Read Abun Kolose 3 Bible Online

Kolose 3 - Abun bible

Kolose 3

¹Yefun Allah sun Kristus kadit sukkwop, sane dom, ben sato nin si Kristus sun mone sino. Sane nin bi sukjimnut sye mo suk gato ndo mo gu nim ne sor. Mone Kristus kem tak Yefun Allah de syim ge, An si Yefun Allah jom suk mwa ne sino.

²Nin bi sukjimnut kem pe mo Yefun bi suk-i mo gu nim ne sor, nin bi sukjimnut kem mo bur re bi suk-i o nde,

³we ben sato nin kwop kadit bur re bi suk-i it. Ben sato nin si Kristus kem mo gu si Yefun Allah.

⁴Kristus anato kak os wa nin anato nin kem ndo. Sane An satu ma mo bur re yo, bere Yefun Allah bes nin si An gum kok ne sino.

⁵Bere nin si Kristus kem ndo sino, sane anato sukibit gato nin iwa nin ben mo bur re, nin bare wé et. Nin bare sukibit gato jom nin ne wé sato re, yebris si nggon ben siri su yu daret e, nin da bro wa ben sukdaret ket nin í e, nin da bro wa nggon bu e, nin bi sukjimnut nggiwa nin ben sukibit bu e, nin gro sye wa nai suk mwa wa nin dakai sor e ne. (Nin gro sye wa nai suk mwa ne yo, tepsu nin onyar kem mo suk daret wai kadit Yefun Allah ne o ré.)

⁶Ye gato bariwa jammo Yefun Allah bere iwa ben sukibit mwa gane, sane anato bere Yefun Allah on sa ket ye ne.

⁷Sugato nyim nin dakai benbot sukibit mwa ne bu, we sugane sukibit mwa gato nin ben ne ben sato jom nin tó.

⁸Sarewo su re nin ben sukibit bok yo o gato ji krom more o nde. Nin bare sukibit sato re wé kadit nin dakai et: nin grem sukmaskwa nde, nin maskwa ete saiye su nde, nin iwa ben sukibit nai ye yi nde, nin kiket ye yi nde, nin njak ye yi gum nde,

⁹nin kidar yu o nde. Nin ben nin bi suk-i saga nyim ne o nde, we sukibit mwa ne nin bare wé it.

¹⁰Su re, nin tepsu yetu gato be o ré. Sane nin ben nin bi suk-i tepsu yetu gato be et. Yefun Allah gato ut suk mwa ne sino, An kak nin bi sukjimnut subere nin ben nin bi suk-i ne be tepsu An mit ne mwa wai kadit nyim ne o ré. An dakai kak nin bi sukjimnut sye o subere nin jam An kom mo mit ré.

¹¹Nin jam An kom mo mit yo, nin jam do Yefun Allah yo wat ye Yahudi tara kadit yewis yi nde. An yo wat ye gato yo simo sunat si ye gato simo sunat nde tara kadit yu nde. An yo wat yedamok e, yeban e, pakwerut e, ye gato dakai ti mo dakai e ne, yé mwa ne sino, An yo wat tara kadit yu nde, we yé mwa gato bi sukjimnut or mo Kristus yo, yé ne si Kristus ne sino tepsu dik ré.

¹²Nin anato sok mo Yefun Allah bi rus-i, An dakai jimnotku nin ndo nde, An bes nin wa nin ben An bi suk-i. Sane anato nin dakai jimnotku ye yi, nin ben sukndo su ye yi et. Nin bes nin nggwa kok nde, nin ben nin bi suk-i njep su ye yi sor. Kapre nin ku sukye, nin benbot Yefun bi sukdu-i petok sor.

¹³Ye yi ben sukye nai nin yo, nin misyar sor. Ye yi ben sukibit ma nai nin yo, nin maskwa an mo sukibit ne nde, nin nutbot o nde, Kristus yo maskwa nin mo sukibit gato nin ben ne nde, An yo nutbot o nde. sane nin waii nutbot sukibit gato ye yi ben ma nai nin o nde, tepsu men bi Yekwesu Kristus ben An bi suk-i mone.

¹⁴Nin benbot suk mwa ne anato ndo, wo kwa gato ndo wai anato nin bi sukjimnut sye kas subot yu. Nin bi sukjimnut sye kas subot yu mo suk mwa ne yo, bere nin tepsu dik, kwa yo gato nin ben tara kadit yu mo nde.

¹⁵Kristus nai nin sok mo An bi rus-i subere nin kem ndo su yu. Sane mo suk mwa gato nin nai sukjimnut wa nin ben ne, Kristus ben nin bi sukjimnut not mo suk ne yo, nin ben sor, ete nin ki ndo mo An.

¹⁶Kristus bi sukduno-i gato ndo wai o ré, nin nai ma nin grem pe mo nin mit si nin onyar et. Nin grem Kristus bi sukduno-i pe mo nin mit or wé, ete nin duno yu e, nin ki suknapa wa yu e ne. Nin do ki Kristus bi sukduno-i nai yu yo, nin nutbot suk ne pare et. Nin kos sukos mazmur e, nin kos sukos gato nin un Yefun su si sukos gato Yefun Allah Gen ben nin mit it wa nin kos ne. Nin kos nin un Yefun yo, nin mit at wa Yefun Allah dom et.

¹⁷Suk mwa ne sino gato nin ben e, nin kibot e ne yo, nin me mo suk gato men bi Yekwesu Yefun Yesus dakai ben ne, orete nin waii ben nin bi suk-i tepsu An sor. Nin ki ndo mo men bi Ai, Yefun Allah, mo os ndo gato Yefun Yesus kadum nai nin ne et.

¹⁸Nggon kra, nin jammo nin bi ya et, we nggon gato jammo Yesus Kristus bere ben bi suk-i sane et.

¹⁹Yekra, nin bi sukjimnut sye kas subot nin bi nggon et. Nin ben nin bi suk-i ot su nin bi nggon nde.

²⁰Pa wokgan, nin jammo nin bi ai si nin bi im petok sor, we Yefun Allah mit iwa nin ben sane.

²¹Yenggras, nin du ot nai nin bi pa nde, sawe bere pa ne bi sukjimnut ibit mo koirut o ré.

²²Pakwerut, nin jammo nin bi yenggras petok sor. Nin jammo yenggras ne, kapre an si nin mone e, an yo si nin mone nde e, nin ben sukndo wa nin bi yenggras su nin bi sukjimnut dik ri-roi petok sor. Nin bes nin bi Yekwesu, Kristus ne, gum kok, ete nin ben suk wa nin bi yenggras sisu nin mit dik si nin onyar dik mone sor.

²³Suk gato nin bi yenggras ki ne, dogato sye kom mo wok, nin ben sor, ni ben su nin mit dik si nin onyar dik et. Suk mwa gato nin ben ne, nin nut do, nin yo ben suk wa yenggras mo bur re nde, wo nin ben suk ne wa nin bi Yekwesu mo gur sor,

²⁴we nin jamwa pe do, bere nin bi Yekwesu, Kristus, syo suk nai nin mo nin bi kamba mo suk gato nin ben ne. Suk gato Yefun fro wa An syo nai An bi rus-i ne, bere nin ku mone tó. Nin nut do, nin bi yenggras gato nin ben suk wa ne anato Kristus.

²⁵Ye to ben sukibit, bere Yefun Allah ben sukye nai ye ne tep sukibit gato ye ne ben ne, we kapre ye ne gum pasye e, ye ne gum wok e, Yefun yo nutbot yetu gum nde ré, An ben suk su ye gato gum pasye sor kom mo gum wok ne tepsu yu sino.