Read Abun 1 Korintus 8 Bible Online

1 Korintus 8 - Abun bible

1 Korintus 8

¹Ji bi sukdu subot sugit gato yé som sukdaret su ne. {Sugit ne, yé gu suge yo wa yé som suk ne su. Yé som suk ne, orete yé nai i-ku m yé gwat mu mo pasar wa yé so, ete yé nai wa yé git.} Yé ki do, “Men sino jam suk it.” Sukdu ne sangge, sarewo suk mwa gato yé jam ne ben nje mit at. Án dakai bes án nggwa kok mone, wo ye gato bi sukjimnut sye kas subot ye yi bere ben suk gato ós nje sor.

²Ye to nut do án jam suk mwa ete án bes án nggwa kok mone yo, ye ne yo jam suk kom mo mit nde tó.

³Sarewo ye to bi sukjimnut sye kas subot Yefun Allah it yo, Yefun Allah bes ye ne tepsu An bi yesyim.

⁴Sane ji bi sukdu subot sugit gato yé som sukdaret su ne anare, men sino jam do, suk gato yé som daret mo bur re iwedewe ne, suk ne bi suktinggi yo mo nde. Men sino jam o do, Yefun Allah yo mwa nde ré, wo Yefun Allah ne dik sor.

⁵Kapre yé ki do yefun ne mwa si yé bi sukjimnut do, men yetu bi yesu ne mwa, deyo mo gu nim, deyo mo bur re,

⁶sarewo men yé gato onyar kem mo Kristus jam do, Yefun Allah ne ka dik sor. An anato nggi wai o ré. Yefun Allah anato men bi Ai. An anato ut suk mwa mo bur re si gu nim ne. Men kem mo bur re wa men ben An bi suk-i sor. Men bi Yekwesu gato men jammo ne ka dik sor. Men bi Yekwesu ne anato Yesus Kristus. Yesus Kristus ne anato ós Yefun Allah ut suk mwa mo bur re si gu nim. Kadit Yesus Kristus ne anato men mbau mó tó ré.

⁷Sukdu sane yé mwa jam nde ré. Kadit nyim tuya yé deyo som sukdaret bu, yé nut do, suk gato yé som ne bi suktinggi mó. Sane su re, yé ne nut do, án git sugit gato yé som sukdaret su ne it yo, tepsu án som suk ne mó tó, (we yé som suk ne, orete yé gwat suge ku ne mo pasar, ete yé so wa yé git). Yé ne bi sukjimnut mo mit yo nggi nde, sane án nut do án git sigot ne yo, án ben sukibit anane, ondewo,

⁸men do git sugit ne yo, suk ne yo tepsu sukye yawa mit wa men si Yefun Allah nde. Kapre men git o, men yo git nde o, sugit ne yo ben men karowa Yefun Allah nde, sugit ne yo ben men kem ko kadit Yefun Allah dom nde.

⁹Sane men mewa men nggwa, kadit men git sugit gato yé som sukdaret su ne, sawe bere ben ye gato bi sukjimnut mo mit yo nggi nde, ges mo os ibit, we án waii git sugit ne, orete ri ma án nut do suk gato án ben ne ibit, ete ben án bi sukjimnut mo án mit waiyu ndo nde.

¹⁰We sare, men yé gato jam rer subot sukdaret gato nyim ne jom yé ne do, suk ne yo bi suktinggi yo mo ne, ete men mu git sugit ne karowa suk ne, sane ye gato bi sukjimnut mo mit yo nggi nde ma me men mone yo, bere sa u ne? Sane bere án bi sukjimnut mwa, ete án waii git sugit ne, ete án som suk ne satu o ré.

¹¹Kadit suk gato men jam ete men benbot ne, anato tepsu men ben kidar men bi nji gato Kristus kwop wa ne ges mo os ibit, ete kom mo rut sa, ye ne ges mo bot gesyos.

¹²Men do ben sukibit sane nai men bi nji si men bi nyanggon dogato bi sukjimnut mo mit yo nggi nde yo, tepsu men ben siri kadit Kristus mit it anane.

¹³Ji do git sugit gato kak os wa ben ji bi nji brek satu ma mo os ibit it yo, sane bere ji yo git suge ku gane o nde, sawe ji ben kidar ji bi nji ne ges mo os ibit or ré.