bi rus-i. Sane dom yekra gato onyar kem mo Kristus kra su nggon gato jam nde Yefun Yesus ne sombok kadit bi nggon nde, we Yefun Allah mewa nggon ne mo gato mom bi ya sok mo Yefun Allah bi rus-i. Sane bere an we bi pa dom sok mo Yefun Allah birus-i ré, ondesor sa, Yefun Allah yo iwa an we bi pa ne nde.

¹⁵Wo ye gato jam nde Yefun Yesus iwa sombok kadit an bi nggon gato omyar kem mo Yefun it yo, men duyawa an nde, men misyar an mu sor. Sane dom nggon gato jam nde Yefun Yesus iwa sombok kadit mom bi ya gato onyar kem mo Yefun it yo, men duyawa mom dom nde, men misyar mom mu sor. Yebris gato onyar kem mo Yefun ne bi nggon sombok kadit an it yo, an kem not sor. Sane dom nggon gato onyar kem mo Yefun ne bi ya sombok kadit mom it yo, nggon ne kem not sor, we Yefun Allah iwa men kem not kadit men kaskwa yu mo suk sane nde.

¹⁶Nggon ne werwa bi ya satu ma nde, we mom nggiwa mom dakai duno bi ya subere mom bi ya nai sukjimnut do, an brek kadit os ibit ete jammo Yefun Yesus bado? Men jam ri nde. Sane dom, yebris gato onyar kem mo Yefun nggiwa an dakai duno an bi nggon subere an bi nggon nai sukjimnut do, mom brek kadit os ibit ete jammo Yefun Yesus bado? Men jam ri nde.

¹⁷Sane men kra e, men kra nde yo, ji duno nje mo nu ari mwa ne sino sare do, sa ndo sa men ben men bi suk-i tepsu suk gato Yefun Yesus fro wa men ne sor. Men ben suk tepsu pe gato Yefun Allah fro men kadik-kadik wa men ben ne sor. Men kem mo nat gato Yefun fro ne, men benbot suk gato An fro ne pe sor.

¹⁸Sato re, ye gato yé bisunat nyim ré, an werwa an ben pe ne ndo satu nde. Sane dom, yewis yi gato ye yo bisunat nde yo, an werwa yé bisunat an nde.

¹⁹Kapre ye bisunat men o, ye yo bisunat men nde yo, suk yo nde. Ye bisunat men it yo, yo ós men nde, wo suk gato ós men anato men benbot suk gato Yefun Allah syogat men ben ne sor.

²⁰Sa ndo sa men kadik-kadik ben suk tepsu suk gato men ben su kam gato Yefun Allah nai men sok mo An bi rus-i. Men kem mone, men ben suk sane pe sor.

²¹Su kam gato Yefun Allah nai men, men do tepsu yenggras dik yo bi pakwerut it yo, men werwa men mu kadit nde, sarewo men do ku os wa men mu kadit it yo, men mu sor.

²²Ye gato gum pakwerut wa yenggras mo bur re su kam gato Yefun Allah nai an sok mo An bi rus-i sa, ye ne tepsu Yefun bi yetuge-i gato gum kwerut wa ye yo o nde. Sane dom ye gato gum kwerut wa yenggras mo bur re nde su kam gato Yefun Allah nai ye ne sok mo An bi rus-i yo, bere ye ne tepsu Kristus bi pakwerut or ré.

²³Yefun Allah bi Gan bi nggwa wa nai men ré. Yefun Allah syogat Yefun Yesus ma kwop wa tot suktot mo sukibit gato men ben ne. An bi An gi Gan kaim wa so men su it anane. Men sok mo An it. Sane men bi men nggwa mo yetu tepsu men gum kwerut wa yetu o nde.

²⁴Ji bi nji, ji bi nyanggon, suk gato men ben yo, men bi sukjimnut mo Yefun, ete men ben men bi suk-i tepsu pe gato Yefun Allah fro wa men kadik-kadik ben ne et. Men kem mone, men ben suk sane petok sor.

²⁵Ji bi sukdu wa yemsok si nggonnak gato yo kra mo nde tó. Yefun Allah bi sukdu-i anare nde, wo ji dakai bi sukdu-i anare. Yefun Allah dakai jimnotku ji, sane Yefun kak ji bi sukjimut anato ji bu sukdu-i re bere ndo wa nin jammo.

²⁶Ji ki sare do, su re ye gato jam nde Yefun Yesus ben sukye nai nin mo suk bok yo tó, sa ndo sa, nin yé gato yo kra nde tó yo, nin kem yi sane sor.

