Read Abun Galatia 4 Bible Online

Galatia 4 - Abun bible

Galatia 4

¹Sarewo ji ki sukdu, ji gwat sukamno wa nin jam sare do, pa gato bi ai syo bi sukrok mwa ne sino nai pa ne, ete pa ne wok tó yo, pa ne da bi suk mwa, sarewo pa yo ku os wa nai suk ne nde tó. Sane pa yo ku suk mo nde, tepsu pakwerut gato yo ku suk mo nde.

²Bere ye yi jowa pa ne si bi suk ne sor kom mo kam gato pa bi ai tom su ne, orete pa nai sukrok mwa ne wa pa dakai.

³Men dom digane, men jam Yefun yo ri nde tó, ben sato men tepsu pa wokgan, sane suk gato mo gu nim ne si bur re sino ben sato jom men tepsu pakwerut.

⁴Sarewo tepsu kam gato Yefun Allah fro ne, Yefun Allah syo An bi Gan ma mo bur re. Nggon dik yo kem su An. An kem mo bur re, An jammo ye Yahudi bi sukduno.

⁵Yefun Allah syo An bi Gan ma wa tot men bi suktot mo suk gato men ben siri kadit ye Yahudi bi sukduno-i ne, subere men ku os wa men tepsu Yefun Allah bi pá-i gato sangge, ete mone men ku suk mwa ne sino gato Yefun fro wa men ne.

⁶Men anato Yefun Allah bi pá-i, sane anato Yefun Allah syo An bi Gan Gen bok nggwa mo men mit. An bi Gan Gen ben men ki su men mit dik nai Yefun Allah do, “Ai o, Ji bi Ai o.”

⁷Sane men re tepsu pakwerut o nde, wo men tepsu Yefun Allah bi pá. Men tepsu Yefun Allah bi pá, sane bere Yefun Allah syo suk gato An fro wa An bi pá, bere An syo is men mone tó.

⁸Suga nyim nin jam nde Yefun Allah. Sugane nin jammo suk sato yerom e, aboksye e ne. Suga nyim nin tepsu pakwerut wa suk bok ne, sarewo suk ne yo tepsu Yefun Allah gato sangge ne nde, suk ne yo karowa tepsu Yefun Allah dom nde.

⁹Wo su re nin jam Yefun Allah tepsu nin bi Ai it. Sane sor nde, wo Yefun Allah dom nut mo nin do, An bi pá mo nin. Sane su re suma ben anato nin brek tet nin jammo yerom e, aboksye e ne satu o ne? Suk bok ne bi suktinggi yo kom mo pe yo nde. Nin iwa nin gum pakwerut wa suk ne satu o ré bado?

¹⁰Nin bi sukjimnut sye teker mo kam sye yo e, kam sye su aina yo e, kam sye su tahun yo e ne. Nin bi sukjimnut sye mo sukdaret ne wa suma ne?

¹¹Sane ji nutbot nin ndo nde, ji da wergat ji nggwa wa duno nin ware, sukdu gato ji duno nin su ne yo ós nin kom mo pe yo nde bado?

¹²Ji bi nji, ji bi nyanggon, nin jammo suk gato ji ki re et, ji ba kem su nin mone sa, ji yo benbot ye Yahudi bi sukduno-i nde, tepsu sagana nin yo benbot ye Yahudi bi sukduno-i nde. Sane su re yo, ji kiwa nin waii misyar ye Yahudi bi sukduno-i sato ji re et. Ji ma ki sukdu nai nin sa, nin yo ben sukibit nai ji nde.

¹³Nin jam do, ji ku suki anato ji si nin kem mone, ete ji ki sukdu subot os ndo gato Yesus Kristus ka ne nai nin su ketke.

¹⁴Kapre ji bi suki gato ji ku ne ben sukye wa nin, nin dakai ós ji, nin mewa ji, nin nutbot ji do, ji tepsu Yefun Allah bi malaikat dik yo. Nin mewa ji tepsu nin mewa Yesus Kristus dakai.

¹⁵Ji si nin mone sa, nin mit iwa ji wai o ré, ji jam ré. Sane sugane, suk mwa gato ji ndek mo nin sa, nin dakai syo nai ji sor. Nin ku os yo, bergan nin tik nin gro buk ete nin syo nai ji ré. Wo su re nin yo mit iwa ji o nde wa suma ne?

¹⁶Ji ki sukdu gato sangge nai nin anato su re nin bariket ji o ré bado?

¹⁷Yé bok yo ba ku nin mone, án iwa kidar nin sor ré. Yé bok ne wergat nin subere nin jambot ye Yahudi bi sukduno-i. Án kidar nin do, nin jambot sukduno ne bere nin sok mo Yefun Allah bi rus-i. Yé bok ne daram mo suk bok yo, án werwa tik nin mit su sukyo-sukyo, wo suk gato án ben ne ibit o ré. Án iwa ben nin bi sukjimnut wade nin bariket men, wo nin mit iwa án sor ré.

