Read Abun Filipi 2 Bible Online

Filipi 2 - Abun bible

Filipi 2

¹Nin sok mo Kristus bi rus-i, sane nin kwabom kam mo An do, bere An mewa nin, sane nin nokwa suk teker nde. Yefun Allah Gen bok nggwa mo nin, sane nin tepsu dik su An, An ós nin subere nin jimnotku yu, nin ben sukndo su yu.

²Sane ji ndek mo nin do, nin ben ji mit at wai o ré, nin ben nin bi suk-i sare et, nin sino jimnotku yu, nin bi sukjimnut tepsu yu, nin mewa yu et. Nin sino ben nin bi suk-i tepsu dik, nin sino bi sukjimnut dik tepsu yu sor. Sane bere ji mit at wai o ré. Nin sino ben nin bi suk-i tepsu dik et.

³Nin dakai mit at daret, ete ben suk yo wa ye bes nin gum kok nde. Nin bes nin nggwa kok nde, sarewo nin nutbot ye yi do, ye ne gum-i kok wai kadit nin dakai gum-i.

⁴Men nubot men dakai bi suk-i sor nde, wo men jimnutbot ye yi mo suk sino gato án ben ne dom et.

⁵Sane yo, nin bi sukjimnut-i tepsu Yesus Kristus bi sukjimnut-i et:

⁶Yesus Kristus re, An da gum kok tepsu Yefun Allah dakai, sarewo An yo werwa An bes An gum kok tepsu Yefun Allah nde.

⁷An bes An gum kok nde, wo An is An nggwa ga mo bur tepsu pa wokgan ne o ré. An ma mo bur re, An tepsu pakwerut. An ma mo bur re, An ka sa yetu sor ré. An kem mo bur re tepsu men yetu.

⁸An yo bes An nggwa kok nde. Sarewo An is An nggwa ga tepsu pa wokgan, An jammo An bi Ai sor. An benbot suk gato An bi Ai ki nai An ne, An bi An nggwa wa An kwop. Yé gu An kwop mo kwesukwin, (tepsu yé gato gum ibit, sarewo An jammo An bi Ai soro).

⁹Sane anato Yefun Allah bes Yesus Kristus it mo pe gato kok wai kadit suk mwa mo bur re sino o ré. Yefun Allah bes Yesus Kristus gum kok sye wai kadit yé mwa ne sino o ré.

¹⁰Sane bere yetu e, malaikat e, yerom e ne sino mo bur re si gu nim ne, mo bur desnak, mo pe mwa ne sino tu án umsu mo Yefun Yesus gum, mo sino ki do, sangge Yefun Yesus gum kok sye wai o ré.

¹¹Sane bere men yetu mwa ne sino ki rer do, sangge, Yesus Kristus anato tepsu men bi Yekwesu gato jom men. sane bere men bes men bi Ai, Yefun Allah, gum kok mone ré.

¹²Sane yo, nin, ji bi yesyim gato ji jimnotku, nin benbot ji bi sukduno gato ji ki re et. Yefun Allah anato nai nin sok mo An bi rus-i wé kadit bot gesyos it, sane nin ben nin bi suk-i tepsu yé gato jammo An et. Suga ji kem su nin tó yo, nin benbot ji bi sukdu petok sor. Sarewo su re ji yo kem su nin nde, sane nin jammo ji bi sukduno pe, tepsu ji kem si nin tó. Mo suk mwa gato nin ben ne, nin jammo Yefun Allah sor, nin bi nin nggwa mo An, nin ben suk tepsu An mit,

¹³we Yefun Allah dakai kak nin bi sukjimnut, subere nin iwa jammo An, subere nin mit iwa ben suk gato tepsu Yefun Allah mit ne.

¹⁴Mo suk sino gato nin ben yo, nin nuk ye yi gum daret nde, nin ki et bot yu nde, nin duwer yu nde

¹⁵Sane bere nin tepsu Yefun Allah bi pa-i, bere nin ben nin bi suk-i ndo petok sor, kwa gato ibit yo mo nde. Sane bere ye yo ku os wa ki nin gum ibit mo suk gato nin ben ne mo nde. Nin do ben suk tepsu Yefun mit sane it yo, nin tepsu sukru gato rer ku nje mo bur re. Yé mo bur re mise, án ben sukibit bu.

