Read Abun 2 Tesalonika 3 Bible Online

2 Tesalonika 3 - Abun bible

2 Tesalonika 3

¹Men bi nji, men bi nyanggon, men bi sukdu gato wari mo surat re wa nin anare, nin ki suk su Yefun Allah wa men subere men ku os wa men mu ki sukdu subot men bi Yekwesu Yefun Yesus ne nai yé mwa mo peyo-peyo. Nin ki suk su Yefun subere sukdu frekbot yé mwa ne kekro. Nin ki suk su Yefun subere yé mwa ne mit iwa sukdu ne, tepsu tomgatu nin iwa sukdu ne.

²Nin ki suk su Yefun wa men subere Yefun Allah mewa men kadit ye gato ben sukot si ye gato ben sukibit nai men dom, we yé mwa ne sino onyar yo kem mo Yefun bi sukdu-i nde.

³Yetu ben sukibit, sarewo Yefun Allah sa, An benbot suk gato An tom ne. Bere An ben nin nggi. Bere An mewa nin kadit biris bi yekwesu ré.

⁴Men kwabom kam mo Yefun Yesus do, sukduno gato men duno nin su ne, nin benbot su re, ete bere nin benbot su kam sari ne ma petok sor dom.

⁵Yefun ete kak nin bi sukjimnut ne ko wai o subere nin jam sukdu sato re do, Yefun Allah bi sukjimnut sye kas subot nin petok sor. Sane dom, Yesus Kristus ben nin nggi subere kapre nin ku sukye, nin yo misyar Yefun nde, wo nin nggiwa ben An bi suk-i petok sor.

⁶Men bi nji, men bi nyanggon, men bi Yekwesu Yesus Kristus ki sukdu nai men, sane men waii syaugat nin do, ye gato onyar kem mo Yefun do bambrai wa ben suk it yo, nin mu karowa ye ne nde. Ye gato onyar kem mo Yefun do bariwa benbot men bi sukduno-i it yo, nin mu karowa ye ne dom nde.

⁷Nin dakai jam do, nin ben suk nin konembot suk gato men ben ne ete ndo. Men si nin kem mone sa, men yo bambrai wa men ben suk nde.

⁸Men yo git ye yi bi sugit-i yi nde, wo men bi sugum wa sugit ne ré. Sane men wergat men nggwa men samok noru nombrak wa men ben suk wa men ku suk gato men mitmo ne, subere men yo syimfar nin nde.

⁹Men da bi os wa men ndek suk mo nin, {we men duno nin su Yefun bi sukduno-i.} Sarewo men yo ndek suk kadit nin nde, wo men dakai ben suk subere men ku suk gato men yewa ne, subere men kadum os gato ndo wa nin waii benbot.

¹⁰Sane tomgato men si nin kem mone tó, men duno nin su sukduno kwa dik yo subot ye gato bambrai wa ben suk sato, ben nggwe e, nggo nu e ne sare do, “Ye to dakai bambrai wa ben suk it yo, men syo sugit nai an git nde.”

¹¹Men jam sukdu do, nin deyo bambrai wa ben suk mone. Kapre sukwokgan án yo ben dom nde, wo án iwa mu ki sukdaret bot nu sor ré.

¹²Men bi Yekwesu Yesus Kristus ki sukdu nai men, sane yo men waii syaugat ye gato bambrai ne do, án dakai mu ki sukdaret bot nu o nde, wo án kem not, án ben suk án samok et, subere án ku suk gato án yewa ne.

¹³Men bi nji, men bi nyanggon, nin ben sukndo sor, nin bambrai wa nde.

¹⁴Nin mewa nin nggwa kadit nje gato bariwa jammo men bi sukduno mo surat re, nin mu karowa án dom nde, subere án damen.

¹⁵Sarewo nin nut mo án do, án tepsu yeko wa nin nde, wo nin nut mo án tepsu nin bi nji ete nin ki suknapa wa án et.

¹⁶Men bi Yekwesu gato ós men kem ndo su yu, An dakai ete ben nin kem ndo su yu mo suk mwa ne sino petok sor. Yefun ete sisu nin sino sor.

¹⁷Ji, gato gum do Paulus, ji ki ndo mo nin sor. Ji dakai krom sukdu wari re su ji syim. Ji anato krom sukdu su ji syim sato re, subere nin jam rer do, ji anato bi sukdu-i mo surat re sino.

¹⁸Men bi Yekwesu Yesus Kristus ete mewa nin sino sor. Ndo mo nin sor, kadit Paulus