Read Abun Kolose 1 Bible Online

Kolose 1 - Abun bible

Kolose 1

¹Ji gato gum do Paulus, gato Yefun Allah bes gum yerasul wa ben Yesus Kristus bi suk-i, ji si men bi nji, Timotius anato bi sukdu mo surat re wa nin. Ji bi nji, ji bi nyanggon, men ka we krom sukdu re wa nin yé gato onyar kem mo Yesus Kristus mo kota Kolose. Men ka we krom surat re wa nin yé gato ben Kristus bi suk-i sisu ri-roi gato kem mone. Men bi Ai, Yefun Allah, ete mewa nin. Yefun Allah ete uttok nin petok sor.

³Men jam sukdu subot nin do, nin sa, onyar kem mo Yesus Kristus, ete nin bi sukjimnut sye kas subot ye gato onyar kem mo Yefun Yesus ne sino. Sane men ki suk su men bi Yekwesu Yesus Kristus bi Ai, Yefun Allah ne sa, men ki ndo mo An wa nin petok sor.

⁵Nin jam sukdu subot os ndo gato Yesus Kristus kak ne, sukdu ne sangge. Yefun Allah fro suk gato ndo wa bere nin ku mo gu. Nin bi sukjimnut kem pe mo sukdu ne, sane anato nin onyar kem pe mo Kristus ete nin bi sukjimnut sye kas subot Yefun Allah bi rus-i ne it.

⁶Sukdu subot os ndo gato Yesus Kristus kak ne, ye ki frekbot yé mwa jam mo bur re iwedewe ré, anato yé mwa ne napyo simo os ndo ete ku sukndo mo sukdu ne ré. Sane dom, nin waii jammo sukdu ne. Kadit kam ketke gato sukdu ne frekbot nin sa, nin simo os ndo ete ku sukndo mone ré. Nin jam rer do, kapre nin yo ben suk yo nyim wa Yefun Allah nde, An dakai bi sukjimnut sye kas subot nin sor. Sukdu ne nin jam kom mo mit ré.

⁷Sukdu ne Epafras ki nai nin jam mó ré. Epafras re gato men ka we jimnotku, an si men ka we ben suk wa Kristus. Epafras ben bi suk-i ne ri-roi tepsu Kristus mit wa ós men sino.

⁸Epafras anato ma ki nai men more do, Yefun Allah Gen ben nin mo kota Kolose ne nggiwa nin bi sukjimnut sye kas subot yu ré.

⁹Men jam sukdu mwa re subot nin ré, sane anato men ki suk su Yefun Allah wa nin petok sor. Men ndek mo Yefun Allah subere Yefun Allah Gen kak nin bi sukjimnut wa nin jam suk mwa ne sino gato Yefun Allah iwa nin ben ne rer kom mo mit.

¹⁰Men ki suk su Yefun Allah wa nin sane subere nin kem mo bur re, nin ben nin bi suk-i tepsu Yefun Allah mit, nin bek suk gato An iwa nin ben ne petok sor. Nin do ben sane yo, bere suk gato bor kadit suk mwa gato nin ben ne ndo sino, bere nin jam Yefun Allah sisu ndo wai o kadit nyim neya o ré.

¹¹Men ki suk su Yefun subere Yefun Allah ben nin nggi su An bi suktinggi gato ndo wai ne, subere kapre nin ku sukye yo, nin misyar Yefun nde, wo nin ben Yefun bi suk-i ne njep sisu ndo petok sor. Nin mit at wa Yefun,

¹²nin ki ndo mo men bi Ai, Yefun Allah gato nai men gum wa men sok mo An bi rus-i it. Sane bere men ku suk gato An fro wa men yé gato onyar kem mo Yefun Yesus mo pe gato An jowa men mone. Bere men si An sino kem mo pe gato rer.

¹³Yefun Allah nai men wé kadit biris bi yekwesu gato jom men ne. Yefun nai men wé kadit ndendu bi os-i, ete An nai men gum sok mo An bi Gan bi rus-i ne it. Sane An bi Gan gato An jimnotku ne jom men mone ré.

¹⁴An syo An bi Gan ma wa bi An nggwa wa tot suktot mo sukibit gato men ben ne wé ré, sane anato An yo maskwa men mo sukibit mwa gato men ben ne o nde, An yo nutbot sukibit ne o nde.

¹⁵Men yo me Yefun Allah su men gro nde, sarewo Kristus gato men ku ne, An tepsu Yefun Allah dakai. Kristus re, An gum kok wai kadit suk mwa gato Yefun Allah ut ne sino, sane anato ye kendo An gum do, Yefun Allah bi Pa doketke.

