Read Abun Efesus 5 Bible Online

Efesus 5 - Abun bible

Efesus 5

¹Men anato Yefun Allah bi pa-i gato An jimnotku ne. Sane men werwa men ben suk tepsu An ben ne et.

²Men kem mo bur re, men bi sukjimnut sye kas subot ye yi sor, tepsu Kristus bi sukjimnut sye kas subot men, ete An bi An nggwa wa men. An bi An nggwa tepsu suksom gato An som Yefun Allah su, ete mone An tot men bi suktot. Yefun Allah iwa suk gato Kristus ben ne, tepsu ye iwa ni suk gato grik. Sane men waii bi men nggwa wa men ós ye yi su ne sor.

³Men sok mo Yefun Allah bi rus-i it, sane men mewa men nggwa kadit men ben siri su yu nde. Sane dom, men mewa men nggwa subere men da bro wa ben sukdaret su yu nde. Men gro sye wa men nai suk mwa wa men dakai nde. Men ben sukdaret yo, bere siri kadit Yefun Allah bi os-i. Sane men ben sukibit sane wokgan yo dom nde, subere ye yi ku os wa ki men gum ibit mone nde.

⁴Sane dom, men njak ye yi nde, men ki sukdaret nde, men ki sukdu gato ibit nde. Men tepsu Yefun Allah bi rus-i, sane men do ki suk sane, bere siri ré, wo ndo sa, men ki ndo mo Yefun Allah mo suk mwa gato An ben ne sor.

⁵Men jam rer do, yebris si nggon gato ben siri su yu daret e, ye gato da bro wa nggon e, nggon gato da bro wa yebris e, ye gato gro sye wa nai suk mwa wa an dakai (ye gato ben suk gare yo, ye ne bes sukdaret sye wai kadit Yefun Allah o ré). Ye gato ben bi suk-i sane, bere an yo sok mo rus gato Yefun Allah si Yesus Kristus jom ne nde.

⁶Ye yi do ma werwa kidar nin subere nin misyar sukdu gato ji ki re subot Yefun bi sukdu-i ne yo, nin jambot nde, we ye gato ben bi suk-i siri kadit Yefun Allah bi sukdu-i ne, bere an ku sukmaskwa kadit Yefun Allah.

⁷Sane nin si ye gato ben bi suk-i daret ben suk sino dom nde.

⁸Kam nyim tuya nin dakai kem mo ndendu, wo su re nin sok mo Yefun Allah bi rus-i, sane anato nin kem mo pe gato nden rer it. Sane nin ben nin bi suk-i tepsu yé gato kem mo pe gato nden rer ne sor.

⁹Nin kem mo pe gato nden rer it yo, bere nin ben nin bi suk-i ne ndo bor wa nje me, tepsu kwe syesyar i-bo, bere nin ben suk sato re: nin ben sukndo su nje e, nin ben nin bi suk-i ndo tepsu Yefun Allah mit, nin ben nin bi suk-i ri-roi sor.

¹⁰Nin werwa nin jam suk gato Yefun Allah iwa nin ben ne et.

¹¹Suk gato tepsu ndendu bi suk-i gato yo ós nin nde, nin karowa dom nde, wo nin ki ndendu bi suk-i ne rek subere bor wa yé mwa jam do, suk ne ibit ré. (

¹²Nin do ki sukibit gato ye ben gurik ne rek mó yo, bergan nin damen teker wa nin ki kom mone.)

¹³Sarewo sukndo gato nin ben ne tepsu sukru gato rer ete bere kadum sukibit ne bor wa yé mwa jam, ye yo ku os wa gurik sukibit ne o nde,

¹⁴we sukru rer ku suk mwa ne sino yo, bere ben sukibit ne rer wa men jam kom mo mit ré. Sane ye ki do, “Nin yé gato sem ne, nin sun tom! Tepsu nin sun satu kadit sukkwop, bere Kristus tepsu sukru rer ku nin.”

¹⁵Sane nin mewa nin nggwa subere nin ben sukndo mo bur re sor. Nin ben suk tepsu ye gato jimgon nde, wo nin ben suk tepsu ye gato jam suk mwa ko et.

