Read Abun Galatia 3 Bible Online

Galatia 3 - Abun bible

Galatia 3

¹Nin ye Galatia jimgon! Je u anato ben kidar nin anato nin jimgon teker sare ne? Ji dakai ki sukdu subot Yesus Kristus kwop mo kwesukwin ne, ji ki rer wa nin dakai jam mó ré.

²Sane ji iwa ji ndo nin subot kwa dik yo sare do, nin bek suk sato suma anato Yefun Allah Gen bok nggwa mo nin ne? Nin nutbot sisu ndo et. Nin ben suma ne? Nin wergat nin nggwa wa nin benbot ye Yahudi bi sukduno-i bado? Sane nde ré. Nin onyar kem mo sukdu subot os ndo gato Yesus Kristus kak ne bado? Sane sa, nin onyar kem mo Kristus, bere Yefun Allah Gen bok nggwa mo nin it anane.

³Bei! Suma ben anato nin jimgon teker sare ne? Su ketke Yefun Allah Gen ós nin muket os be re, wo su re, suma ben anato nin misyar Yefun Allah Gen ete nin dakai meret suktinggi mo nin dakai wa nin sok mo Yefun Allah bi rus-i ne?

⁴Nin dakai jam Yefun Allah Gen bok nggwa mo nin, ete ós nin mo suk mwa, orete kom mo rut suk yo mo nde bado? Sangge, Yefun Allah da bok An Gen mo nin mó ré fe!

⁵Nin onyar kem mo Yefun Yesus anato Yefun Allah Gen bok nggwa mo nin ete ben nin nggiwa nin ben suk gato ben je yeket bado? Nin wergat nin nggwa wa nin benbot ye Yahudi bi sukduno-i anato Yefun Allah Gen ben nin nggiwa nin ben suk gato ben nje yeket bado? Sane nde, wo nin jam sukdu subot os ndo gato Kristus kak ne, ete nin onyar kem mo An, sane anato Yefun Allah Gen bok nggwa mo nin ete ben nin nggiwa ben suk gato ben nje yeket ne.

⁶Nin onyar kem mo Yefun, tepsu sukdu gato ye krom mo Yefun Allah bi sukdu subot Abraham sare do, “Abraham onyar kem mo sukdu gato Yefun Allah ki nai an, sane anato Yefun Allah nut mo Abraham do, an sa, tep wa sok mo Yefun Allah bi rus-i it.”

⁷Sane ye gato onyar kem mo Yefun anato tepsu Abraham bi pa gato sangge, nin jam it bado?

⁸Suga nyim ye krom mo Yefun Allah bi sukdu do, bere Yefun Allah kak os wa yewis yi sok mo An bi rus-i ne. Ye gato onyar kem mo An anato ku os wa sok mo Yefun bi rus-i. Tomga nyim tuya Yefun Allah ki sukdu subot os ndo gato Yefun Yesus kak ne, Yefun Allah ki sukdu subot os ndo gato Yefun Yesus kak ne, Yefun Allah ki nai Abraham sare do, “Kadit nan bi wis-i bere Ji fro os ndo wa yewis mwa ne sino mo bur re ré.”

⁹Sane ye gato onyar kem mo Yefun tepsu Abraham onyar kem mo Yefun ne, bere Yefun ben sukndo su an, tepsu Yefun ben sukndo su Abraham ne.

¹⁰Ye gato onyar kem mo ye Yahudi bi sukduno-i wa ós an gum sok mo Yefun Allah bi rus-i, bere siri ré. Yefun Allah dufo mo ye ne ré. Ye gato bi sukjimnut sane bere ku sukye sor, we ye krom mo Yefun Allah bi sukdu do, “Ye gato yo benbot ye Yahudi bi sukduno mwa ne sino nde, bere Yefun Allah dufo mo ye ne.” {Yefun bariwa nai ye ne sok mo An bi rus-i.}

¹¹Sukdu ne rer wa men jam do, men benbot ye Yahudi bi sukduno-i, bere men yo ku os wa Yefun Allah nai men gum sok mo An bi rus-i nde, we ye krom mo Yefun Allah bi sukdu do, “Men onyar kem mo Yefun Allah it yo, bere men si Yefun Allah kem ndo, we Yefun Allah nut mo men do, men sa, tep wa sok mo An bi rus-i it anane.”

¹²Ye krom mo Yefun Allah bi sukdu ne o do, “Ye gato benbot ye Yahudi bi sukduno-i mwa ne sino, siri kadit wokgan dom nde, bere an kem ndo.” Sarewo os ne yé teker wa men ware, men yo ku os mone nde. Wo os dik yo gato tara kadit ne anato men onyar kem mo Yefun Yesus sor.

¹³Men yo nggiwa benbot ye Yahudi bi sukduno-i sino nde, sane Yefun Allah dufo mo men, men ku sukye mone, wo Yesus Kristus ma ku sukye ne win men ré. An kwop tepsu suktot wa men, tepsu ye krom mo Yefun Allah bi sukdu do, “Ye gato yé mban kok mo kwesukwin ne ku sukye ndo nde.”

¹⁴Yesus Kristus kwop mo kwesukwin win men subere os ndo gato Yefun Allah tom su Abraham ne, An kak wa yewis yi ne sino dom. Sane men onyar kem mo Yesus Kristus yo, men ku os wa sok mo Yefun Allah bi rus-i, ete Yefun Allah syo An Gen nai men, tepsu An tom ne.

¹⁵Ji bi nji ji bi nyanggon, men nutbot suk gato men ben kamdik-kamdik sisu ndo et, sato re do, yetu ge we tom suk yo su yu, bere sukdu gato an we kibot ne, an we imo, or an we es syim mó. An we es syim mó sane, or sukdu kem mone it. An we yo misyar sukdu ne nde. An we yo ki kwa yo tó o nde. Yefun tom bi suk-i su men digane dom, pe gato An ki kwop mone it yo, anane it.

