Read Abun 1 Timotius 2 Bible Online

1 Timotius 2 - Abun bible

1 Timotius 2

¹Nan jambot suk gato ji krom re et. Ketke, men ndek suk mo Yefun Allah yo, men ki ndo mo Yefun, ete men ki suk su Yefun wa yé mwa mo bur re or sino.

²Men ki suk su Yefun Allah wa men bi yekwesu si yepasye bok ne sino mo bur re, subere yekwesu ne jom men sisu ndo, subere men kem not, subere men kem ndo su yu, men ben men bi suk-i tepsu Yefun mit, men ben men bi suk-i ne ndo petok sor.

³Men ki suk su Yefun wa yepasye ne yo, Yefun Allah gato fro os ndo wa men kem ndo to kapyo mato kapyo, Yefun Allah ne mit iwa.

⁴Yefun Allah iwa men yetu mwa ne sino si An kem ndo to kapyo mato kapyo. An iwa men sino jam An bi sukdu gato sangge.

⁵Yefun Allah ne ka dik sor. Ye gato tepsu yegweswai wa men si Yefun Allah ne ka dik sor. Yegweswai ne gum do Yesus Kristus.

⁶An bi An nggwa wa tot suktot mo sukibit gato men yetu sino ben ne wé ré. Sane tepsu bi kam gato Yefun Allah fro ne, Yefun Yesus kak os ndo ne wa yé mwa ne sino ku os wa kem ndo to kapyo mato kapyo ré.

⁷Sane anato Yefun Allah bes ji gum yerasul wa ji mu ki sukdu ne frekbot nje. Sangge, ji yo kidar nde, Yefun Allah syogat ji mu wa ji ki subot sukdu ne nai ye Yahudi sor nde, wo An syogat ji mu wa ji ki subot sukdu ne wai yewis yi neya mo bur re jam.

⁸Ji mit iwa yebris jammo sukdu ne mo pe mwa ne sino, ete án bes án syim, án ki suk su Yefun Allah su án mit duk án onyar dik, ete án maskwa ket ye yi nde, án duwer ye yi kete dom nde.

⁹Sane nggón mwa ne sino dom, ji mit iwa nggón ne it san gato tep yi sor. Nggón it san gato bi sugum sye nde. Nggón it san wa ben kidar yebris nde. Nggón mbrau nggwa tep yi sor. Nggón sur sugo ndo taker nde. Nggón mbrau nggwa su emas si mutiara dom nde.

¹⁰Nggón werwa án mbrau nggwa teker eta nde, wo nggón werwa ben suk gato ndo sor, tepsu nggón gato onyar kem mo Yefun ne ben ré.

¹¹Nggón jammo yé gato duno án su Yefun Allah bi sukduno mo nu ari. Nggón kem not syaretwa sukduno gato yé ki ne sor.

¹²Ji bariwa ye bes nggón gum kok wa duno yebris su Yefun Allah bi sukduno-i, we yebris yo jammo nggón nde, wo nggón kem not ete jammo sukdu gato yebris duno nggón su ne sor,

¹³we Yefun Allah ut Adam nyim, orete An ut Hawa wari.

¹⁴Sane dom, biris bi yekwesu ben kidar Adam nyim nde, wo biris bi yekwesu ben kidar Hawa nyim, ete Hawa ges mo os ibit ré.

¹⁵Sarewo ndo sa, nggón kem not, ete nggón pe bi pa-i sor. Nggón pe bi pa-i, ete nggón onyar kem mo Yefun Yesus e, nggón ben Yefun bi suk-i e, nggón bi sukjimnut sye kas subot ye yi e ne yo, bere nggón ne kem ndo to kapyo mato kapyo ré.