²⁷Nin kra it yo, nin sombok kadit nin bi nggon nde. Nin kra nde tó yo, nin meret nggon wa nin kra nde.

²⁸Sarewo nin iwa nin kra yo, nin kra sor, sukibit anane nde. Sane dom, nggonnak iwa mom kra it yo, mom kra it yo, mom kra sor, sukibit anane nde. Sarewo ye gato kra yo, bere suk mwa syimfar án ndo nde. Ji bariwa suk mwa syimfar nin, sane ndo sa, nin kra nde.

²⁹Ji bi nji, ji bi nyanggon, ji bi sukdu-i sare do, su re men yo kem nam mo bur re o nde. Sane nin yé gato kra it yo, nin bi sukjimnut sye mone nde, wo nin ben nin nggwa tepsu ye gato kra nde.

³⁰Sane dom men wo subot suk yo it yo, men wom sarewo men ben men nggwa tepsu ye gato wo nde. Men yé gato sa it yo, men sa, sarewo men ben men nggwa tepsu ye gato sa nde. Men yé gato ku suk it yo, men nut mo suk gato men ku ne tepsu men bi suk nde, wo men ben men nggwa tepsu ye gato ku suk nde, men bi sukjimnut sye mone nde.

³¹Men yé gato ben suk su suk mwa mo bur re it yo, men ben men nggwa tepsu ye gato bi sukjimnut sye mo suk mwa ne nde, we yo nam nde ge, suk mwa neya mo bur re, bere kru or ré.

³²Ji iwa suk mwa yo syimfar men nde. Ye gato kra nde, an bi sukjimnut sye mo Yefun Allah bi suk-i sor. Sane an wergat an nggwa subere an ben an bi suk-i tepsu Yefun Allah mit sor.

³³Sarewo ye gato kra it yo, an bi sukjimnut sye mo suk mwa gato mo bur re, we an iwa an ben an bi suk-i tepsu an bi nggon mit dom.

³⁴Sane yelra ne iwa ben suk tepsu an bi nggon mit. An iwa ben tuk tepsu Yefun Allah mit dom anato ben an bi sukjimnut we mone. Nggon gato kra nde, mom bi sukjimnut sye mo Yefun bi suk-i. Mom iwa mom bi nggwa mo Yefun Allah wa ben Yefun bi suk-i sisu mom mit dik si mom onyar dik sor. Sarewo nggon gato kra it yo, mo bi sukjimnut sye mo suk mwa mo bur re, we mom iwa mom ben bi suk-i tepsu mom bi ya mit.

³⁵Ji krom sukdu mwa ne wa ós nin Ji yo duyawa nin kra yu nde, wo nin kra yo, nin yo kra nde yo, ji iwa nin ben suk gato ndo, nin ben Yefun Allah bi suk-i sisu nin mit dik si nin onyar dik sor.

³⁶Ye gato nut do, an iwa an sem su nggon gato an nggorwa ne, an me nggon ne kaim karowa ndin, ete an mit iwa kra nggon ne yo, ndo sa, an kra sor, sukibit anane nde.

³⁷Sarewo ye yi yo syaugat an nde, wo an dakai nai sukjimnut mo an dakai do, an yo kra su nggon ne nde, ete an mewa nggwa sisu ngo it yo, ndo sa, an yo kra su nggon nde nde, sukibit anane nde, wo os gato ndo anane.

³⁸Saneyo ye gato kra it yo, ben bi suk-i ndo anane, wo ye gato yo kra nde it yo, an ben an bi suk-i ndo wai o ré anane. Ji yo duyawa nin kra yu nde, wo nin kra yo, nin yo kra nde yo, ji iwa nin ben suk gato ndo, nin ben Yefun Allah bi suk-i sisu nin mit dik si nin onyar dik sor

³⁹Nggonkra si bi ya ne kem not su yu sor kom mo kam gato bi ya ne kwop. Mom bi ya do kwop, ete nggonna ne iwa kra ye yi yo o it yo, mom kra sor. Mom kra ye gato mom iwa kra ne, wo mom do kra o it yo, mom kra yé gato onyar kem mo Yefun Yesus sor.

⁴⁰Sarewo ji dakai bi sukjimnut do, ndo sa, nggonna ne kra o nde, bere mom kem ndo wai o ré. Ji dakai bi sukjimnut anane, wo Yefun Allah Gen kem mo ji mit anato An kak ji bi sukjimnut mo suk gato ji ki ne. … men mewa men nggwa, kadit men git sugit gato yé som sukdaret su ne, sawe bere ben ye gato gi sukjimnut mo mit yo nggi nde, ges mo os ibit