Read Abun 1 Tesalonika 4 Bible Online

1 Tesalonika 4 - Abun bible

1 Tesalonika 4

¹Sane, me bi nji, men bi nyanggon, men duno nin su sukduno gato kadum os wa nin subere nin jam suk gato ndo wa nin ben tepsu Yefun Allah mit it. Nin benbot sukduno ne napyo it. Sarewo su re men kiwa nin jammo sukduno gato men bi Yekwesu Yefun Yesus tarubot men ne. Nin jammo ete nin werwa nin benbot sukduno mwa ne sino wai kadit nyim neya o ré.

²Nin benbot sukduno mwa ne, we nin jam do, sukduno gato men duno nin su ne ma kadit men bi Yekwesu Yefun Yesus.

³Yefun Allah mit iwa nin ben nin bi suk-i sare do, nin ben Yefun bi suk-i tepsu Yefun mit petok sor, kwa gato ibit yo mo nde, nin mewa nin nggwa subere nin ben siri su yu nde, nin ben siri su yu wam dik yo dom nde.

⁴Nin yebris, nin gedik-gedik mewa nin nggwa subere nin si nin bi nggon kem not sor. Nin bi nin nggwa mo Yefun Allah wa ben suk gato ndo sor tepsu pe gato Yefun Allah si yetu mwa ne sino iwa et.

⁵Nin da bro wa nggon tepsu ye gato jam nde Yefun da bro ne nde.

⁶Sane nin ben siri su nin bi nji mo Kristus bi rus-i ne bi nggon nde. Nin kidar yé ne dom nde. Tomga nyim men ki suknapa wa nin wam bok yo mó ré, sare do, bere Yefun Allah syo sukye nai ye gato ben suk siri kadit sukduno ne.

⁷Yefun Allah nai men sok mo An bi rus-i subere yebris si nggon men sem su yu daret nde, wo An nai men subere men ben men bi suk-i ndo sor, sukibit wokgan yo dom nde.

⁸Sane ye gato bariwa sukduno ne it yo, án bariwa yetu bi sukduno-i nde, wo án bariwa Yefun Allah bi sukduno-i. Yefun Allah anato bok An Gen mo nin, sane nin bariwa An bi sukduno-i nde.

⁹Nin bi sukjimnut sye kas subot ye gato onyar kem mo Yefun ne, sane men yo mitwa men krom subot sukduno ne wa nin jam o nde. Yefun Allah dakai duno nin mó ré, sane anato nin bi sukjimnut sye kas subot yu sisu ndo it.

¹⁰Sane dom, nin bi sukjimnut sye kas subot yé mwa gato onyar kem mo Yefun Yesus ne sino mo bur Makedonia ré. Sarewo men bi nji, men bi nyanggon, men kiwa nin wergat nin nggwa wa nin ben suk sane mwa wai kadit nyim ne o et.

¹¹Nin nai sukjimnut do, ndo sa nin kem not sor. Nin dakai ben nin bi suk-i, nin iswen ye yi mo an bu sukdu-i nde, wo nin wergat nin nggwa, nin ben suk su nin samok subere nin meret suk gato nin yewa ne, tepsu tomgatu men duno nin mó ré.

¹²Nin ben suk sane sor, subere nin yo git mo ye yi syim nde. Sane bere ye gato jam nde Yefun un nin gum mone o ré.

¹³Men bi nji, men bi nyanggon, men mitwa nin jam sukdu gato sangge subot ye gato kwop ne. Men bariwa nin kwabom dek subot yekwop teker tepsu ye yi neya gato yo kwabom kam mo Yefun subot suk ne nde.

¹⁴Men jam do, Yefun Yesus kwop, orete Yefun Allah sun An kadit sukkwop ré. Sane anato men kwabom kam mo Yefun Allah do, bere Yefun Allah sun ye gato onyar kem mo Yefun Yesus kadit sukkwop, orete An kar ye ne ma kem su Yefun Yesus mo Yefun Allah bi de-i.

¹⁵Tepsu Yefun bi sukdu gato An ki nai men, men waii ki rer nai nin jam sare do, men yé gato mbau su kam gato Yefun Yesus satu ma mo bur re yo, men yo it mo gu nyim kadit ye gato kwop nyim ne nde.

¹⁶Bere malaikat bi yekwesu dik yo saiye nggi, ete yé jam Yefun Allah bi trompet ba, subere yé jam do, Yefun Yesus ma it anane. Orete Yefun Yesus dakai is ma kadit gu. Yefun Yesus is ma, ete ye gato onyar kem mo Kristus gato kwop nyim ne yo, Yefun sun yé mwa ne, ete yé mwa ne it mu nyim mo gu.

¹⁷Orge men yé gato mbau tó si yé gato kwop nyim ne it mu sino ku men bi Yekwesu Yefun Yesus mo nyotem mo gu. Orete men si Yefun Yesus kem sino sane sor to kapyo mato kapyo.

¹⁸Saneyo, nin ki sukdu ne nai yu, subere nin ós yu subere nin kwabom dek subot yekwop teker o nde.