Read Abun Galatia 6 Bible Online

Galatia 6 - Abun bible

Galatia 6

¹Ji bi nji, ji bi nyanggon, me ku yetu ge dik yo gato ben sukibit it yo, men yé gato ben men bi suk-i tepsu Yefun Allah Gen mit ne mu ku an, ete men duno an subere an satu ma mo os gato ndo o et. Wo men duno an it yo, men duno an sisu njep sor. Men mewa men nggwa dom, sawe suk yo tik men mit, ete men waii ges mo os ibit ne dom.

²Men ós yu, men sam ye yi bi kwede su an et. Sukye gato ye yi ku, men ós an su et. Men ben suk sane anato tepsu Yesus Kristus bi sukduno-i ne.

³Ye gato nut do, an sa, ye gato ben suk mwa ne ndo sino, sarewo an yo ben suk mwa ne ndo nde tó yo, ye ne dakai kidar an dakai anane.

⁴Wo men kadik-kadik dakai watbot men nggwa pare, sare do, “Te, suk gato ji ben re ndo bado nde e?” Suk gato men ben re do ndo it yo, men nut mo men dakai do, “Suk gato ji ben re sa, ndo it, ji imo.” Men me kadit suk gato ye yi ben ne nde, wo men me kadit suk gato men dakai ben ne sor.

⁵Men bambarai nde, wo men kadik-kadik dakai sam men bi kwede-i ne et.

⁶Ye gato duno men su Yesus Kristus bi sukduno-i yo, men jimnotku ye ne, men syo men bi suk gato men ku ne napyo nai ye ne et.

⁷Men jammo ye yi bi sukdu sukkidar nde. Men yetu yo nggiwa kidar Yefun Allah nde. Tepsu men jan suk mo nggwe, bere kam sari ne ma men nai sugit tepsu suk gato men jan ne, sane dom men ku suk tepsu suk gato men ben ne.

⁸Tepsu ye gato jan sukjan ku bi sugit mo koirut, ye to ben bi suk-i tepsu sukjimnut gato tik an mit wa ben sukibit ket an i, bere sukibit ne waii tok an, ete an dakai ibit mo koirut. Wo ye to ben suk tepsu Yefun Allah Gen mit, bere sukndo ne waii tok an, ete Yefun Allah Gen ós an kem ndo to kapyo mato kapyo.

⁹Sane men bambrai wa men ben sukndo petok nde, men syim syu wa nde. Men misyar dom nde, men werwa sane sor, bere tepsu bi kam-i, men ku suk gato ndo kadit Yefun mone tó.

¹⁰Sane os yo kak wa men it yo, men ben sukndo su yé mwa ne sino. Yé gato si men onyar kem mo Yefun Yesus ne yo, men werwa men ben sukndo su án wai kadit ye yi neya et.

¹¹Nin me re, huruf gato ji krom sye ré. Sukdu gato wari re, ji dakai anato krom.

¹²Yé gato wergat nin subere nin simo sunat anato yé gato iwa dakai bes án gum kok, subere ye yi me suk gato án ben ne ete ki do, “Yé ne sa, ben bi suk-i ne ndo.” Án iwa wergat nin simo sunat, we án bariwa án ki subot Yesus Kristus gato kwop mo kwesukwin. Án nut do, án ki subot Yesus Kristus yo, bere án ku sukye mone, sane án ki sukdu subot sunat ne kadit.

¹³Ye Yahudi ge bok yo gato simo sukduno subot sunat ne, án da benbot sunat bu sukdu-i, sarewo án yo benbot ye Yahudi bi sukduno-i nap neya sino dom nde. Sane dom, án iwa ye bisunat nin subere án ki án bi sukdu-i kok wai kadit ye yi. Án iwa nin simo án bi sukdu-i sor.

¹⁴Wo ji dakai yo bes sukdu daret sane kok mo nde, wo ji bes sukdu subot men bi Yekwesu Yesus Kristus gato kwop mo kwesukwin ne kok sor. Ji bes sukdu subot Yesus Kristus mo kwesukwin ne kok wai, sane anato ben sato ji kwop kadit sukdu daret gato ye ki subot sunat e ne. Sukdu daret gato yé ki mo bur re, ji misyar or ré.

¹⁵Men simo sunat e, men yo simo sunat nde e, kwa ne yo ndo teker wa men nde, we sunat yo ós men nde. Wo kwa gato ndo wai anato men tepsu yetu gato be, gato Yefun Allah nai sok mo An bi rus-i.

¹⁶Yefun Allah ete mewa ye gato jammo sukdu gato ji krom re. Yefun Allah ete dakai jimnotku yé mwa gato jammo sukdu re. Yefun Allah ete mewa An bi rus-i ne sino.

¹⁷Ji bi sukdu kwa yo wari sare do, ji ben Yesus Kristus bi suk-i, ji ku sukye anato ji wip no mwa mo ji kaim re, sane ji bariwa yé ben sukye nai ji o.

¹⁸Sane ji bi nji ji bi nyanggon, men bi Yekwesu Yesus Kristus ete mewa nin sino petok sor. Sangge. Ndo mo nin sor, kadit Paulus