¹⁶Nin jom Yefun bi sukdu gato kak os wa men kem ndo to kapyo mato kapyo yo, nin tepsu sukru gato ji ki ne. Sane bere su kam gato Kristus satu ma mo bur re it yo, ji mit at mo suk gato nin ben ne, we ji jam do, suk gato ji werwa ji duno nin su ne, ji yo ben yi nde, wo nin waii benbot suk gato ji duno nin su ne ré.

¹⁷Nin onyar kem mo Yefun Allah it. Nin bi nin nggwa mo An, nin samok wa nin ben An bi suk-i. Suk mwa gato nin ben ne anato tepsu suksom gato nin gwat wa som Yefun Allah su ne. Sane ji mit at mo suk mwa gato nin ben ne. Yé bok ji mo sel re mo gato ji ki subot Kristus. Sarewo yé do gu ji kwop it yo, ji mit at tó, we ji do kwop it yo, be sato ji waii grem suk yo tó suk mwa gato nin gwat wa som Yefun Allah su ne.

¹⁸Sane nin si ji sino mit at wa dom et. Nin si ji, men wi men ambre mone sino et.

¹⁹Sane yo, ji kwabom kam mo men bi Yekwesu Yesus Kristus do, bere An kak os wa ji subere ji syokom Timotius ba ku nin, subere Timotius gwat sukdu kadit nin satu ma wa ji more. Ji do jam sukdu subot nin ne yo, ji yo kwabom dek subot nin teker o nde.

²⁰Kadit yé mwa gato si ji kem more, Timotius sor bi sukjimnut-i tepsu ji bi sukjimnut-i. An sor ete bi sukjimnut-i wa an mewa nin sisu sangge.

²¹Sarewo yé mwa gato kem more meret suk wa án dakai sor ré, án yo nutbot Yesus Kristus bi suk-i nde.

²²Nin dakai jam do, Timotius re, an ye gato ben sukndo, we ji si Timotius mu ki sukdu subot os nde gato Yesus Kristus kak ne nai yé mwa jam ré. An ben an bi suk-i su ji tepsu pa ben bi suk-i su pa bi ai ne ré.

²³Ji iwa ji syokom Timotius ba ku nin mone, wo ji eswa ji jam sukdu kadit yepasye gato bok ji mo sel ne do, án sombok ji bado, án yo sombok ji nde bado. Ji jam án bi sukdu ri orete yo, ji syokom Timotius ba ku nin mone.

²⁴Ji kwabom kam mo Yefun do, bere An kak os wa yepasye sombok ji kadit sel re. Yé do sombok ji it yo, bere ji ba ku nin mone dom.

²⁵Sarewo ji nut do, ndo sa, ji syokom Epafroditus satu ba ku nin. Epafroditus re, an tepsu ji bi yesyim, ji si an ben suk wa Yefun Yesus sino. Men ka we tepsu Yesus Kristus bi yesukmise gato ben An bi suk-i. Nin dakai syokom Epafroditus ma ku ji more wa ós ji mo suk gato ji yéwa,

²⁶wo su re an da o wa an ba ku nin it. An jimnotbot sukdu gato nin jam subot an do, an ku suki more ré. An jimnotbot teker, sawe nin nut do an i tó.

²⁷Sangge, an ku suki mó ré, karowa an kwop rok. Sarewo Yefun Allah dakai jimnotku an ete ben an ge ré. Yefun Allah jimnotku an sor nde, Yefun Allah jimnotku ji dom. Yefun Allah ben Epafroditus ge kadit suki gato an ku ne, ondesorsa ji nderku ji nggwa mo sukye ne ndo nde.

²⁸Sane yo ji syogat an satu mu mo nin kekro, subere nin ku an yo, nin iwa o, subere ji dom yo jimnotbot an teker o nde.

²⁹Epafroditus do ba ku nin mone it yo, nin kak nin mit wa an sor, nin mewa an, we nin si an sino onyar kem mo Yefun Yesus. Yé gato onyar kem mo Yefun tepsu Epafroditus re, án do ba ku nin it yo, nin bes yé ne gum kok, nin ben sukndo su án sor.

³⁰We Epafroditus re, an iwa ben Yesus Kristus bi suk-i sor, An yo nutbot an dakai nde, anato an ma ós ji more, ete an ku suki ne, bergan an kwop rok mone. An ma win nin yé mwa gato kem mone, we nin yo ku os wa nin ma ós ji more nde.