Read Abun 2 Korintus 9 Bible Online

2 Korintus 9 - Abun bible

2 Korintus 9

¹Men yo krom sukdu subot sugum gato men sum wa men bi nai yé gato onyar kem mo Yefun Yesus mo bur Yudea ne o nde, nin dakai jam ré.

²Ji jam do, nin sa, mit iwa nin ós nje su sugum. Ji un nin gum mone nai nje mo bur Makedonia jam mó ré. Ji ki nai ye Makedonia ne do, “Suga tahun gato nyim ne, nin yé gato tepsu Yefun Allah bi rus-i mo bur Akhaya fro nggwa wa bi sugum nai nje mo bur Yudea ne it.” Ye jam do, nin mit iwa syo sugum anato ben yé mwa napyo sye waii iwa syo sugum nai nje mo bur Yudea ne dom.

³Re yo, ji syogat Titus si bi yesyim ge we ba ku nin subere an ka gri ós nin benbot suk gato ji un nin gum mone. Suk gato men un nin gum mone, nin benbot sor, nin misyar wa nde, subere yé jam do, men yo ki suk su men syokwet sor nde. Ji ki su an ka gri ne mó ré, sane nin fro sugum tepsu pe gato nin tom ne et.

⁴Nin fro sugum ne pe ré, sawe ye Makedonia deyo si ji sino ba mone ret e ne, ete men me do, nin yo fro sugum ne nde yo, bere men damen ndo nde, we men ki mó sare do, men onyar kem mo nin wa fro sugum ne pe ré. Sane nin yo fro nde yo, bere nin dakai damen mone dom.

⁵Sane anato ji werwa ji syogat ye ka gri ne ba nyim wa ós nin fro sugum mwa gato nin tom ne. Sane bere ji do ba kom motu it yo, sugum mwa ne kwop pe ré. Sane bere yé jam rer do, nin syo sugum yo, ye yo wergat nin nde, nin syo su nin mit bariwa nde, wo nin syo sugum ne su nin mit iwa sor.

⁶Nin jammo suk gato ji ki re et, ye gato jan sukjan wokgan, bere an ku i-bo wokgan sor ré. Ye gato jan sukjan mwa yo, bere an ku i-bo mwa dom. Sane dom men syo sukwokgan nai ye yi it yo, bere men waii ku sukwokgan sor ré, wo men syo suk mwa nai ye yi it yo, bere men waii ku suk mwa mone o ré.

⁷Ye gato syo suk nai ye yi it yo, an syo su an mit dik sor, an syo su an bi sukjimnut mwe nde. Ye yi yo wergat an, ete an syo suk ne, bere siri ré, we Yefun Allah bi sukjimnut sye kas subot ye gato syo suk su an mit dik si an onyar dik ne sor.

⁸Yefun Allah sa, nggiwa An syo suk mwa wai kadit suk gato men mit mone, subere suk mwa gato men dakai mitmo ne men ku wai kadit ne petok sor. Sane bere men ku suk mwa wa men syo nai ye yi gato yewa suk.

⁹Tepsu ye krom mo Yefun Allah bi sukdu do, “Yefun Allah syo suk mwa gato ndo nai ye gato yewa suk. An ben An bi suk-i ne ndo su nje petok sor to kapyo mato kapyo.”

¹⁰Yefun Allah gato fro sukjan gro si sugit wa men, An dom syo sukjan gro mwa gato men mit mone, An ben sukjan ne kom ndo, ete men ku i-gro mwa o mo naprut. Sane dom, men ben men bi suk-i ne ndo, men iwa syo suk nai nje, bere Yefun Allah syo suk mwa gato ndo o nai men satu, tepsu sukjan bo gato ndo ne syesyar i-bo mwa o mo naprut.

¹¹Yefun Allah anato syo suk mwa neya nai nin subere nin waii syo suk mwa su nin mit dik nai ye gato yewa suk petok sor. Sane bere men gwat sugum mwa gato nin sum wa men syo nai nje mo bur Yudea ne. Men gwat sugum mu kom motu sa, bere yé mwa un Yefun Allah gum mo suk ne,

¹²we sugum gato nin syo ne, yo ós Yefun Allah bi rus-i gato yewa suk sor nde, wo bere ben yé mwa neya un Yefun Allah gum mo sukndo gato nin ben ne. Bere yé mwa ne un Yefun wokgan dom nde, wo mwa ndo nde.

¹³Nin do syo sugum ne mu kom motu it yo, bere Yefun Allah bi rus-i mwa mo bur Yudea bes Yefun Allah gum kok o ré, we án me do, nin sa, nin sibot os ndo gato Yesus Kristus kak ne sisu ri-roi. Sane dom, bere án bes Yefun Allah gum kok, we nin syo suk mwa kadit suk gato nin ku ne dakai yi nai án si ye yi neya.

¹⁴Sane bere án ki suk su Yefun wa nin yo, án nutbot nin ndo nde, we án jam do, Yefun Allah bi sukjimnut sye kas subot nin mwa wai o ré, wade ben nin mit iwa nin syo sugum mwa yé nai án ré.

¹⁵Sane men un Yefun Allah gum mo sukndo mwa gato An dakai syo nai men yi. Suk gato An syo nai men, ndo wai teker o ré.