¹⁸Men yetu daram wa suk gato ndo anato ndo, wo men daram wa suk gato ibit, bere siri ré. Sane, kapre ji mó bado, ji yo mó nde bado, nin daram wa nin benbot sukdu gato ndo ne pe sor.

¹⁹Ji bi pá, nin gato ji jimnotku, ji nutbot nin sor, ji yo ndo nde tepsu nggon far gato nukwe i su pa. Ji bi sukjimnut waiyu subot nin, ji yo ndo nde sane sor wade ji jam do, nin bi sukjimnut-i gato kem pe mo nin mit tepsu Yesus Kristus bi sukjimnut-i ne it.

²⁰Su re ji da o wa ji ba ku nin o, ji iwa ji ki sukdu gato njep su nin o, we ji jimnutbot nin ndo nde, ji kwabom dek subot nin ndo nde.

²¹Nin yé gato iwa jom ye Yahudi bi sukduno-i, nin jam sukduno ne bi sukjimnut bado? Nin jammo suk gato ji ki re et, ji ki rer subot ye Yahudi bi sukduno-i gato Musa krom ne.

²²Mo Yefun Allah bi sukdu, ye krom do, Abraham ku pa we. Pa ge we ne dik yo, Abraham bi nggon kwerut kem su. Pa ge we dik yo o, an dakai bi nggon gato gum kwerut nde kem su.

²³Abraham bi pa gato nggon kwerut kem su ne, nggon ne kem su sagana ne, wo pa gato Abraham dakai bi nggon kem su ne, Yefun Allah tom su Abraham anato an bi nggon ne kem su pa ne.

²⁴Sukamno dik yo anare. Nggon ge we gato Hagar si Sara ne tepsu suktom we gato Yefun Allah tom su men ne. Nggon kwerut ne tepsu suktom dik yo gato Yefun Allah tom su Musa mo banbo Sinai. Nggon ne gum do Hagar. Hagar bi pa-i ne tepsu pakwerut.

²⁵Mo sukamno re, Hagar ne tepsu suktom gato Yefun tom su Musa mo bando Sinai mo bur Arab ne. Hagar ne tepsu kota Yerusalem, we su re yé mwa mone tepsu Hagar si bi pá-i, án sino pakwerut wa ye Yahudi bi sukduno-i.

²⁶Wo Abraham dakai bi nggon Sara anato tepsu Yerusalem mo gu. Mone men gum pakwerut wa suk yo mo nde. Mom ne anato tepsu men bi im. {Sara tepsu men bi im sane anato men yo tepsu pakwerut wa ye Yahudi bi sukduno-i nde, wo men dakai simo os be gato Yesus Kristus gwat ma ne.} Men si Sara tepsu pakwerut nde,

²⁷we ye ki sukamno mo Yefun bi sukdu subot Sara sare do, “Nan, nggon gato nukwerit pe, su re yo, nan mit at wa sor. Nan, nggon gato nukwe i su pa mo nde, nan wi nan ambre sor! We nggon dosye gato bi ya mu kadit ne, bere nan ku pa mwa wai kadit nggon gato bi ya si kem pe ne.”

²⁸Sane ji bi nji ji bi nyanggon, nin ku os wa nin tepsu Yefun Allah bi pá mo suk gato Yefun Allah tom su men yetu. Nin tepu Isak gato Abraham bi pa mo suk gato Yefun Allah tom su Abraham.

²⁹Sugane Abraham bi pa gato Hagar kem su ne ben sukye nai pa gato Yefun Allah tom su Abraham. Pa gato bi im kem su sagana nggon kem su pa ne ben sukye nai pa gato ma kadit Yefun Allah Gen bi suktinggi. Sane dom, su re ye gato jom ye Yahudi bi sukduno-i ben sukye nai ye gato Yefun Allah Gen kem su ne.

³⁰Wo ye krom suma subot Hagar si bi pá-i mo Yefun Allah bi sukdu ne? Ye krom sukdu gato Sara ki sare do, “Abraham, nan syun nggon kwerut si bi pa ne wé kadit men et. Pa ne si men bi pa-i yo wat sukrok su yu nde, wo men bi pa-i sor anato ku sukrok ne.”

³¹Sane ji bi nji, ji bi nyanggon, men re tepsu nggon kwerut bi pa-i nde, wo men tepsu nggon gato dakai ti mo dakai ne bi pa-i. {Men tepsu pakwerut wa ye Yahudi bi sukduno-i nde, wo men dakai sok mo Yefun bi rus-i mo os gato Yesus Kristus kak wa men, tepsu suk gato Yefun Allah tom ne.} … nin ku os wa nin tepsu Yefun Allah bi pá mo suk gato Yefun Allah tom su men yetu