Read Abun 2 Tesalonika 2 Bible Online

2 Tesalonika 2 - Abun bible

2 Tesalonika 2

¹Men bi nji, men bi nyanggon, re yo, men krom sukdu subot kam gato men bi Yekwesu Yesus Kristus satu ma mo bur re, ete men si An kem sino. Men krom sukdu re rer subere nin jam. Men ki suknapa wa nin sino sare do,

²nin jam ye yo ki do, men bi Yekwesu Yefun Yesus satu ma mo bur re it yo, nin gensu sukdu sane nde, nin kwabom kro mo sukdu sane nde. Kapre ye yo ki do, Yefun Allah Gen kadum nai án do, Yefun Yesus ma it yo, nin jambot sukdu sane nde. Kapre ye yo o ki do án jam sukdu do, Yefun Yesus satu ma mó ré yo, nin jambot sukdu sane nde. Kapre ye yo o ki nai nin do, men krom sukdu mo surat dik yo do, Yefun Yesus satu mo bur re, an jam mó ré yo, nin jambot sukdu sane dom nde.

³Ye gato ma ki bi sukdu-i sane ben kidar nin ko ne. Nin jambot sukdu sane nde. We sare, Yefun Yesus yo satu ma mo bur re nde tó, bere suk bok yo bor nyim wé ré, sare do, bere yé mwa bariwa jammo Yefun bi sukduno-i o ré, ete yetu ge dik yo gato Mise bere bor mone dom. Yetu gato Mise gare, bere ri ma Yefun Yesus bare mo bot gesyos.

⁴Sarewo Yefun yo bare ye gato Mise ne mo bot gesyos nde tó, ye gato Mise ne bes nggwa kok ete duwer Yefun Allah mo suk mwa neya. Bere ye Mise ne ki do, an sa, gum kok sye wai kadit suk mwa gato yetu mo bur re som tepsu Yefun Allah ne. Ye ne bes an nggwa kok, sane anato bere an sok mo Yefun Allah bi nu mit. Bere an kem mone, ete an ki do, an anato Yefun Allah.

⁵Nin napawa tomgato ji si nin kem mone, sukdu mwa ne, ji ki napyo nai nin jam mó ré.

⁶Su re nin dakai jam suk gato yawa yetu gato Mise ne anato an yo bor nde tó. Suk yo yawa an yei, subere an bor tepsu bi kam gato Yefun Allah dakai fro ne et.

⁷Su re suktinggi gato bere bor mo ye Mise ne da kas mó ré. Suktinggi ne ben nje bariwa jammo Yefun Allah bi sukdu. Suktinggi ne da kas, sarewo yé jam nde ré, we suktinggi ne yo bor ri nde tó. Suk yo yawa ye Mise ne yei, subere an yo bor nde wade Yefun Allah nai suk ne wé,

⁸ete bere yetu gato Mise ne bor it anane. Sane men bi Yekwesu Yefun Yesus satu ma mo bur re yo, bere Yefun gu yetu gato Mise ne. Yefun Yesus ki bi sukdu-i pet mo yetu gato Mise ne sor ré, bere yetu gato Mise ne kwop it anane. Yefun Yesus satu ma, An tepsu yepasye gato gum kok sye wai it yo, bere An ben ye Mise ne ibit o ré.

⁹Yefun Yesus yo ben an ibit nde tó, yetu gato Mise ne ma su suktinggi kadit biris bi yekwesu. Sane bere an ben an bi suk-i yo, an ben kidar nje do, an ben nje yeket e, an ben suk gato ben je nutbot ndo nde, an kadum an bi suktinggi ne, sarewo suk gato sangge yo mo nde, an ben kidar nje kaii.

¹⁰An ben kidar nje su suk gato mise ket kwayo-kwayo. An ben kidar nje subere an gwat yé gato bere Yefun Allah bare mo bot gesyos ne muket os ibit. Yé mwa ne bere ges mo bot gesyos, we yé mwa ne bariwa án jammo Yefun Allah bi sukdu-i gato sangge. Sane bere Yefun Allah yo nai yé mwa ne wé kadit bot gesyos nde, án yo ku os wa kem ndo to kapyo mato kapyo nde.

¹¹Sane anato Yefun Allah ben án bi sukjimnut waiyu ndo nde wade án jam nde suk subere án onyar kem mo sukkidar sor ré.

¹²Sane ye gato iwa ben sukibit ete bariwa jammo suk gato sangge ne, bere Yefun Allah syo sukye nai án sino mo bot gesyos o ré. Yé mwa ne bere ges mo bot gesyos, we yé mwa ne bariwa án jammo Yefun Allah bi sukdu-i

¹³Men bi nji, men bi nyanggon gato Yefun Yesus jimnotku, Yefun Allah fro nin su ketke subere nin kem ndo to kapyo mato kapyo mo Yefun Allah bi nat-i. Sane men ki ndo mo Yefun noru nombrak sor. Yefun Allah Gen kak nin bi sukjimnut anato nin jambot Yefun Allah bi sukdu gato sangge. Yefun Allah Gen kak nin bi sukjimnut anato nin brek kadit os ibit, ete nin tepsu Yefun Allah bi rus-i gato ben Yefun bi suk-i petok sor. Sane anato nin kem ndo to kapyo mato kapyo it anare. … men ki sukdu subot os ndo gato Yesus Kristus kak ne

¹⁴Men ba ku nin, ete men ki sukdu subot os ndo gato Yesus Kristus kak ne. Nin jammo sukdu ne anato nin kem ndo to kapyo mato kapyo. Sane mo sukdu gato men ki ne ben sato Yefun Allah kendo nin mone, subere nin si men sino ku suk gato ndo wai mo Yefun Allah bi nat-i tepsu men bi Yekwesu Yesus Kristus ku suk gato ndo wai mone.

¹⁵Sane men bi nji, men bi nyanggon, nin misyar Yefun bi sukduno nde, wo nin grem sukduno gato men duno nin su ne pe mo nin mit sor. Sukduno ne, deyo men ki su men syokwet, deyo men krom, sane sukduno mwa ne sino, nin jom krat sor.

¹⁶Men bi Yekwesu Yesus Kristus, An dakai si men bi Ai, Yefun Allah gato bi sukjimnut sye kas subot men ne, Yefun dakai bi sukjimnut sye kas subot men anato An ós men kem ndo to kapyo mato kapyo. An kak men bi sukjimnut anato men kwabom kam mo An do, sangge, bere An ben sukndo su men sino.

¹⁷Mo sukndo mwa gato nin ben si nin ki ne sino, Yefun Allah si Yesus Kristus ete ben nin nggi. Yefun Allah si Yesus Kristus ete ben nin mit iwa nin ben An bi suk-i mo suk mwa ne sor.