Read Abun 1 Tesalonika 5 Bible Online

1 Tesalonika 5 - Abun bible

1 Tesalonika 5

¹Men bi nji, men bi nyanggon, men yo mitwa men krom sukdu subot kam gato bere Yefun Yesus satu ma mo bur re o nde,

²we nin dakai jam rer do, kam gato Yefun Yesus ma ne bere men yetu gensu An, tepsu men gensu ye gato ma wa syimsi suk su noru.

³Bere yetu mo bur re ki do, “Men kem not it anare, men nyuwa suk yo mo nde.” Sugane án ku sukye ndo nde, án gensu sukye ne ma tepsu nggon far gensu i wa kem su pa ne. Yé mwa ne ku sukye sor, ye yo ku os wa titi wé kadit nde.

⁴Sarewo men bi nji, men bi nyanggon, nin yo tepsu ye gato kem mo ndendu nde. Ye gato kem mo ndendu bere gensu kam gato Yefun Yesus ma ne. Yé gato kem mo ndendu gensu Yefun Yesus ma tepsu ye gensu ye gato syimsi suk ma ne. Sarewo bere nin yo gensu nde ré,

⁵we nin sino ben nin bi suk-i ne bor su nombrak, sane nin tepsu ye gato kem mo pe gato rer sor. Men ben men bi suk-i ne, tepsu ye gato kem mo ndendu nde. Yé ne ben an bi suk-i su noru subere an gurik sukibit gato an ben ne.

⁶Sa ndo sa, men yo sem tepsu ye gato jam nde Yefun o nde, wo men fro men nggwa wa bere men ku An su kam gato An ma ne. Men mewa men nggwa su sukjimnut gato ndo sor kom mo kam gato An ma su ne.

⁷Ye gato sem yo, an sem su noru. Ye gato da nau yo, bere an yenau su noru.

⁸Sarewo men re anato tepsu ye gato ben bi suk-i su nombrak. Sane men mewa men nggwa su sukjimnut gato ndo sor. Men onyar kem mo Yefun, men bi sukjimnut sye kas subot ye yi anato tepsu men it san gato krat kewa men kaim, san krat ne mewa men. Sane dom, men kwabom kam mo Yefun do, bere An ós men kem gesyos anato tepsu men bom topi krat kewa men su.

⁹Yefun Allah yo fro men wa men ku sukye mo An bi sukmaskwa nde, wo men bi Yekwesu Yesus Kristus anato kak os wa nai men wé kadit sukmaskwa ne subere men kem ndo to kapyo mato kapyo.

¹⁰Yefun Yesus kwop wa men subere men si An kem ndo su yu sino. Su kam gato Yefun Yesus satu ma mo bur re, men mbau o, men kwop o, bere men si An kem ndo su yu ré.

¹¹Sane it yo, ndo sa, nin ós yu, nin duno yu subere nin onyar kem mo Yefun Yesus nggi wai o et, tepsu nin ben su re ré. … nin duno yu subere nin onyar kem mo Yefun Yesus nggi wai o et

¹²Men bi nji, men bi nyanggon, men kiwa nin jammo ye gato samok wa duno nin. Nin jammo ye gato men bi Yekwesu Yefun Yesus bes tepsu yekwesu wa kadum os gato ndo wa nin.

¹³Ye gato Yefun bes ne ben suk mwa wa nin, sane nin bes án gum kok sor, nin bi sukjimnut sye kas subot án dom. Nin si yekwesu ne sino kem ndo su yu sor.

¹⁴Men bi nji, men bi nyanggon, men kiwa nin ben suk sato re do, nin duno ye gato bambrai, subere án iwa án ben suk; nin ós ye gato nyuwa suk mwa, subere án yo nyuwa suk yo o nde; nin ós ye gato yo nggi nde; nin ben nin bi suk-i sisu njep su yé mwa ne sino.

¹⁵Nin mewa nje mone subere yetu ge dik yo ben sukibit ma nai nin it yo, nin waii ben sukibit satu mu nai ye ne nde. Wo nin wergat nin nggwa subere nin ben sukndo su yu si yé mwa ne sino et.

¹⁶Nin mit at wa Yefun sisu nin petok sor.

¹⁷Nin ki suk su Yefun petok sor.

¹⁸Mo suk mwa ne sino gato nin ku ne, nin ki ndo mo Yefun Allah, we Yefun iwa men yé gato onyar kem mo Yesus Kristus ne ki ndo mo An petok sor.

¹⁹Yefun Allah Gen ben suk mo men mit tepsu bot ru, sane men te wé nde.

²⁰Yefun Allah Gen tau suktaru bot yetu ge dik yo it yo, men bare sukdu ne wé nde.

²¹Sukdu mwa gato yé ki nai men yo, men nutbot sisu ndo et, orete kwa gato ndo yo, men jowa pe,

²²wo kwa gato ibit, men bare wé ko kadit men.

²³Yefun Allah gato ós men kem ndo su yu, Yefun dakai ete kak nin bi sukjimnut subere nin ben An bi suk-i sisu nin mit dik nin onyar dik petok sor. Yefun Allah ete mewa nin da kridek si nin da gesyos sino sane sor subere nin ben nin bi suk-i ibit yo mo nde, kwa dik yo dom nde, subere men bi Yekwesu Yesus Kristus satu ma mo bur re it yo, ye yo ku os wa ki nin gum ibit mo suk yo mo nde.

²⁴Yefun Allah gato nai nin sok mo An bi rus-i, sangge, bere An anato mewa nin, we An dakai benbot suk gato An tom ne.

²⁵Men bi nji, men bi nyanggon, nin ki suk su Yefun Allah wa men petok sor.

²⁶Nin ku ye gato onyar kem mo Yefun Yesus it yo, nin i yu tepsu nin yedik mo Yefun bi rus-i et.

²⁷Ji kiwa nan tom su ji mo Yefun Yesus gwem do, bere nin baca sukdu mwa gato ji krom re nai yé gato onyar kem mo Yefun ne sino.

²⁸Men bi Yekwesu Yesus Kristus ete mewa nin sor. Ndo mo nin sor, kadit Paulus