Read Abun Galatia 1 Bible Online

Galatia 1 - Abun bible

Galatia 1

¹Ji gato gum do Paulus anato krom surat re wa nin yé gato onyar kem mo Yefun Yesus mo bur Galatia. Yetu yo syogat ji mu duno nje subot Yesus Kristus nde. Ji dakai re, yetu yo bes ji gum yerasul nde, wo Yesus Kristus si men bi Ai, Yefun Allah gato sun Yesus Kristus kadit sukkwop anato bes ji gum yerasul. Ji si ye Kristen yi gato si ji kem more ki ndo mo nin ye Galatia gato onyar kem mo Yefun Yesus ne sino.

³Men bi Ai, Yefun Allah si men bi Yekwesu Yesus Kristus ete mewa nin. Yefun Allah si Yesus Kristus ete uttok nin petok sor.

⁴Yesus Kristus bi An nggwa kwop wa tot sukibit gato men yetu ben ne wé ré, tepsu pe gato men bi Ai, Yefun Allah, imo ne. Sane su re An nai men kadit os ibit gato jim men mo bur re ne.

⁵Sane men bes Yefun Allah gum kok su kapre to kapyo sor mato kapyo. Sangge.

⁶Ji yeket non, we nin misyar Yefun Allah bi os-i gato An fro wa nin mo suk gato Yesus Kristus ben ne. Nin dakai yo ben suk yo nyim wa Yesus Kristus yo mo nde, wo Yesus Kristus dakai bi nggwa wa men, ete Yefun Allah kendo nin sibot os ndo gato An kak ne. Sane, suma ben anato nin misyar Yefun bi os-i ne? Nin brek kadit sukdu gato ndo, ete nin jammo sukdu yi gato tara o ré. Sukdu yi gato yé bok yo ma ki ne nin nut do ndo,

⁷sarewo sukdu ne yo ndo mo nde. Yé bok ne duno nin su án dakai bi sukdu-i gato siri kadit Kristus bi os-i gato Yesus Kristus kak wa men sok mo Yefun Allah bi rus-i. Yé bok ne kidar nin do, án bi sukdu-i ne tepsu Kristus bi sukdu-i, wo yé bok ne bi sukdu-i tara ré, sane anato án ben nin nalar o ré.

⁸Men deyo e, malaikat e ne do ma kadit gu, ete ki bi sukdu-i tara kadit Yesus Kristus bi sukdu-i gato men duno nin su ne yo, sa ndo sa, Yefun Allah ete syo sukye nai ye ne mo bot gesyos sor.

⁹Sukdu re men ki nai nin mó ré. Su re ji ki wam dik yo o sare do, ye to duno nin su sukdu yi gato tara kadit Yesus Kristus bi sukdu-i gato nin onyar kem mone, Yefun Allah ete syo sukye nai ye gato ki bi sukdu-i sane mo bot gesyos sor.

¹⁰Sane ji ki ji bi sukdu-i wa meret os subere yetu iwa ji bado? Sane nde ré, wo ji ki ji bi sukdu-i subere Yefun Allah iwa ji sor. Ji krom sukdu wa tik yetu mit subere yetu mit iwa ji bado? Nde ré. Ji do ki sukdu subere yetu iwa ji yo, ji tepsu Kristus bi pakwerut nde.

¹¹Ji bi nji, ji bi nyanggon, sukdu subot os gato Yesus Kristus kak wa men yetu ne anato ji duno nin su ne. Sukdu ne ma kadit yetu nde.

¹²Yetu yo ki sukdu ne nai ji jam dom nde. Yetu ge dik yo duno ji su dom nde, wo Yesus Kristus dakai kadum sukdu ne rer nai ji dakai jam.

¹³Ji re, nin dakai jam ré. Suga nyim neya ji sok mo ye Yahudi bi agama. Sugane ji ben sukye ndo nde nai yé gato onyar kem mo Yefun Yesus. Ji werwa ji ben sukye nai yé gato simo Yesus Kristus bi sukdu-i, subere án bare Yesus Kristus bi sukdu-i ne wé.

¹⁴Sugane ji dakai anato jam suk mwa mo ye Yahudi bi agama. Ji jam suk mwa wai kadit ye yi gato ti sos tepsu ji. Ji re anato iwa sukduno gato men bi amui duno men su ne wai o ré.

¹⁵Sarewo ji bi im yo kem su ji nde tó, Yefun Allah bes ji wa ji ben An bi suk-i it, ji yo ben suk yo nyim wa An nde, wo Yefun Allah dakai bes ji yi wa ji ben An bi suk-i.

¹⁶An kadum An bi Gan nai ji, subere ji ki sukdu subot os ndo gato An bi Gan kak ne nai yewis yi neya jam. Sugane ji yo mu meret ye yi yo o wa duno ji nde.

¹⁷Ji yo mu mo yerasul gato Yefun Yesus bes nyim kadit ji mo Yerusalem dom nde. Wo ji mu mo bur Arab. Or o ji satu ma mo kota Damsyik.

¹⁸Tahun gri, orete ji mu mo Yerusalem wa ji ku Petrus. Ji si an kem mo an bi nu sor kom mo kam musyu dik sop mek rek. “Ye gato ben sukye nai men suga nyim neya, re ne an brek ma, an duno nje su sukdu subot Yesus Kristus gato nyim ne an duwer men mone o ré.”

¹⁹Sugane ji ku men bu Yekwesu Yesus Kristus ne bi nji gato gum do Yakobus sor ré. Ji yo ku yerasul yi neya nde.

²⁰Suk gato ji krom re sangge, ji yo kidar nde, Yefun Allah dakai jam ré.

²¹Or o ji mu mo bur Siria si bur Kilikia.

²²Sugane ye gato onyar kem mo Yesus Kristus gato kem mo bur Yudea, yé mwa ne yo ku ji gro mo nde tó, yé jam nde ji.

²³Sarewo yé mone dakai jam sukdu gato yé ki subot ji, sare do, “Ye gato ben sukye nai men suga nyim neya, re ne an brek ma, an duno nje su sukdu subot Yesus Kristus gato nyim ne an duwer men mone o ré.”

²⁴Yé mo bur Yudea ne jam sukdu gato ye ki subot ji sa, yé bes Yefun Allah gum kok mone ré.