Read Abun Kolose 4 Bible Online

Kolose 4 - Abun bible

Kolose 4

¹Yenggras gato bi pakwerut ne, nin ben nin bi suk-i ri-roi su pa ne et. Nin ben nin bi suk-i su pa mwa ne sino tepsu yu et, we nin jam do, nin dom tepsu pakwerut wa nin bi yenggras mo gu.

²Nin ki suk su Yefun Allah petok sor. Nin ki suk su Yefun yo, nin mewa nin nggwa, nin ki suk su nin mit dik si nin onyar dik. Nin ki suk su Yefun yo, nin ki ndo mo Yefun Allah dom et.

³Nin do ki suk su Yefun yo, nin ki suk su Yefun Allah wa men more dom, subere Yefun Allah kak os ndo wa men ki sukdu subot Kristus ne frek subot ye yi neya. Sukdu ne, suga nyim neya Yefun Allah gurik ré. Ji ki subot sukdu ne anato ye sok ji mo sel.

⁴Nin ki suk su Yefun wa ji subere ji nggiwa ji ki sukdu ne nai nje subere yé jam rer, tepsu Yefun iwa ne.

⁵Nin ben suk su ye gato yo onyar kem mo Yefun nde tó yo, nin nutbot suk gato nin ben ne sisu ndo et. Nin kamo su án sor nde, wo nin werwa nin ben suk su án subere án waii jammo Yefun et.

⁶Nin ki suk su ye gato jam nde Yefun yo, nin ki nin bi sukdu-i njep, nin ki sukdu gato ben yé ne mit ndo, nin ki sukdu gato tik án mit sor. Nin fro nin nggwa subere án do ndo nin subot suk yo, ni owa nin ki sukdu gato ndo satu nai án.

⁷Tikhikus, men bi nji gato men jimnotku, bere an ba ku nin, ete an ki subot suk mwa gato ji ben ne nai nin jam. An si men sino ben suk wa Kristus, an ben an bi suk-i ne ri-roi tepsu Kristus mit.

⁸Bere ji syogat an ba ku nin subere nin jam subot suk gato bor mo men more, ete nin bi sukjimnut yo waiyu subot men nde, wo nin mit ndo sor.

⁹Onesimus bere si Tikhikus ba ku nin. Onesimus anato nin dakai bi nje-i. An sa, ben an bi suk-i ri-roi tepsu Kristus mit, men jimnotku an. An si Tikhikus bere kibot suk mwa gato men ben more ne nai nin jam.

¹⁰Aristarkhus gato si ji kem mo sel re sino, an ki ndo mo nin. Barnabas bi mben, gato gum do Markus dom, an ki ndo mo nin. Suga nyim nin jam sukdu subot an ré. An do ba ku nin it yo, nin mewa an sisu ndo et.

¹¹Yetu ge dik yo gato gum do Yesus, an gum yo o do Yustus, an ki ndo mo nin. Ye Yahudi ka gri re sor ete si ji ki ben suk sino. An ka gri si ji ki subot Yesus Kristus subere kar nje sok mo Yefun Allah bi rus-i. An ka gri re sa, ós ji su sangge kai.

¹²Epafras ki ndo mo nin. An re, nin dakai bi nje-i. An re tepsu Yesus Kristus bi pakwerut. An ki suk su Yefun su an mit dik si an onyar dik sisu sangge wa nin petok sor. An ndek mo Yefun Allah wa nin subere nin bi sukjimnut kem pe mo Yefun, tepsu yenggras gato bi sukjimnut kak, subere nin bi sukjimnut brek wokgan kadit Yefun Allah dom nde, ete nin benbot suk mwa ne sino gato Yefun iwa ne.

¹³Epafras re, an sa, ben suk, an kamba wa nin si yé gato kem mo Laodikia si Hierapolis, ji dakai me su ji gro ré.

¹⁴Lukas gato gum dokter gato men jimnotku si Demas, an we ki ndo mo nin dom.

¹⁵Nin ku ye gato onyar kem mo Yefun Yesus mo kota Laodikia yo, nin ki do, men ki ndo mo án sino. Nin ku Nimfa si ye gato onyar kem mo Yefun gato sum wa ben ari mo Nimfa bi nu ne yo, nin ki do, men ki ndo mo án.

¹⁶Nin do baca surat re or, eteyo nin meret os yo subere ye gwat ete ye baca surat re wa ye gato onyar kem mo Yefun Yesus mo Laodikia ne waii jam dom et. Sane nin do ku surat dik yo kadit Laodikia yo, nin waii baca wa nin sino jam dom et.

¹⁷Nin ki nai Arkhipus do, “Nan ben suk gato men bi Yekwesu Yefun Yesus syogat nan ben ne kom mo pe gato or mó et.”

¹⁸Ji, gato gum do Paulus re, ki ndo mo nin sor. Ji dakai krom sukdu kwa gato wari re su ji syim. Ji kem mo sel tó, nin mbrinket ji nde. Yefun Allah ete mewa nin sino sor. Ndo mo nin sor, kadit Paulus