Read Abun 2 Korintus 11 Bible Online

2 Korintus 11 - Abun bible

2 Korintus 11

¹Ji ki sukdu wokgan re tepsu ye gato jam nde suk, sane nin maskwa ket ji kekro mo sukdu re nde. Nin misyar sukjimnut ibit gato it mo nin mit subot sukdu re yei.

²Ji mit iwa nin mit dik wa Kristus sor, tepsu Yefun Allah mit dik wa nin. Sarewo ben sato ji fro nin tepsu nggonnak be gato yo ben siri yo mo nde, orete ji tom do, ji syo nin kra su yebris ge dik yo gato gum do, Yesus Kristus dakai.

³Sarewo ji nokwa sawe yé bok yo ma su bi sukdu-i, ete brek nin bi sukjimnut mu nden wé kadit Kristus o ré, tepsu suga nyim tuya kwis ne meret os wa ben kidar Hawa, ete nggon ne brek kadit Yefun Allah bi os-i o ré.

⁴Ji nokwa nin brek kadit Yefun bi os-i, we ji me do, nin iwa yé bok yo gato ba ku nin ete duno nin su sukdu subot Yefun Yesus gato tara kadit sukdu gato men duno nin su ne. Sane dom, ji me do, nin iwa nin jammo suktinggi gato tara kadit Yefun Allah Gen bi suktinggi gato nin ku kadit men ré. Sane o, ji jam do, nin iwa nin jammo sukdu gato tara kadit sukdu subot os ndo gato Kristus kak gato men ki nai nin jam ne.

⁵Sarewo yé gato bok nin bes gum yerasul gato ndo wai ne, ji dakai nut do, ji gum-i wok mo bur kadit án gum-i nde.

⁶Ye duno ji wa ji ki sukdu mo yé mwa gwem sisu ndo ne yo mo nde, wo ji bi sukjimnut ne ko, nin dakai jam ré. Suk mwa gato ji jam ne, nin dakai me bor mo suk mwa ne sino gato men ben su nin mone ré.

⁷Ji gwat sukdu subot os ndo gato Yesus Kristus kak ne ba wa ji duno nin su sa, ji yo kiwa nin syo suk yo nai ji mo ji bi kamba mo nde, wokgan yo dom nde. Ji misyar ji dakai ete ji bes nin gum kok wai kadit ji, ete mone nin nut do, ji yo ndek suk mo nin nde anato ibit, sane nin misyar ji ete nin bes yé bok gane gum-i kok wai kadit ji gum-i bado?

⁸Ji duno nin su Yefun bi sukdu-i sa, yé gato onyar kem mo Yefun Yesus mo nu ari bok yo mo pe yi anato syo sugum nai ji. Ji yo duno nje mo nu ari bok ne yo mo nde tó, ji yo bi kamba mone nde, sane ben sato ji syimsi suk kadit án anane. Ji ku suk kadit nje mo nu ari bok yo anato ji ku os wa ji ma duno nin mone.

⁹Sane dom, ji duno nin mone sa, ji da yewa suk, sarewa ji yo ndek suk mo nin dom nde. Yé bok yo gato onyar kem mo Yefun Yesus gato ma kadit bur Makedonia ne, yé bok ne gwat suk gato ji yewa ne ma ete syo nai ji. Ji mewa ji nggwa subere ji yo ndek sukwokgan kadit nin dom nde. Ji mewa ji nggwa kadit ji ndek suk mo nin, bere ji ben suk sane petok sor.

¹⁰Ji jam Kristus bi sukdu-i gato sangge, sane suk gato ji ki re suksangge anare, bere ji un ji dakai mo gato ji yo ndek suk mo nin nde, bere ji un ji dakai sane sor yé mwa mo bur Akhaya ne sino jam o ré.

¹¹Suma ben anato ji yo ndek suk mo nin nde ne? Nin nut do, ji bi sukjimnut sye yo kas subot nin nde anato ji yo ndek suk mo nin nde, bado? Sane nde, Yefun Allah dakai jam ji bi sukjimnut sye kas subot nin dakai petok sor.

¹²Sane su kam sari ne ma ji yo ndek suk mo nin dom nde, sane sor, subere yé bok gato dakai bes án dakai gum yerasul ne yo ku os nde. Án dakai un án dakai mo suk gato án ben tepsu men, sarewo án yo nggiwa án ben suk tepsu ji ben ne nde, án ndek suk mo nin wa án dakai, wo ji yo ben sane nde.

¹³Yé bok gane, Yefun Allah yo syogat án ma kibot Yesus Kristus bi sukdu-i nde, á tepsu yerasul gato sangge nde, wo án dakai ben án nggwa tepsu ye gato Yefun Allah syogat ma ki subot Kristus bi sukdu-i ne sor ré, án werwa án ben kidar nin sor.

¹⁴Men yeket suk gato án ben ne nde, we biris bi yekwesu dakai ben nggwa tepsu Yefun Allah bi malaikat gato ben Yefun bi suk-i ri-roi ne ré.

¹⁵Sane biris bi yekwesu bi pakwerut-i do ben nggwa tepsu Yefun Allah bi pakwerut-i gato ben suk tepsu Yefun mit it yo, men yeket dom nde. Biris owa ben nggwa sane mó ré. Kom mo rut sa, ye gato ben nggwa kidar nje ne, bere án ku sukye tepsu sukibit gato án ben ne.

¹⁶Ji ki sukdu re wam dik yo o et: nin nut mo ji do, ji re ye gato jimgon nde. Wo nin do nut mo ji do, ji jimgon it yo, ndo dom, nin nut sane sor, subere ji ku os wa ji dakai un ji dakai mo sukwokgan yo o et.

