Read Abun Efesus 3 Bible Online

Efesus 3 - Abun bible

Efesus 3

¹Sane ji, gato gum do Paulus re, ji werwa duno nin yewis yi subere nin onyar kem mo Yesus Kristus anato ye sok ji mo sel ne.

²Nin jam do, Yefun Allah bi suktinggi bor mo ji anato An bes ji wa ji mu duno nin subere nin jam subot os ndo gato Yesus Kristus kak wa men ne.

³Suktaru gato Yefun Allah fro wa ji ki ne, An yo kadum rer wa yetu jam nde tó, An ki rer nai ji jam nyum wé ré. (Ji krom subot suktaru ne napyo nai nin jam mó ré.

⁴Nin dakai baca sukdu ne sa, bere nin jam rer do, sukdu mwa subot Kristus gato Yefun Allah gurik suga nyim tuya, su re ji jam kom mo mit ré.)

⁵Su kam nyim tuya, Yefun Allah gurik sukdu ne ré, wo su re sa, Yefun Allah Gen ki sukdu ne rer nai An bi yerasul si yenabi gato An dakai bes wa ben An bi suk-i ne jam.

⁶Sukdu gato Yefun Allah Gen ki ne bor it anare. Suga nyim tuya Yefun Allah fro os gato ndo wa yewis ye Yahudi so ré, wo su re An syogat Yesus Kristus kak os ndo ne wa nin yewis yi gato jammo sukdu ne dom. Sane anato nin si ye Yahudi ne sino ku suk gato ndo kadit Yefun Allah. Nin yewis yi si ye Yahudi ne tepsu yedik mo Yefun Allah bi rus-i, ete suk gato Yefun Allah tom su ye Yahudi re, An benbot su nin yewis yi ne dom. Suk mwa gato Yefun Allah fro wa ye Yahudi ne, Yesus Kristus anato kak os wa yewis yi ne waii ku ne dom.

⁷Yefun Allah bi suktinggi dakai bor mo ji anato An bes ji tepsu An bi pakwerut wa ji mu ki subot os ndo gato Yesus Kristus kak wa men yetu ne. Yefun Allah ben ji dakai nggiwa ji mu ki sukdu subot os ndo ne.

⁸Kadit yé mwa gato sok mo Yefun Allah bi rus-i ne sino, ji re anato gum wok teker mu bur, sarewo Yefun Allah dakai bes ji wa ji mu ki sukdu subot os ndo ne. Ji mu frot sukdu subot Kristus gato ndo wai o ré nai yewis yi jam.

⁹Ji mu ji ki subot os ndo ne sor nde, wo Yefun Allah bes ji wa ji ki subot suk gato Yefun ben subere An bi os-i ne kas sisu ndo mo bur re, ji kibot rer wa yé mwa jam. Suga nyim tuya, Yefun Allah, gato ut suk mwa mo bur re, An gurik sukdu ne kadit men, wo su re, os gato An fro wa men ne An kadum bor it, orete ji mu ki subot sukdu ne rer wa yé jam o ré.

¹⁰Sane su re Yefun Allah iwa An bi rus-i mo bur re simo os gato An fro ne subere kadum An bi sukjimnut gato kru wai ne nai malaikat bi yesu-i si ye gato bi suktinggi mo gu ne jam.

¹¹Su re Yefun Allah kadum os gato An fro ne tepsu An bi sukjimnut kadit ketke ne it. Sane anato An bi men bi Yekwesu Yesus Kristus ma wa kak os gato ndo ne wa men it.

¹²Yesus Kristus kak os wa men anato men yé gato onyar kem mo An, men yo damen wa ki suk su Yefun Allah o nde, wo men jam rer do, suk gato men ki nai An, bere An iwa An jam.

¹³Sane ji ki sare do, nin nut subot ji teker mo sukye gato ji ku wa nin nde. Ji da ku sukye mwa, sarewo nin sa, ku os gato ndo wai o ré.

¹⁴Sane anato ji tu ji umsu mo ji bi Ai Yefun Allah gwem ete ji ki sukdu su An.

¹⁵An anato ut rus mwa ne mo gu nim ne si bur re sino. Rus mwa ne ku sukjimnut gato ndo kadit An.

¹⁶Ji ndek mo Yefun Allah gato gum kok wai subere An syo An Gen ma ben nin bi sukjimnut mo nin mit nggi o et,

¹⁷subere Yesus Kristus kem pe mo nin mit si nin onyar, we nin onyar kem mo Kristus ré. Sane dom, ji ki suk su Yefun Allah wa nin mo suk mwa gato nin ben ne, subere nin bi sukjimnut sye kas subot nje petok sor, ben sato sukjimnut ne jom nin, ete nin bi nin nggwa wa nje tepsu Kristus bi An nggwa ne.

¹⁸Sane o, ji ki suk su Yefun Allah subere nin si men yé gato onyar kem mo Yefun Yesus ne sino, jam Yesus Kristus bi sukjimnut sye gato kas subot men ne kom mo mit kai, nin jam sukjimnut mwa ne sino, kwa yo gwet mo nde.

¹⁹Men yetu sor ré, bere men yo jam sukjimnut ne kom mo mit nde. Sane ji ki suk su Yefun Allah wa nin subere nin jam Yesus Kristus bi sukjimnut sye gato kas subot nin kom mo mit kai, subere An bi sukjimnut ne kem pe mo nin, subere nin tepsu Yefun Allah o ré, kwa wokgan yo siri kadit dom nde.

²⁰Yefun Allah bi suktinggi bere nggiwa ben suk mo men mit, sane bere An ben suk mwa mo men mit wai kadit suk gato men ndekwa An ben ne o ré. Bere An ben suk mwa wai kadit men jimnutbot ne ré, men bi sukjimnut yo kom mo pe ne nde.

²¹Sane men yé gato onyar kem mo Yesus Kristus mo bur re, men bes Yefun Allah gum kok, men bes An gum kok mo suk gato Yesus Kristus ben ne sor. Men si men bi datu si datok bes An gum kok su re to kapyo mato kapyo et. Sangge.