¹⁶Yefun Allah anato tepsu i-ke wa fro suk mwa mo bur re si gu nim ne sino, wo Ye gato ut suk mwa ne anato Yesus Kristus. Sane Anato An gum kok wai o ré. Yesus Kristus ut suk gato men me su men gro. An ut suk gato men yo me su men gro nde. An ut suk mwa gato i-mok mone. An ut malaikat mwa ne sino. An ut suk mwa ne sino gato nggiwa jom yetu mo bur re si gu nim ne. Kristus ut suk mwa gato mo gu nim ne si bur re sino subere Kristus jom suk mwa gane tepsu Yekwesu.

¹⁷Yefun Allah yo fro wa ut suk yo mo nde tó, Yesus Kristus mó ré. Kristus anato ut suk mwa gato mo bu re si gu nim ne mo bi nat-i ré, subere suk mwa ne sino kas sisu ndo sor.

¹⁸Men sino gato onyar kem mo Yesus Kristus mo nu ari mwa ne anato tepsu Kristus kaim ne. Kristus anato su mo kaim ne. Sane Kristus anato tepsu i-ke wa men yé gato onyar kem mo An ré. An anato tepsu Pa doketke gato Yefun Allah sun kadit sukkwop, subere An wadigan sor ete gum kok wai kadit suk mwa neya.

¹⁹Yefun Allah dakai mit iwa suk mwa gato An ki ne su suk mwa gato An ben ne sino, An bi Gan waii ki ete ben sane petok dom.

²⁰An syo An bi Gan ma wa kak os subere suk mwa mo bur re si gu nim ne sino kem ndo su Yefun Allah satu. An syo An bi Gan ma kwop mo kwesukwin ete An dé sye tepsu suktot anato kak os wa suk mwa ne sino si Yefun Allah kem ndo satu.

²¹Suga nyim nin yo onyar kem mo Yesus Kristus nde tó, nin kem ko kadit Yefun Allah. Nin ben nin bi suk-i ne ibit. Nin bi sukjimnut ibit ket Yefun anato nin bariket Yefun si bi suk-i ne ré.

²²Wo su re, Yefun Allah syo An bi Gan ma kwop subere kak os wa nin si An kem ndo satu it. Yefun Allah fro os re subere An bi Gan kar nin ma mo An, ete mone, An nutbot nin do, nin sa, tepsu An bes wa nin ben an bi suk-i sor, ye yo ku os wa ki nin gum ibit mo Yefun gwem nde. Sane dom, Yefun nutbot nin do, sukibit wokgan yo ut mo nin o nde, we An bi Gan kwop wa tot sukibit ne wé ré.

²³Nin onyar kem mo sukdu subot os ndo ne tepsu jam biro kom mo kweguk ne yo, bere Yefun Allah nai nin gum sok mo An bi rus-i. Nin brek kadit os ndo ne nde, wo nin jom sukdu ne krat yo, bere nin si Yefun Allah kem ndo mo An bi nat-i. Sukdu ne anato sukdu gato yé ki nai nin jam ré. Sukdu ne, yé mu ki frekbot bur re iwedewe ré. Ji gato gum do Paulus re anato tepsu pakwerut wa ji mu kibot sukdu ne.

²⁴Su re ji mit at mo sukye gato ji ku wa nin, we sukye gato Kristus ku ne ji waii ku napta re. Kristus ku sukye nap sye wa bi rus-i or ré. Or o ji waii ku sukye ne napta wa yé mwa gato onyar kem mo Kristus, yé mwa ne tepsu Kristus kaim.

²⁵Yefun Allah bes ji tepsu Kristus pakwerut wa ós nin. An syogat ji ki subot An bi sukdu mwa ne nai nje jam or sino, kwa yo gwet mo nde.

²⁶An syogat ji ki subot sukdu gato kam nyim tuya Yefun Allah gurik kadit yetu mwa ne sino, wo su re, An ki An bi sukdu ne rer nai ye gato onyar kem mo Yefun Yesus ne jam it.

²⁷Yefun Allah iwa An bi rus-i gato ma kadit yewis yi neya jam sukdu gato ndo ne, gato nyim tuya An gurik ne. Yefun Allah iwa yetu mwa ne sino jam An bi sukdu gato bi sukjimnut kru ete ndo wai ne. Sukdu gato suga nyim An gurik ne anato sukdu subot Yesus Kristus gato ma ete si nin tepsu yedik sino. Men kwabom kam mo Yesus Kristus gato kak os ndo wa men kem mo Yefun Allah bi nat-i gato ndo wai o ré.

²⁸Sane men ki subot Yesus Kristus nai yé mwa ne sino jam. Men ki suknapa wa nje e, men duno nje e, men ki men bi sukdu-i ne, men nutbot sisu ndo, orete men kibot. Men ki men bi sukdu-i sane subere men kar yetu kadik-kadik ma mo Yefun Allah tepsu ye gato onyar kem pe mo Kristus, subere án sino tepsu yenggras gato bi sukjimnut kak mo Kristus bi suk-i.

²⁹Ji samok, ji wergat ji dakai su suktinggi gato ma kadit Kristus ne. Kristus ben ji nggiwa ji benbot suk bok yo gato ji kibot re kas sisu ndo.