¹⁷Sukdu gato ji ki re, ji yo ki tepsu pe gato Yefun Allah syogat ji ki ne nde, wo ji ki ji bi sukdu-i re tepsu ye gato jimgon subere ji dakai un ji dakai wokgan et.

¹⁸Yé mwa dakai un án dakai tepsu yetu mo bur re ben ne, sane ji waii un ji dakai wokgan tepsu yé mwa neya dom et.

¹⁹Nin dakai nut mo nin nggwa do, nin sa, nin jam suk mwa, ondewo nin yo jam suk kom mo pe yo nde go! Nin jam suk nde anato nin iwa yé bok gato jam nde suk ma duno nin ré.

²⁰Nin iwa yé bok gato ma daret ne ben nin tepsu án bi pakwerut, nin yo bariwa nde. Nin iwa yé bok gato ma daret ne ben kidar nin e, án ben nin nyu e, an dakai nai nin bi suk e ne, nin yo bariwa án mo nde. Nin iwa án bes nggwa kok, ete án ben sukye nai nin ket kwayo-kwayo, nin yo bariwa án mo nde.

²¹Men yo nggiwa men ben sukibit tepsu yé bok gane ben nai nin nde go! Men yo nggiwa nde, nin gendo ji damen, we men yo nggi nde bado? Mo nde go! Suk gato ye yi dakai un an dakai mone, bere ji dom yo nyuwa nde, wo ji waii un ji dakai tepsu yé gane dom mó et. (Mban! Ji ki ji bi sukdu-i tepsu ye gato jimgon anare.)

²²Yé ne, ye Ibrani bado? Ji re, ye Ibrani dom. Yé ne, ye Israel bado? Ji re, ye Israel dom. Yé ne, bi amui mo Abraham bado? Ji re, bi amui mo Abraham dom.

²³Yé ne, Kristus bi pakwerut-i bado? Ji re, Kristus bi pakwerut-i dom, sarewo ji ben ji bi suk-i ndo wai kadit yé mwa ne o ré. (Mban! Ji ki ji bi sukdu-i ne tepsu ye gato jimgon ko re go!) Sarewo ji samok wa ji ben suk mwa wai kadit yé bok ne o ré. Ji re anato ye sok mo sel wam bok yo mó ré, mwa wai kadit án o ré. Ye kwam kete is ji wam bok yo mó ré, mwa wai kadit án o ré. Ji re anato ku sukye mwa wam bok yo mó ré, karowa ji kwop rok. Ji ku sukye mwa wai kadit án o ré.

²⁴Ye Yahudi but ji, án kwam ji wam musyu gri sop musi. Án but ji ete kwam ji sane wam mumek it.

²⁵Sane dom, ye Roma gwa ji su kwekoi wam gri mó ré. Ye am ji su jok dom wam dik yo mó ré. Ji simo kapal ete kapal ne det, kru su ji mo sem wam gri yo mó ré. Wam dik yo kapal kru su ji, ete kam dik noru dik ji dakai nor mo sem gun ne sor, orete ye yo ma nai ji.

²⁶Ji mu kom mo peyo-peyo mwa yé ré. Ji mubot pe mwa ne gat sa, ji ku sukye ndo nde. Ji ku sukye mo syur syé e, ji ku sukye mo ye gato ma gwa ji ete syimsi ji bi suk e, ji ku sukye mo ji dakai bi nje-i, ye Israel si yewis yi neya sino, ji ku sukye mo kota mit e, ji ku sukye mo nden e, ji ku sukye mo sem e, ji ku sukye mo nje gato ben nggwa tepsu ye gato ben Yefun Allah bi suk-i, ondewo yé ne mit-i tara ré.

²⁷Ji samok wa ben suk, ji wergat ji nggwa, ji ben suk noru nombrak sor, ji yo ndo o nde, ji yo sem ri nde, ji on de e, ji sosa e, ji yo git sugit ri dom nde, ji yewa sugit, ji yewa san, ji dot, we ji ku nat yo wa ji sem mo nde.

²⁸Ji yo ku sukye mwa ne sor nde, wo kamdik-kamdik ji bi sukjimnut waiyu mo yé gato onyar kem mo Yefun Yesus mo nu ari mwa ne sino, ji nutbot os yo sa u subere ji mewa yé mwa ne sisu ndo et.

²⁹Yetu ge dik yo mone do, kaim rere yo, bere ji nutbot ye ne wade ji kaim rere dom. Suk yo tik yetu ge dik yo o ges mo os siri ete an ku sukye mone it yo, bere ji bi sukjimnut kas bot ye ne mo sukye gato an ku ne ndo nde.

³⁰Sane ji ki subot suk gato ji un ji gum su ne it yo, bere ji ki sukdu subot ji dakai subere nin jam do, ji re ye gato yo nggi nde.

³¹Ji yo kidar nde, Yefun Allah, men bi Yekwesu gato Yesus Kristus bi Ai ne, men bes An gum kok petok sor to kapyo mato kapyo. Yefun Allah ne sa, jam ji kom mo mit ré. An jam do, ji yo kidar nde.

³²Ji ki sukdu subot tomgato ji kem mo kota Damsyik. Sugane ji yo nggi o nde. Ji kem mo kota Damsyik mit sa, yesu gato yeraja Aretas bes wa jom nje mo kota ne, yesu ne syogat bi yesukmise mewa kota ne bi ros syo subere ji do wai ket pe ne it yo, yesukmise ne but ji mone.

³³Sarewo ji bi yesyim bok ji mo syu bo gato sye, ete án sa ji is su syu bo ne is ket ros wak mo pe yi mu kom mo kota de nden. Sane yesukmise ne yo ku os wa but ji nde. Sane ji ki sukdu subot ji dakai subere nin jam do, ji re ye gato yo nggi nde.