¹⁶Sane Yefun Allah tom suk su Abraham si Abraham bi pa ne do, kadit Abraham bi pa ge dik yo anato Yefun Allah fro os ndo wa yewis mwa ne sino sok mo Yefun Allah bi rus-i. Mo Yefun Allah bi sukdu, ye krom do, Yefun Allah tom suk su Abraham bi pa mwa nde, wo pa gato Yefun Allah tom su re, pa ge dik sor ré. Pa ne anato Kristus.

¹⁷Ji bi sukdu-i sare do, suk gato Yefun Allah tom su Abraham ne do, kadit Abraham bi pa ge dik yo anato Yefun Allah fro os be wa yewis mwa ne sino sok mo Yefun Allah bi rus-i. Suk gato Yefun tom ne Yefun Allah yo misyar nde. Yefun tom su Abraham su ketke ne, or tahun wotin at musyu gri, orete Yefun Allah ki sukduno yo o nai Musa. Sarewo Yefun Allah yo win suk gato An tom su Abraham ne su sukduno gato Musa krom ne nde, wo suk gato Yefun Allah tom su Abraham kadit ketke ne kem pe ré.

¹⁸Sane men ku os wa men sok mo Yefun Allah bi rus-i. Men nut do, i-ke mo suk gato men ben tepsu ye Yahudi bi sukduno-i gato Musa krom ne yo, bere siri ré. Wo men ku os wa men sok mo Yefun bi rus-i mo suk gato Yefun tom su Abraham sor. Yefun Allah dakai bi sukjimnut sye kas subot Abraham, Abraham yo ben suk yo nyim wa Yefun mo nde, wo Yefun dakai tom su Abraham do, bere Abraham bi pa ge dik yo kak os wa men yetu sok mo Yefun bi rus-i.

¹⁹Sane Yefun Allah syo bi sukduno nai Musa wa Musa krom wa suma ne? Yefun Allah syo bi sukduno ne tó suk gato An tom su Abraham ne subere men jam suk gato tepsu Yefun Allah mit si suk gato siri kadit Yefun Allah mit ne. Sukduno ne, Yefun Allah syo subere ós nje kadit kam ne sor kom mo kam gato Abraham bi pa, Yesus Kristus ne ma. Ye Yahudi bi sukduno-i ne, malaikat gwat ma kadit Yefun Allah ete ki nai yegweswai dik yo gato gum do Musa. Or o Musa waii ki sukduno ne nai men yetu jam.

²⁰Yegweswai sagana gwat sukdu kadit yetu ge dik yo, ete ki nai yetu ge dik yo o. Sarewo suk gato Yefun Allah tom su Abraham, yegweswai yo mo nde, wo Yefun Allah wadigan tom suk su Abraham sor ré.

²¹Ye Yahudi bi sukduno-i gato Musa krom ne te, siri kadit suk gato Yefun Allah tom su Abraham ne bado? Nde ré! Ye Yahudi bi sukduno-i do nggiwa kak os wa men sok mo Yefun bi rus-i ete men kem ndo yo, bere Yefun nai men sok mo An bi rus-i mo suk gato men ben tepsu sukduno ne.

²²Sarewo sukduno ne yo nggiwa ós men sok mo Yefun Allah bi rus-i nde, we ye krom mo Yefun Allah bi sukdu do, men yetu sino mo bur re ben sukibit, sukibit ne ben sato jom men tepsu bi pakwerut wa men ben sukibit bu. Sane suk gato Yefun Allah tom su Abraham ne, Yefun benbot, An fro os wa men sok mo An bi rus-i it. Men onyar kem mo Yesus Kristus anato men ku os wa Yefun nai men sok mone, sane anato men ku suk gato Yefun Allah tom ne it.

²³Yesus Kristus yo ma mo bur re nde tó, men yo ku os wa men onyar kem mo Yesus Kristus nde tó, sane ye Yahudi bi sukduno-i ne jom men krat tepsu men kem mo sel mit. Ye Yahudi bi sukduno-i ne jom men sane sor kom mo kam gato Yesus Kristus ma kak os wa men, subere men do onyar kem mo An yo, bere Yefun nai men sok mo An bi rus-i.

²⁴Sane men jam do, ye Yahudi bi sukduno-i jom men yei ete ben men meret os yi yo o wa men sok mo Yefun Allah bi rus-i, we sukduno ne yé teker wa men benbot. Sane men ku os ne mo Yesus Kristus, men onyar kem mo An it yo, bere Yefun nut mo men do, men sa, tep wa sok mo An bi rus-i it.

²⁵Sane su re men onyar kem mo Yesus Kristus, sane men yo mit wa ye Yahudi bi sukduno-i o nde.

²⁶Nin onyar kem mo Yesus Kristus, sane anato nin tepsu Yefun Allah bi pa-i mone it.

²⁷Nin yé bok ne sino gato bi nggwa mo Yesus Kristus ete ye ras nin mo syur ne, nin tepsu Yefun bi pá-i, we nin nai sukjimnut tepsu Yesus Kristus it.

²⁸Sane ye Yahudi e, ye Yunani e, pakwerut e, ye gato dakai ti mo an dakai e, yebris e, nggon e ne, men sino yo tara kadit yu nde, wo men sino si Yesus Kristus tepsu yedik, men sino si Yesus Kristus sok mo rus dik it.

²⁹Men do sok mo Yesus Kristus bi rus-i it yo, sane men re tepsu Abraham bi pá dom, ete men ku os ndo gato Yefun Allah tom su men ne, Yefun nut mo men do, men sa, tep wa sok mo An bi rus-i it.