Read Abun 1 Tesalonika 1 Bible Online

1 Tesalonika 1 - Abun bible

1 Tesalonika 1

¹Men ka gri gato gum do, Paulus, Silas si Timotius anato krom surat re wa nin. Men ka gri krom sukdu re wa nin yé gato onyar kem mo men bi Yekwesu Yesus Kristus, nin yé gato sok mo men bi Ai, Yefun Allah bi rus-i mo kota Tesalonika. Men bi ai, Yefun Allah si men bi Yekwesu Yesus Kristus ete mewa nin. Yefun Allah si Yesus Kristus ete uttok nin petok sor.

²Men ka gri ki ndo mo Yefun Allah wa nin sino petok sor. Men ka gri ki suk su Yefun sa, men napawa nin petok sor.

³Men ki suk su Yefun Allah, men bi Ai sa, men napawa nin, we men jam do, nin sa, nin onyar kem mo Yefun Yesus, sane anato nin ben suk gato ndo. Men jam do, nin bi sukjimnut sye kas subot ye yi neya, sane anato nin samok wa nin ben sukndo. Men jam do, nin kwabom kam mo men bi Yekwesu Yesus Kristus, sane anato nin misyar Yefun mo nde, wo nin ben An bi suk-i petok sor.

⁴Men bi nji, men bi nyanggon, men jam do, Yefun Allah bi sukjimnut sye kas subot nin, ete An nai nin gum sok mo An bi rus-i,

⁵we suga nyim men ki sukdu subot os ndo gato Yesus Kristus kak wa men yetu ne nai nin jam sa, sukdu ne pet mo nin mit ré. Sukdu ne men ki su men syokwet sor nde, wo Yefun Allah Gen bi suktinggi bor mone dom. Men ki sukdu su men syokwet sor nde, wo men ki sukdu ne tepsu ye gato jam rer do, sukdu ne sangge. Nin jam do, men si nin kem mone sino sa, men bi sukjimnut sye wa men ós nin mo nin bi suk-i ne sor.

⁶Nin me suk gato men ben ne, ete nin waii benbot ré. Sane dom nin benbot suk gato men bi Yekwesu Yesun Yesus ben ne. Kapre nin ku sukye ndo nde, nin grem Yefun Allah bi sukdu ne kem pe mo nin mit si nin onyar, nin iwa sor. Yefun Allah Gen ben nin mit iwa An bi sukdu ne.

⁷Sane nin dakai kadum os wa yé mwa gato onyar kem mo Yefun Yesus ne sino gato kem mo bur Makedonia si bur Akhaya.

⁸Sane kadit nin re, yé mo bur Makedonia si bur Akhaya jam men bi Yekwesu bi sukdu-i ré. Yé jam sukdu subot nin onyar kem mo Yefun Allah mo bur we ne sor nde, wo yé ki subot nin sor, yé ki frekbot yé gato kem mo bur re iwedewe jam sino. Sane men yo mitwa men ki suk yo subot nin o nde,

⁹we yé mwa mo bur re iwedewe ne nuk subot sukndo gato nin ben su men tomgato men ma si nin kem mo kota Tesalonika ne. Yé mwa ne nuk do, nin iwa men ma ku nin mone. Yé mwa ne nuk o do, nin misyar sukdaret mwa mo bur re gato nin som daret, orete nin brek ma nin bi nin nggwa mo Yefun Allah gato sangge, ete nin ben Yefun Allah gato gesyos ne bi suk-i sor.

¹⁰Yé mwa ne nuk o do, nin eswa Yefun Allah bi Gan, Yesus Kristus, satu ma mo bur re kadit gu. Yesus Kristus ne, Yefun Allah sun An kadit sukkwop ré. Yefun Yesus ne nai men wé kadit sukmaskwa gato bere ma kadit Yefun Allah mo sukibit gato men yetu ben ne.