¹⁶Su re, yé ben sukibit mwa, wo nin ku os wa nin ben suk gato ndo yo, nin werwa nin ben sor.

¹⁷Sane, nin jimgon nde, nin jammo yetu bi sukdu-i nde, wo nin werwa nin jammo suk gato men bi Yekwesu Yesus Kristus iwa nin ben ne et.

¹⁸Nin da nau, nin yenau nde, we bere nau ben nin ibit. Nin bi nin nggwa wa nau jom nin nde, wo nin bi nin nggwa wa Yefun Allah Gen bok nggwa mo nin ete jom nin anato ndo.

¹⁹Nin ki suk su yu yo, nin nai sukdu kadit Mazmur e, nin nai sukdu kadit sukos gato yé un Yefun su e, nin nai sukdu kadit sukos subot Yefun e ne sino, ete nin ki sukdu sane nai yu et. Nin kos nin un men bi Yekwesu su nin mit dik si nin onyar dik et.

²⁰Men bi Yekwesu mo Yesus Kristus, sane anato nin ki ndo mo nin bi Ai Yefun Allah mo suk mwa gato An ben mo bur re petok sor.

²¹Nin jammo Kristus, sane yo nin waii jammo yu dom et.

²²Nggon kra, nin jammo nin bi ya tepsu nin jammo men bi Yekwesu Yesus Kristus et,

²³we yebris anato yekwesu wa bi nggon saga Kristus anato Yekwesu wa mewa men sino gato onyar kem mo An. An dakai anato Yekwesu gato kak os wa men kem ndo to kapyo mato kapyo.

²⁴Sane, tepsu men sino gato onyar kem mo Kristus jammo Kristus, sane dom nggon jammo bi ya mo suk mwa ne sino sor.

²⁵Nin. yebris gato kra, nin bi sukjimnut sye kas subot nin bi nggon sor, tepsu Kristus bi sukjimnut sye kas subot men sino gato onyar kem mo An ne. Nin, yekra, nin bi nin nggwa wa nin bi nggon tepsu Kristus bi An nggwa wa men sino gato onyar kem mo An ne.

²⁶Kristus bi An nggwa wa nai sukibit wé kadit men. An bi sukduno tepsu syur gato An de mo men wa rus sukibit wé kadit men ré. Sane An fro men wa men sok mo Yefun Allah bi rus-i.

²⁷Sane anato Kristus fro men sino gato onyar kem mo An ne kwo ndo mo An dakai gwem. An fro men subere men da ibit nde, men dini bor mo nde, men brot bor mo nde, men wip no mo nde, kwa gato ibit mo nde, wo pe mwa ne ndo sino. Yesus Kristus bi sukjimnut sye kas subot men digane.

²⁸Sane dom, yekra bi sukjimnut sye kas subot an bi nggon tepsu an bi sukjimut sye kas subot an dakai kaim-i ne et. Ye gato bi sukjimnut sye kas subot an bi nggon it yo, tepsu an bi sukjimnut sye kas subot an dakai it anane. (

²⁹Ye gato bariwa an mewa an kaim-i ne, ye gato ben bi suk-i sane yo mo nde, wo yé mwa ne sino mewa an kaim ré. Yé mwa ne sino meret sugit an git, yé mwa ne sino mewa an kaim tepsu Kristus mewa ye gato onyar kem mo An.

³⁰Men jam it, Kristus mewa men yé gato onyar kem mo An, we men anato tepsu An gwes e, An syim e, An tunap e ne mo An kaim-i ne.)

³¹Ye krom mo Yefun Allah bi sukdu do, “Sane yebris bere mu kadit an bi ai si an bi im, ete an si an bi nggon kem tepsu yetu ge dik sor, we ye we gato kra ne, an we tepsu dik it.”

³²Yefun bi sukdu kwa gane bi sukjimnut-i ne kru yé. Sukdu ne bi sukjimnut subot Kristus si men sino gato onyar kem mo An.

³³Suk ne sor nde, wo sukdu ne bi sukjimnut wa nin yekra si nin bi nggon dom. Sane nin yekra ne sino bi sukjimnut sye kas subot nin bi nggon tepsu nin bi sukjimnut sye kas subot nin dakai et. Sane dom, nggon ne sino werwa jammo bi ya sor.