Read Abun 1 Timotius 3 Bible Online

1 Timotius 3 - Abun bible

1 Timotius 3

¹Sukdu gato ji ki re suksangge, “Ye to mit iwa ye bes an gum yekwesu mo nu ari, an iwa an ben suk gato ndo wai o ré.”

²Sane, ye gato gum yekwesu mo nu ari, an ben an bi suk-i sato ré, an ye gato ben sukndo sor, ye yo ki an gum ibit mo nde; an kra nggon ge dik sor, an mewa nggwa kadit an ben sukdaret, an mewa nggwa kadit an ben sukibit, an ben sukndo sor; yé yo ma mo an bi nu yo, an iwa, an syo sugit nai yé ne sor; an jam an duno nje sisu ndo;

³an yenau nde; an ben sukot nde, wo an ben an bi suk-i njep sor, an duwer ye yi daret nde, an gro sye wa sugum nde.

⁴An mewa an bi rus sisu ndo; an duno an bi pa sisu ndo, subere pa ne jammo an sisu pa mit dik sor,

⁵we, ye gato jam nde mewa an bi rus-i sisu ndo yo, bere ye ne mewa Yefun Allah bi rus-i mo nu ari sa u ne?

⁶An ye gato onyar kem mo Yefun Yesus sim yo, men bes an gum yekwesu mo nu ari nde, sawe an mit at ndo nde, orete Yefun syo sukye nai an, tepsu Yefun bere syo sukye nai biris bi yekwesu.

⁷Sarewo ye gato men bes gum yekwesu mo nu ari ne, men me ye gato ben bi suk-i ndo anato yé mwa kas mo an gum ne, ete men bes ye ne et. Wo men bes ye gato gum ndo nde yo, bere ye ki ye ne gum ibit ket kwayo-kwayo. Sane bere biris bi yekwesu ku os wa ben sukye nai ye ne tepsu ye sip suge su bus.

⁸Sane dom, ye gato ós yekwesu mo nu ari, an ben an bi suk-i sato re, an ye gato ye yi un ne, an ye gato ben bi suk-i ne ri-roi sor, an brek nden we nde; an bariwa an da nau mwa teker; an gro sye wa sugum nde.

⁹Yefun Allah bi sukduno gato Yefun Yesus ki rer wa men, an jom pe et, an iwa sukduno mwa ne sino, an bi sukjimnut gato ndo mo an mit ne, siri kadit sukduno ne mo nde.

¹⁰Men yo bes an nde tó, men watbot an or et. An ben suk tepsu sukduno gato ji krom more yo, men bes an sor, wo an yo ben suk tepsu nde yo, men bes an gum tepsu ye gato ós yekwesu mo nu ari nde.

¹¹Sane dom, an bi nggon ne nggon gato ye yi un ne. Nggon ne yo kiket ye yi gum ibit mo nde. Nggon ne mewa nggwa, mom ben sukdaret nde. Mo suk mwa gato mom ben ne, mom yo kidar suk mo nde, wo yé mwa ne onyar kem mo mom ré.

¹²Ye gato ós yekwesu mo nu ari ne, an kra nggon ka dik sor. An ye gato mewa an bi rus sisu ndo dom.

¹³An ben suk wa ós yekwesu ne sisu ndo yo, bere yé mwa kas mo an gum. Sane dom, bere an ki sukdu subot Yesus Kristus gato an onyar kem mó, an yo nyuwa wokgan yo dom nde, wo an iwa an ki sukdu ne sane sor mwa wai kadit nyim ne o ré.

¹⁴Timotius, ji da iwa ji ba ku nan kekro, sarewo ji yo ba nde tó, ji krom sukdu mo surat re wa nan.

¹⁵sawe suk yo kwa yawa ji ba kekro ne yo, bere nan jam suk gato ndo wa Yefun Allah bi rus-i mo nu ari ben ne. Yefun Allah bi rus-i mo nu ari ne anato tepsu yé mwa gato onyar kem mo Yefun Allah, gato gesyos. Yefun Allah bi rus-i ne anato jowa An bi sukduno gato sangge tepsu kwedi si fondasi gato krat jowa nu dik yo nggi.

¹⁶Suk gato men krom re suksangge, men bi sukduno gato nyim neya Yefun Allah gurik ne ndo wai o ré, sato re: Yefun Yesus ma mo bur ré, An kaim tepsu yetu kaim. Yefun Allah Gen kadum do, Kristus sa, ben bi suk-i ne sangge sino. Malaikat mwa ne sino me An ré. Yé ki sukdu subot An frekbot wisyo-wisyo. Yé mwa mo bur re iwedewe onyar kem mo An ré. An it mo gu nim, mo pe gato ndo wai o ré.