Read Abun 2 Korintus 6 Bible Online

2 Korintus 6 - Abun bible

2 Korintus 6

¹Men anato ye gato ben Yefun Allah bi suk-i, sane men ki nai nin do, nin kamo su os ndo gato Yefun Allah dakai fro yi wa nin nde. Yefun Allah dakai fro os ne wa nin, nin yo ben suk yo nyim wa An nde, sane nin misyar os ndo ne nde, wo nin simo os ne sisu sangge sor.

²Mo Yefun Allah bi sukdu, Yefun Allah ki do, “Tepsu bi kam gato Ji fro os ndo dakai yi wa nin yo, su kam ne Ji ós nin tepsu nin bi sukdu-i it. Tepsu bi kam gato Ji nai nin wé kadit sukye gato nin ku ne yo, su kam gane Ji ós nin kem ndo it.” Nin jammo suk gato men ki re et, kam gato Yegun Allah fro os ndo dakai yi wa nin ne anato kam re it. Su re Yefun kak os wa nai nin wé kadit bot gesyos, subere nin kem ndo to kapyo mato kapyo it. Sane nin sabot os gato Yefun fro ne su kam re et.

³Men bariwa ye kiket men gum mo suk gato Yefun syogat men ben ne. Sane men wergat men nggwa subere men ben suk gato ibit yo mo nde, kwa dik yo dom nde, sawe sukibit ne kak os wa ye ki men gum ibit ket kwayo-kwayo mone. … men wergat men nggwa subere men ben suk gato ibit yo mo nde, kwa dik yo dom nde

⁴Wo mo suk mwa gato men ben ne, men ben men bi suk-i subere ye jam do, men anato Yefun Allah bi pakwerut. Men ku sukye, ye ben men ket kwayo-kwayo, men yo ndo nde it yo, men misyar sor, men maskwa wa nde sane sor wade sukye ne or wé kadit men.

⁵Ye gu men e, ye but men e, ye sok men mo sel e, yé mwa sum ete maskwa ket men e, men ben suk, men kamba ndo nde noru nombrak e, men yo sem ri nde e, men yo ku sugit tep wa men git dom nde e ne, men ku sukye ndo nde go!

⁶Men da ku sukye mwa ne, sarewo men ben men bi suk-i su men onyar kwo sor. Sane dom Yefun Allah kak men bi sukjimnut subere men ben sukye satu mu nai ye gato ben sukye ma nai men ne mo nde, wo men eswa sor, sukye ne dakai or wé kadit men. Men yo mit ibit ket ye gato ben sukye nai men ne nde, wo men mit ndo ket an sor, subere an jam do, men anato Yefun Allah bi pakwerut. Sane dom, mo sukye gato men ku ne Yefun Allah Gen syo bi suktinggi nai men, ete men nggiwa men bi sukjimnut sye kas subot ye ne sisu sangge petok sor.

⁷Men ki subot Yefun Allah bi sukdu gato sangge, men kadum An bi suktinggi ne nai ye ne dom, subere ye jam do, men anato Yefun Allah bi pakwerut. Men benbot suk gato Yefun Allah iwa men ben ne yo, ben sato men jom sukmise wa men syun sukibit titi ko kadit men anane. Men jom sukmise ne subere ye yo ma wa ki men gum ibit yo, men gwa nggwa wa men kadit sukdu daret gato ye kiket men su ne. … mo sukye gato men ku ne Yefun Allah Gen syo bi suktingggi nai men

⁸Ye deyo bes men gum kok, wo ye deyo o kiket men. Ye deyo ki men gum ndo, wo ye deyo o ki men gum ibit. Men da ben Yefun bi suk-i ne ri-roi, sarewo ye ki sukwok mo men do, men anato tepsu ye gato kidar suk.

⁹Yé mwa da jam Yefun bes men gum wa ben An bi suk-i, sarewo ye yi mwa neya jam nde men ré. Yé mwa ne nut mo men do, karowa men kwop rok, sarewo men mbau, men nggi tó. Ye gu men, sarewo men yo kwop nde.

¹⁰Men da nderku nggwa, sarewo men mit at wa suk mwa neya petok sor. Men yo ku suk yo mo nde, sarewo men kak os wa yé mwa neya ku suk mwa kadit Yefun. Ye da nut do, men bi suk yo mo nde, sarewo men sa, bi suk mwa ne sino mo bur re iwedewe mó ré.

¹¹Ji bi nji ji bi nyanggon gato ji jimnotku mo kota Korintus, men kak men mit ré, men ki sukdu mwa ne syesyar or wa nin jam rer ré, deyo gato men gurik kadit nin yo mo nde. Men bi sukjimnut sye kas subot nin sisu men mit dik si men onyar dik sor.

¹²Men rek men mit si men onyar mu nai nin jam ré, men mit dek ket nin, sarewo nin bariwa karowa men, ete nin mit dek ket men mó nde tó.

¹³Sane su re yo, ji ki suk su nin tepsu ji ki suk su ji dakai bi pa-i anare, ji ki sare do, nin waii ben suk tepsu ji dakai ben su nin et, nin waii rek nin mit si nin onyar ma nai ji dom et. Men si ye gato jam nde Yefun Yesus tepsu dik wa ben suk sino yo, bere suk ne yo kas ndo nde

¹⁴Men si ye gato jam nde Yefun Yesus tepsu dik wa ben suk sino nde. Men si ye gato jam nde Yefun Yesus tepsu dik wa ben suk sino yo, bere suk ne yo kas ndo nde. Ye gato ben bi suk-i ndo si ye gato ben bi suk-i ibit, bere ben suk tepsu dik sino sa u ne? Ndendu si nden rer sino bor mo pe dik sa u ne?

¹⁵Kristus si biris bi yekwesu bere nai sukjimnut tepsu dik sa u ne? Yé gato onyar kem mo Yefun Yesus si ye gato jam nde Yefun Yesus, an we bi sukjimnut tepsu dik subot suk sato suma ne? Bere yo mo nde go!

¹⁶Ye gato mo Yefun Allah bi nu-i si ye gato mo yefun gato ye som daret ne bi nu-i ne te, bi sukjimnut tepsu dik subot suk sato suma ne? Bere yo mo nde. Men bi sukjimnut tara kadit ye gato som sukdaret ne, we men anato tepsu Yefun Allah gato gesyos ne bi rus-i gato kem mo An bi nu-i, tepsu Yefun Allah ki do, “Bere Ji dakai anato si Ji bi rus-i kem sino mo pe dik, Ji si án kem sino mone. Bere Ji Yefun Allah anato tepsu yenggras gato jom án ne, án anato tepsu Ji bi rus-i.” Sane Yefun Allah ki nai bi rus-i do, “Sane nin tik nggwa wé kadit ye gato jam nde Yefun Allah ne et.”

¹⁷Sane Yefun Allah ki nai bi rus-i do, “Sane nin tik nggwa wé kadit ye gato jam nde Yefun Allah ne et. Nin ti ko kadit yé ne. Nin mewa nin nggwa kadit ye gato Ji bagri ket sor, sane bere Ji nai nin sok mo Ji bi rus-i.

¹⁸Bere Ji tepsu nin bi Ai, ete Nin tepsu Ji bi pa, Ji bi pa yebris si pa donggon sino. Ji anato Yefun Allah, nin bi Yekwesu, gato nggi wai o ré, Ji ki bi sukdu-i kwop mone it.”